Read Библи: Сыгъдӕг Нымӕцтӕ 34 Bible Online

Нымӕцтӕ 34 - Библи: Сыгъдӕг bible

Нымӕцтӕ 34

¹Дунедарӕг Моисейӕн загъта:

²«Израилӕгтӕн бафӕдзӕхс: Ханааны бӕстӕм куы бацӕуат, уӕд, уӕ хай цы зӕхх бауыдзӕн, уымӕн уыдзӕнис ахӕм арӕнтӕ:

³уӕ бӕстӕйы хуссайраг хай райдайдзӕн Цины ӕдзӕрӕг быдыры, Едомы арӕнӕй. Скӕсӕны уӕ хуссайраг арӕн йӕхи айтындздзӕни Мард денджызы былгӕронӕй,

⁴базилдзӕни Маале-Акрабиммӕ, Цины уылты ацӕудзӕн, Кадеш-Барнеайы хуссаргӕрӕтты ӕрзилдзӕн, Хацар-Адурмӕ рахиздзӕн ӕмӕ Ацмонмӕ бахӕццӕ уыдзӕн.

⁵Уырдыгӕй азилдзӕн Мысыры лӕнкмӕ ӕмӕ денджызмӕ бахӕццӕ уыдзӕн,

⁶ныгуылӕйнаг арӕн та уын Стыр денджыз уыдзӕн, уый уыдзӕн уӕ ныгуылӕйнаг арӕн.

⁷Уӕ цӕгатаг арӕн: Стыр денджызӕй йӕ Оры хохмӕ фӕнысан кӕнут.

⁸Оры хохӕй Хаматмӕ йӕхи айтындздзӕн ӕмӕ Цедады балӕудзӕн.

⁹Ахӕццӕ уыдзӕни Зифронмӕ ӕмӕ уырдыгӕй аххӕсдзӕни Хацар-Энанмӕ. Уый уыдзӕн уӕ цӕгатаг арӕн.

¹⁰Скӕсӕйнаг арӕн: Хацар-Энанӕй — Шефаммӕ.

¹¹Шефамӕй ацӕудзӕни Аины скӕсӕнварс Ривламӕ, Киннереты денджызы былмӕ бахӕццӕ уыдзӕн.

¹²Ӕрхиздзӕн арӕн Иорданмӕ ӕмӕ йӕхи айтындздзӕни Мард денджызы былгӕрӕтты. Уый уын уӕ бӕстӕ ӕнӕхъӕнӕй, йӕ арӕнтимӕ».

¹³Ӕмӕ бафӕдзӕхста Моисей израилӕгтӕн: «Мӕнӕ ацы бӕстӕ сымах хӕлттӕм гӕсгӕ схӕйттӕ кӕндзыстут фараст ӕмӕ ӕрдӕг хӕдзарвӕндаджы ’хсӕн, Дунедарӕг куыд загъта, афтӕ.

¹⁴Уымӕн ӕмӕ Рувимы байзӕддӕгтӕ, сӕ фыдӕлты хӕдзарвӕндӕгтӕм гӕсгӕ, стӕй Гады байзӕддӕгтӕ, сӕ фыдӕлты хӕдзарвӕндӕгтӕм гӕсгӕ, ӕмӕ Менассиайы хӕдзарвӕндагӕн йе ’мбис сӕ хай райстой.

¹⁵Дыууӕ хӕдзарвӕндаджы ӕмӕ хӕдзарвӕндаджы ӕрдӕг сӕ хай райстой Иорданы иннӕ фарс, скӕсӕны, Йерихоны бакомкоммӕ».

¹⁶Ӕмӕ загъта Дунедарӕг Моисейӕн:

¹⁷«Мӕнӕ, бӕстӕ уын чи хӕйттӕ кӕндзӕн, уыцы лӕгты нӕмттӕ: сауджын Елеазар ӕмӕ Йешуа, Нуны фырт.

¹⁸Ӕмӕ ма ноджы фӕйнӕ иу фӕтӕджы снысан кӕнут алы хӕдзарвӕндагӕй дӕр зӕхх адих кӕнынмӕ.

¹⁹Мӕнӕ уыцы лӕгты нӕмттӕ: Иудӕйы хӕдзарвӕндагӕй — Калев, Иефоннейы фырт.

²⁰Симеоны хӕдзарвӕндагӕй — Самуел, Аммиуды фырт.

²¹Бениамины хӕдзарвӕндагӕй — Елидад, Кислоны фырт.

²²Даны хӕдзарвӕндагӕй — фӕтӕг Букки, Иаглийы фырт.

²³Йосефы байзӕддӕгтӕй, Менассиайы хӕдзарвӕндагӕй, — фӕтӕг Ханниел, Ефоды фырт.

²⁴Ефремы хӕдзарвӕндагӕй — фӕтӕг Кемуел, Шифтаны фырт.

²⁵Зевулоны хӕдзарвӕндагӕй — фӕтӕг Елицафан, Парнахы фырт.

²⁶Иссахары хӕдзарвӕндагӕй — фӕтӕг Палтиел, Аззаны фырт.

²⁷Асиры хӕдзарвӕндагӕй — фӕтӕг Ахиуд, Шеломийы фырт.

²⁸Неффалимы хӕдзарвӕндагӕй — фӕтӕг Педаел, Аммиуды фырт».

²⁹Уыдон — Дунедарӕг Ханааны зӕхх израилӕгты ’хсӕн байуарын кӕмӕн бафӕдзӕхста, уыцы адӕймӕгтӕ.