Read Библи: Сыгъдӕг Нымӕцтӕ 4 Bible Online

Нымӕцтӕ 4 - Библи: Сыгъдӕг bible

Нымӕцтӕ 4

²«Левитты ’хсӕн мыггаггай, хӕдзаргай банымайут, Кехаты байзӕддӕгтӕй

³дӕс ӕмӕ ссӕдз азӕй дӕс ӕмӕ дыууиссӕдз азы онг кӕуыл цӕуы ӕмӕ Фембӕлды Цатыры лӕггадхъом чи у, уыдоны се ’ппӕты дӕр.

⁴Кехаты байзӕддӕгтӕн Фембӕлды Цатыры сӕ бӕрны сты иууылуаз дзауматӕ.

⁵Фӕндагмӕ рӕвдз кӕнгӕйӕ, Аарон йӕ фырттимӕ дуарӕмбӕрзӕн хъуамӕ сиса ӕмӕ дзы Фидыды Чырын ӕрӕмбӕрза,

⁶йӕ уӕлӕ йын хъуамӕ ӕрытауой сӕрак ӕмбӕрзӕн, уый уӕлӕ ӕрӕппарой ӕрвхуыз ӕмбӕрзӕн, стӕй дзы хъилтӕ атъыссой.

⁷Дунедарӕджы раз цы фынг ис, ууыл хъуамӕ ӕрытауой ӕрвхуыз ӕмбӕрзӕн ӕмӕ йыл равӕрой тӕбӕгътӕ, куыситӕ ӕмӕ кӕхцытӕ, стӕй хъалацтӕ сӕнӕн; иудадзыг ыл цы дзултӕ ӕвӕрынц, уыдон ӕдзухдӕр хъуамӕ уой йӕ уӕлӕ.

⁸Ӕрӕмбӕрзӕнт сӕ сырх-сырхид ӕмбӕрзӕнӕй, уый та сӕрак ӕмбӕрзӕнӕй ӕрӕхгӕнӕнт ӕмӕ хъилтӕ ныссадзӕнт.

⁹Ӕрвхуыз ӕмбӕрзӕнӕй ӕрӕмбӕрзӕнт цырагъдарӕн ӕмӕ йӕ цырӕгътӕ, йе ’ртыскӕнтӕ, будсудзӕнтӕ ӕмӕ, йемӕ цы сойы мигӕнӕнтӕ ис, уыдон.

¹⁰Стӕй цырагъдарӕн йе ’ппӕт мигӕнӕнтимӕ ӕрӕхгӕнӕнт сӕрак ӕмбӕрзӕнӕй ӕмӕ йӕ хӕссӕныл сӕвӕрӕнт.

¹¹Сыгъзӕрин нывондхӕссӕныл айтындзӕнт ӕрвхуыз ӕмбӕрзӕн, уый уӕлӕ — сӕрак ӕмбӕрзӕн ӕмӕ хъилтӕ сӕ бынӕтты атъыссӕнт.

¹²Райсӕнт, уазлӕггады кӕмӕй пайда кӕнынц, Уаз Цӕрӕны уыцы мигӕнӕнтӕ иууылдӕр, ӕрвхуыз ӕмбӕрзӕны сӕ батухӕнт, сӕракӕй сӕ ӕрӕмбӕрзӕнт ӕмӕ сӕ афтӕмӕй хӕссӕныл сӕвӕрӕнт.

¹³Нывондхӕссӕн йӕ фӕныкӕй расыгъдӕг кӕнӕнт ӕмӕ йыл сӕнт сырх ӕмбӕрзӕн айтындзӕнт,

¹⁴уый уӕлӕ та ӕрӕвӕрӕнт йе ’ппӕт мигӕнӕнтӕ: зынгхӕссӕн кӕфойтӕ, фыдисӕнтӕ, белтӕ, тугтадзӕн хъалацтӕ. Сӕрак ӕмбӕрзӕнӕй ӕрӕхгӕнӕнт ӕппӕт уыдон ӕмӕ хъилтӕ атъыссӕнт.

