Read Библи: Сыгъдӕг Нымӕцтӕ 19 Bible Online

Нымӕцтӕ 19 - Библи: Сыгъдӕг bible

Нымӕцтӕ 19

¹Дунедарӕг Моисей ӕмӕ Ааронӕн загъта:

²«Мӕнӕ, Дунедарӕг цы уагӕвӕрд радта, уый: зӕгъ израилӕгтӕн, цӕмӕй дӕм ӕрбакӕной, ӕфсондз кӕуыл нӕ уыд, ахӕм ӕнӕсахъат ӕмӕ ӕнаипп бур дыгӕрдыг.

³Сауджын Елеазары бар ӕй бакӕнут. Рӕсӕнуатӕй йӕ ракӕнӕнт ӕмӕ йӕ сауджын Елеазары раз аргӕвдӕнт.

⁴Сауджын Елеазар кусарты тугӕй йе ’нгуылдзыл сисӕд ӕмӕ йӕ Фембӕлды Цатырыл авд хатты бапырх кӕнӕд.

⁵Дыгӕрдыг йӕ цӕстыты раз хъуамӕ сыгъд ӕрцӕуа: йӕ царм, йӕ фыд, йӕ туг, йӕ чъизитӕ йын басудзын хъӕуы.

⁶Райсӕд сауджын кедр бӕласы лыггаг, цӕвӕгхос ӕмӕ сырх-сырхид хъуымацы гӕппӕл ӕмӕ сӕ, дыгӕрдыг цы арты судзы, уырдӕм баппарӕд.

⁷Уый фӕстӕ сауджын хъуамӕ йӕ дарӕс цӕхса, йӕхи цынайа, ӕмӕ йын уӕд рӕсӕнуатмӕ аздӕхӕн ис, фӕлӕ чъизийыл нымад уыдзӕн изӕрмӕ.

⁸Дыгӕрдыджы мард чи басыгъта, уыцы адӕймаг дӕр хъуамӕ цӕхса йӕ дарӕс ӕмӕ йӕхи цынайа; чъизи уыдзӕн изӕрмӕ.

⁹Сыгъдӕг чи у, ахӕм адӕймаг хъуамӕ сӕмбырд кӕна дыгӕрдыджы сыгъдон ӕмӕ йӕ рӕсӕнуаты ӕдде сыгъдӕг ран бафснайа, цӕмӕй дзы израилӕгтӕ сыгъдӕггӕнӕн дон кӕной: уый тӕригъӕды нывонд у.

¹⁰Дыгӕрдыджы сыгъдон сӕмбырдгӕнӕг дӕр цӕхсӕд йӕ дарӕс; чъизи уыдзӕн изӕрмӕ. Израилӕгтӕн ӕмӕ се ’хсӕн цӕрӕг ӕрцӕуӕггӕгтӕн уый уӕд мыггагмӕйы фӕтк.

¹¹Марды буарыл чи бандзӕва, уый авд боны дӕргъы уыдзӕни чъизи.

¹²Ӕртыккаг ӕмӕ ӕвдӕм бон хъуамӕ йӕхи ссыгъдӕг кӕна уыцы сыгъдонӕй, ӕмӕ уӕд сыгъдӕг уыдзӕн. Ӕртыккаг ӕмӕ ӕвдӕм бон йӕхи куынӕ ссыгъдӕг кӕна, уӕд та сыгъдӕг нӕ уыдзӕн.

¹³Марды буарыл чи андзӕва ӕмӕ йӕхи чи не ссыгъдӕг кӕна, уый Дунедарӕджы цӕрӕнуат чъизи кӕны ӕмӕ Израилы ’хсӕнӕй фӕхъӕудзӕн. Уымӕн ӕмӕ уый сыгъдӕггӕнӕн донӕй нӕ бапырх кодтой, ӕмӕ чъизи у, йӕ чъизи ис йӕ уӕлӕ.

¹⁴Ӕгъдау: мард цы цатыры ис, уыцы цатырмӕ чи бацӕуа ӕмӕ уыцы цатыры чи уа, уыдон авд боны дӕргъы чъизи уыдзысты.

¹⁵Цыфӕнды мигӕнӕн дӕр гом у, цыфӕнды мигӕнӕнӕн дӕр йӕ сӕр ӕнгом ӕхгӕд нӕу, зӕгъгӕ, уӕд фӕчъизи уыдзӕн.

¹⁶Искӕй къухӕй чи фӕмард, ууыл кӕнӕ йӕхи низӕй амӕлӕгыл, адӕймаджы стӕгдар кӕнӕ ингӕныл хӕдзарӕн ӕдде чи андзӕва, уый чъизи уыдзӕн авд боны.

¹⁷Цӕмӕй ссыгъдӕг уа, уый тыххӕй уыцы артысыгъд тӕригъӕды нывонды ӕртхутӕг донимӕ сызмӕнтӕнт иу мигӕнӕны.

¹⁸Сыгъдӕг чи у, ахӕм исчи райсӕд иссоп, уыцы доны йӕ атулӕд ӕмӕ дзы бапырх кӕнӕд цатырыл, ӕппӕт мигӕнӕнтыл ӕмӕ, уым чи уыди, уыдоныл, йе та стӕгдарыл, искӕй къухӕй мардыл, йӕхи ’гъдауӕй амӕлӕгыл, кӕнӕ ингӕныл чи андзӕвыд, уыцы адӕймагыл.

¹⁹Сыгъдӕг адӕймаг чъизи адӕймагыл хъуамӕ уыцы донӕй бапырх кӕна ӕртыккаг, стӕй та ӕвдӕм бон ӕмӕ йӕ афтӕмӕй ӕвдӕм бон ссыгъдӕг кӕна. Уый та йӕ дарӕс цӕхсӕд, йӕхи цынайӕд ӕмӕ изӕрмӕ ссыгъдӕг уыдзӕн.

²⁰Чи фӕчъизи ис, уый йӕхи куынӕ ссыгъдӕг кӕна, уӕд та дзыллӕйӕ фӕхъӕудзӕн, уымӕн ӕмӕ Дунедарӕджы Уаз Цӕрӕн чъизи кӕны: сыгъдӕггӕнӕн донӕй йыл нӕ бапырх кодтой, ӕмӕ чъизи у.

²¹Уый сын — мыггагмӕйы уагӕвӕрд. Сыгъдӕггӕнӕн дон чи пырх кодта, уый хъуамӕ цӕхса йӕ дарӕс. Сыгъдӕггӕнӕн донмӕ чи бавнӕлдта, уый изӕрмӕ чъизийӕ баззайдзӕни.

²²Чъизи адӕймаг цӕмӕдӕриддӕр февнала, уый фӕчъизи уыдзӕни. Чъизи адӕймагӕн йӕхиуыл чи бандзӕва, уый та чъизи уыдзӕн изӕрмӕ».