Read Библи: Сыгъдӕг Нымӕцтӕ 25 Bible Online

Нымӕцтӕ 25 - Библи: Сыгъдӕг bible

Нымӕцтӕ 25

¹Ӕрбынат кодтой израилӕгтӕ Ситтимы, ӕмӕ моаваг сылгоймӕгтимӕ хӕтын райдыдтой.

²Уыдон адӕмы сӕ хуыцӕутты нывӕндтӕм хуыдтой, ӕмӕ дзы хордтой адӕм ӕмӕ сын куывтой сӕ хуыцӕуттӕн.

³Бандӕгъдысты израилӕгтӕ Баал-Пеорыл, ӕмӕ сӕм Дунедарӕджы маст ссыгъди.

⁴Загъта Дунедарӕг Моисейӕн: «Адӕмы хицӕутты се ’ппӕты дӕр Дунедарӕджы раз хурмӕ байтындз, ӕмӕ ӕрсабыр уыдзӕн Дунедарӕджы маст израилӕгтӕм».

⁵Моисей загъта Израилы фӕтӕгтӕн: «Алчидӕр уӕ, йӕ адӕмӕй Баал-Пеормӕ чи кувы, уыдоны амарӕд».

⁶Ӕмӕ дын мӕнӕ израилӕгтӕй иу ӕрбацыд ӕмӕ йе ’фсымӕртӕм, Моисей ӕмӕ ӕппӕт дзыллӕйы раз, уыдон Фембӕлды Цатыры къӕсӕрмӕ куыд куыдтой, афтӕ мидианаг сылгоймаджы куы ӕрбакӕнид.

⁷Пинхас, Елеазары фырт, сауджын Аароны фырты фырт, уый куы федта, уӕд адӕмы ’хсӕнӕй сыстад ӕмӕ арц райста.

⁸Уыцы израиладжы фӕстӕ цатырмӕ бацыд ӕмӕ сӕ дыууӕйы дӕр арц ныссагъта, израиладжы дӕр амардта ӕмӕ сылгоймаджы дӕр. Уыйадыл израилӕгтӕ рыны азарӕй фервӕзтысты.

⁹Рын кӕй ныццагъта, уыдон уыдысты цыппар ӕмӕ ссӕдз мины.

¹⁰Дунедарӕг Моисейӕн загъта:

¹¹«Елеазары фырт, сауджын Аароны фырты фырт Пинхас мын Мӕ маст аздӕхта израилӕгтӕй, афтӕ ӕнувыд Мыл кӕй разындис, уымӕй, ӕмӕ, фыр мӕстӕй судзгӕйӕ, Ӕз нал ныццагътон израилӕгты.

¹²Зӕгъ ын: Ӕз йемӕ аразын сабырдзинады фидыд.

¹³Уыцы фидыдмӕ гӕсгӕ Пинхас ӕмӕ йӕ байзӕддӕгтӕн мыггагмӕ лӕвӕрд цӕуы сауджыны ном, йӕ Хуыцауыл афтӕ ӕнувыд кӕй у ӕмӕ израилӕгты сӕ тӕригъӕдӕй кӕй фервӕзын кодта, уый тыххӕй».

¹⁴Мидианаг сылгоймагимӕ чи фӕмард, уыцы израилаг хуынди Зимри, Салуйы фырт, Симеоны хӕдзарвӕндӕгтӕй иуы хистӕр.

¹⁵Чи фӕмард ис, уыцы мидианаг сылгоймаг та — Козби, йӕ фыд — Цур, мидианаг хӕдзарвӕндӕгтӕй иуы хистӕр.

¹⁶Дунедарӕг Моисейӕн загъта:

¹⁷«Мидианӕгты фӕдыл зилут ӕмӕ сӕ дӕрӕн кӕнут,

¹⁸уымӕн ӕмӕ уын знаггад кӕнынц. Пеормӕ дӕр уыдоны аххосӕй бабӕллыдыстут ӕмӕ, Пеоры фыдӕй рын куы сыстад, уӕд цы сылгоймаг фӕмард ис, мидианӕгты фӕтӕджы чызг Козби, уый дӕр со хо уыди».