Read Библи: Сыгъдӕг Аггей 2 Bible Online

Аггей 2 - Библи: Сыгъдӕг bible

Аггей 2

¹Ӕвдӕм мӕйы дыууын фыццӕгӕм бон Дунедарӕг раргом ис пехуымпар Аггеймӕ, ӕмӕ Йӕ ныхас уыд:

²«Шеалтиелы фырт Зоровавелӕн, Иудейы бӕстыхицауӕн, стӕй Иоцадакы фырт Йешуайӕн, алчерӕн, ӕмӕ адӕмӕн афтӕ зӕгъ:

³„Ацы Кувӕндон уӕ йӕ раздӕры кады исчи ӕрӕййӕфта? Ныр та йӕ цы уавӕры уынут? Бынтон ницы нӕу уӕ цӕсты?

⁴Фӕлӕ фидар лӕуу, Зоровавел! — зӕгъы Дунедарӕг. — Фидар лӕуу, алчер Йешуа, Иоцадакы фырт! Бӕстӕйы адӕм, фидар лӕуут уе ’ппӕт дӕр ӕмӕ уӕ куыст кӕнут, уымӕн ӕмӕ Ӕз уемӕ дӕн, — зӕгъы Уӕларвӕфсады Бардарӕг, —

⁵Мысырӕй куы рацыдыстут, уӕд уемӕ кӕй сарӕзтон, уыцы фидыдмӕ гӕсгӕ. Мӕ Уд уе ’хсӕн ис. Ма тӕрсут!“

⁶Уӕларвӕфсады Бардарӕг афтӕ зӕгъы: рӕхджы ма Ӕз ноджы иу хатт нынкъусдзынӕн арв ӕмӕ зӕхх, денджыз ӕмӕ сурзӕхх.

⁷Ӕз ӕппӕт адӕмты ныууигъдзынӕн, ӕмӕ сӕ хӕзнатӕ иууылдӕр ардӕм ӕрбакӕлдзысты, ацы Хӕдзар байдзаг кӕндзынӕн кадӕй.

⁸Ӕвзист дӕр ӕмӕ сыгъзӕрин дӕр Мӕн сты, — зӕгъы Уӕларвӕфсады Бардарӕг.

⁹Ацы Кувӕндон, йӕ размӕ цы хӕдзар уыди, уымӕй кадджындӕр уыдзӕн, ӕмӕ Ӕз ацы бынат фарнӕй схайджын кӕндзынӕн, — зӕгъы Уӕларвӕфсады Бардарӕг!»

¹⁰Дарийы паддзахдзинадыл дыккаг аз куы цыди, уыцы заман, фарӕстӕм мӕйы дыууын цыппӕрӕм бон, Дунедарӕг пехуымпар Аггеймӕ раргом ис:

¹¹«Уӕларвӕфсады Бардарӕг афтӕ зӕгъы: бафӕрс-ма сауджынты мӕнӕ ахӕм хабарӕй.

¹²Зӕгъӕм, исчи кувӕггаг дзидза йӕ фӕччийы фӕхӕссы, ӕмӕ дзул, хъӕрмхуыпп, сӕн, сой кӕнӕ ӕндӕр исты хӕринагыл йӕ фӕччийӕ андзӕвыд, уӕд уыцы хӕринаг дӕр уаз суыдзӕн?» Сауджынтӕ йын дзуапп радтой: «Нӕ, не суыдзӕн».

¹³Уӕд та сӕ Аггей бафарста: «Мардыл бандзӕвынӕй чи фӕчъизи ис, ахӕм адӕймаг уыдонӕй истӕуыл куы андзӕва, уӕд хӕринаг фӕчъизи уыдзӕн?» Сауджынтӕ йын дзуапп радтой: «О, фӕчъизи уыдзӕн».

¹⁴Ӕмӕ сын уӕд Аггей загъта: «Уӕдӕ ацы адӕм дӕр фӕчъизи сты Мӕ цӕсты, — зӕгъы Дунедарӕг, — стӕй се ’ппӕт хъуыддӕгтӕ ӕмӕ, семӕ цы ’рбахӕссынц, уыдон дӕр.

¹⁵Кӕсут-иу, амӕй фӕстӕмӕ цы уыдзӕни, уымӕ. Дунедарӕджы Кувӕндоны дур дурыл ӕвӕрд куы нӕма ’рцыди,

¹⁶уӕд уӕ хъуыддӕгтӕ куыд цыдысты? Ссӕдз бӕрцуаты кӕм уыди, уыцы кӕримӕ-иу куы бацыдыстут, уӕд-иу дзы разынди дӕс; сӕндуцӕнмӕ-иу куы бацыдыстут, дӕс ӕмӕ дыууиссӕдз бӕрцуаты сӕн сӕвгӕнон, зӕгъгӕ, уӕд-иу дзы разынди ссӕдз.

¹⁷Ӕз-иу уын уӕ къухты фӕллӕйттыл хус дымгӕ рауагътон, хъуына-иу сыл схӕцын кодтон, ихӕй-иу сӕ ныххостон, фӕлӕ Мӕм сымах уӕддӕр уе ’ргом не здӕхтат, — зӕгъы Дунедарӕг.

¹⁸Ӕрымысут-ма ӕрӕджыйы заман — фарӕстӕм мӕйы дыууын цыппӕрӕм бонӕй абоны онг, Дунедарӕджы Кувӕндонӕн йӕ бындур ӕвӕрд куы ’рцыд, уӕдӕй нырмӕ цы рӕстӕг рацыди, уый. Ӕркӕсут лӕмбынӕг!

¹⁹Уӕ хордӕтты ма хоры мыггаг баззади? Сӕнӕфсиры талатӕ, гранат, легъуи ӕмӕ оливӕ бӕлӕстӕ абоны онг дыргъ нӕма радтой. Фӕлӕ сыл нырӕй фӕстӕмӕ Ӕз Мӕ арфӕ уадздзынӕн».

²⁰Фарӕстӕм мӕйы дыууын цыппӕрӕм бон Дунедарӕг дыккаг хатт Аггейӕн Йӕ ныхас фехъусын кодта:

²¹— Зӕгъ Зоровавелӕн, Иудейы бӕстыхицауӕн: Ӕз арв ӕмӕ зӕхх нынкъуысын кӕндзынӕн,

²²паддзӕхтӕн сӕ паддзахы бадӕнтӕ дӕлӕмӕ раппардзынӕн, ӕцӕгӕлӕтты паддзахӕдтӕн сӕ хъару басӕтдзынӕн, хӕстон уӕрдӕттӕ ӕд хӕстонтӕ сфӕлдахдзынӕн, бӕхтӕ ӕмӕ сӕ барджытӕ цагъды фӕуыдзысты, кӕрдтӕ кӕрӕдзимӕ сисдзысты бӕхджынтӕ.

²³Ӕмӕ уыцы бон ды, Шеалтиелы фырт Зоровавел, Иудейы бӕстыхицау, Мӕ лӕггадгӕнӕг, Мӕнӕн суыдзынӕ Мӕ мыхуырӕвӕрӕн къухдарӕны хуызӕн, уымӕн ӕмӕ дӕ Ӕз сӕвзӕрстон, — зӕгъы Уӕларвӕфсады Бардарӕг.