¹⁵Фӕндагмӕ уӕхи куы рӕвдз кӕнат, уӕд уал раздӕр Аарон ӕмӕ йӕ фырттӕ Цатыр ӕмӕ йӕ уаз дзауматӕ иууылдӕр ӕрӕмбӕрзӕнт, ӕмӕ сӕм ӕрмӕстдӕр уый фӕстӕ Кехаты фырттӕ хӕссынмӕ бацӕуӕнт: уаз дзауматӕй сын андзӕвӕн ницӕуыл ис, науӕд амӕлдзысты. Фембӕлды Цатыры уаз дзауматӕ хӕссын у Кехаты фыртты хӕс.

¹⁶Сауджын Аароны фырт Елеазары бӕрны сты цырагъдарӕны сой, будусудзӕн хӕрздӕфгӕнӕнтӕ, ӕрвылбоны хойраджы хуын ӕмӕ сӕрдӕн сой. Йӕ бӕрны сты Уаз Цӕрӕн ӕмӕ дзы цыдӕриддӕр ис, уыдон: уаз дзауматӕ ӕмӕ мигӕнӕнтӕ».

¹⁷Дунедарӕг Моисей ӕмӕ Ааронӕн загъта:

¹⁸«Левитты ’хсӕнӕй Кехаты хӕдзарвӕндаг ма бауадзут фесафын.

¹⁹Цӕмӕй удӕгасӕй баззайой ӕмӕ, Рухсмонуатмӕ баввахс уӕвгӕйӕ, ма амӕлой, уый тыххӕй сӕм Аарон ӕмӕ йӕ фырттӕ сӕхӕдӕг хъуамӕ бацӕуой ӕмӕ Кехаты байзӕддагӕй алкӕмӕн дӕр йӕ хӕссинаг йӕ къухмӕ раттой.

²⁰Кехаты байзӕддагӕн нӕдӕр бацӕуӕн, нӕдӕр сӕ цӕсты кӕронӕй бакӕсӕн ис уаз дзауматӕм, науӕд амӕлдзысты».

²¹Дунедарӕг Моисейӕн загъта:

²²«Банымай Гершоны байзӕддӕгты дӕр хӕдзаргай ӕмӕ мыггаггай.

²³Банымай, дӕс ӕмӕ ссӕдз азӕй дӕс ӕмӕ дыууиссӕдз азы онг кӕуыл цӕуы ӕмӕ Фембӕлды Цатыры лӕггадхъом ӕмӕ кусынхъом чи у, уыдоны се ’ппӕты дӕр.

²⁴Мӕнӕ — Гершоны байзӕддӕгты куыст, сӕ бӕрны цы хӕссинаг ис, уый.

²⁵Уыдон хӕссынц: Уаз Цӕрӕны ӕмбӕрзӕнтӕ, Фембӕлды Цатыр, йе ’мбӕрзӕн, йе ’ддаг, сӕракӕй конд, ӕмбӕрзӕн, Цатыры дуарӕмбӕрзӕн,

²⁶кӕрты ӕмбонд-ӕмбӕрзӕнтӕ, Цатыр ӕмӕ нывондхӕссӕны алыварс кӕрты кулдуарӕмбӕрзӕн, сӕ бӕндӕнтӕ ӕмӕ ӕппӕт кусӕнгӕрзтӕ. Семӕ баст алы куыст дӕр уыдонмӕ хауы.

²⁷Аарон ӕмӕ йӕ фырттӕ сын куыд дзурой, афтӕ кусдзысты ӕмӕ сӕ хӕссинаг хӕсдзысты Гершоны байзӕддӕгтӕ. Уыцы хӕссинаг сын сымах сӕ бар кӕнут, ӕмӕ уыдоны бӕрны ис.

²⁸Уый — Гершоны байзӕддӕгты куыст Фембӕлды Цатыры, сауджын Аароны фырт Итамары дӕлбар.

²⁹Мерарийы байзӕддӕгты дӕр мыггаггай, хӕдзаргай банымай.

³⁰Банымай, дӕс ӕмӕ ссӕдз азӕй дӕс ӕмӕ дыууиссӕдз азы онг кӕуыл цӕуы ӕмӕ Фембӕлды Цатыры лӕггадхъом ӕмӕ кусынхъом чи у, уыдоны иууылдӕр.

³¹Фембӕлды Цатыры сӕ бӕрны сты ӕмӕ хӕссынц: Цатыры фӕйнӕджытӕ, хъайвантӕ, цӕджындзтӕ ӕмӕ бындуртӕ,

³²кӕрты алыварс цӕджындзтӕ — сӕ бындуртӕ, сӕ цурчытӕ ӕмӕ сӕ бӕндӕнтимӕ, стӕй ӕппӕт иннӕ мигӕнӕнтӕ. Семӕ баст алы куыст дӕр уыдонмӕ хауы. Уыцы хӕс сын сымах сӕ бар кӕнут, ӕмӕ уыдоны бӕрны ис.

³³Уый — Мерарийы байзӕддӕгты куыст Фембӕлды Цатыры, сауджын Аароны фырт Итамары разамындӕй».

³⁴Банымадтой Моисей, Аарон ӕмӕ дзыллӕйы фӕтӕгтӕ Кехаты байзӕддӕгты хӕдзаргай ӕмӕ мыггаггай,

³⁵дӕс ӕмӕ ссӕдз азӕй дӕс ӕмӕ дыууиссӕдз азы онг кӕуыл цыд ӕмӕ Фембӕлды Цатыры лӕггадхъом ӕмӕ кусынхъом чи уыди, уыдоны се ’ппӕты дӕр.

³⁶Мыггаггай ӕдӕппӕтӕй фыст ӕрцыд дыууӕ мин авдсӕдӕ фӕндзай адӕймаджы.

³⁷Уый — Кехаты байзӕддӕгтӕй Фембӕлды Цатыры чи хъуамӕ лӕггад кодтаид, уыдоны нымӕц. Дунедарӕг Моисейӕн куыд загъта, афтӕ сӕ Моисей ӕмӕ Аарон банымадтой.

³⁸Гершоны байзӕддӕгтӕ, мыггаггай, хӕдзаргай сӕ сфысгӕйӕ,

³⁹дӕс ӕмӕ ссӕдз азӕй дӕс ӕмӕ дыууиссӕдз азы онг кӕуыл цыд ӕмӕ Фембӕлды Цатыры лӕггадхъом ӕмӕ кусынхъом чи уыд, уыдон ӕдӕппӕтӕй,

⁴⁰мыггаггай, хӕдзаргай сӕ банымайгӕйӕ, уыдысты дыууӕ мин ӕхсӕзсӕдӕ ӕртын.

⁴¹Уый — Гершоны байзӕддӕгтӕй Фембӕлды Цатыры чи хъуамӕ лӕггад кодтаид, уыдоны нымӕц. Дунедарӕг Моисейӕн куыд загъта, афтӕ сӕ Моисей ӕмӕ Аарон банымадтой.

⁴²Мерарийы байзӕддӕгтӕ, мыггаггай, хӕдзаргай сӕ сфысгӕйӕ,

⁴³дӕс ӕмӕ ссӕдз азӕй дӕс ӕмӕ дыууиссӕдз азы онг кӕуыл цыд ӕмӕ Фембӕлды Цатыры лӕггадхъом ӕмӕ кусынхъом чи уыд, уыдон ӕдӕппӕтӕй,

⁴⁴мыггаггай, хӕдзаргай сӕ банымайгӕйӕ, уыдысты ӕртӕ мин дыууӕсӕдӕ.

⁴⁵Уый — Мерарийы байзӕддӕгты нымӕц. Дунедарӕг Моисейӕн куыд загъта, афтӕ сӕ Моисей ӕмӕ Аарон банымадтой.

⁴⁶Ӕдӕппӕтӕй та, Моисей ӕмӕ Аарон ӕмӕ Израилы фӕтӕгтӕ мыггаггай ӕмӕ хӕдзаргай кӕй банымадтой, уыцы левиттӕ,

⁴⁷дӕс ӕмӕ ссӕдз азӕй дӕс ӕмӕ дыууиссӕдз азы онг кӕуыл цыд ӕмӕ Фембӕлды Цатыры лӕггадхъом ӕмӕ кусынхъом чи уыд, уыдон иумӕ

⁴⁸уыдысты аст мин фондзсӕдӕ ӕстай.

⁴⁹Дунедарӕг Моисейӕн куыд загъта, афтӕ нымад ӕрцыдысты ӕмӕ дзы алкӕмӕн дӕр сбӕлвырд ис йӕ куыст ӕмӕ йӕ хӕс. Дунедарӕг Моисейӕн куыд бафӕдзӕхста, алцыдӕр афтӕ бакодтой.