Read Библи: Сыгъдӕг Захариа 6 Bible Online

Захариа 6 - Библи: Сыгъдӕг bible

Захариа 6

¹Хӕрдмӕ та скастӕн ӕмӕ федтон: мӕнӕ комӕй, дыууӕ ӕрхуы хохы астӕуӕй, рацӕуынц цыппар уӕрдоны.

²Фыццаг уӕрдоны ифтыгъд уыдысты сырх бӕхтӕ, дыккаджы — саутӕ,

³ӕртыккаджы — урсытӕ, цыппӕрӕмы — хъулӕттӕ, тӕппытимӕ.

⁴Ӕз, мемӕ чи дзырдта, уыцы зӕды бафарстон: «Ме ’лдар, цы сты уыдон?»

⁵Зӕд мын дзуапп радта: «Уыдон сты цыппар уӕларвон дымгӕйы, ӕгас зӕххы Бардарӕджы разӕй рацӕуынц.

⁶Сау бӕхтӕ ацӕудзысты цӕгатмӕ, урсытӕ — ныгуылӕнмӕ, хъулӕттӕ та — хуссармӕ».

⁷Ӕрбаввахс сты хъомысджын бӕхтӕ, зӕххыл ӕрзилынмӕ уыдысты цӕттӕ. Зӕд сын загъта: «Цӕугӕут ӕмӕ зӕххыл ӕрзилут». Ӕмӕ зӕххыл ӕрзилынмӕ ацыдысты.

⁸Уый та мӕм фӕдзырдта ӕмӕ загъта: «Кӕс-ма: цӕгатмӕ цы бӕхтӕ ацыдысты, уыдон Мын цӕгатаг зӕххы Мӕ Уд басабыр кодтой».

⁹Дунедарӕг мын загъта:

¹⁰«Уацарӕй чи раздӕхти, уыдонӕй — Хелдай, Товиа ӕмӕ Иедаийӕ — мысайнӕгтӕ райс ӕмӕ уайтагъд ацу Софониайы фырт Йосиайы хӕдзармӕ, уыдон уырдӕм ӕрбацыдысты Вавилонӕй.

¹¹Ӕвзист ӕмӕ сӕ сыгъзӕрин райс, сараз кады худ ӕмӕ йӕ ’ркӕн стыр алчер Йешуайы сӕрыл, Иоцадакы фыртыл.

¹²Зӕгъ ын: Уӕларвӕфсады Бардарӕг афтӕ зӕгъы: мӕнӕ, Йӕ ном Ӕвзар кӕмӕн у, Уый, куы сырӕза, уӕд Дунедарӕджы Кувӕндон сараздзӕн.

¹³Уый Дунедарӕджы Кувӕндон сараздзӕн ӕмӕ айсдзӕн Йӕ кад, Йӕ паддзахы бадӕны ӕрбаддзӕнис ӕмӕ хицауиуӕг кӕндзӕн. Сауджын та ӕрбаддзӕнис йӕхи бынаты, ӕмӕ кӕрӕдзиимӕ цӕрдзысты фидыдӕй.

¹⁴Кадыхуд баззайдзӕни Дунедарӕджы Кувӕндоны, Хелем, Товиа, Иедаи ӕмӕ Софониайы фырт Хены сгуыхтдзинад зӕрдыл дарынӕн.

¹⁵Адӕм дард рӕттӕй ӕрбацӕудзысты ӕмӕ Дунедарӕджы Кувӕндон аразыны хъуыддаджы архайдзысты. Ӕмӕ базондзыстут, сымахмӕ мӕ Уӕларвӕфсады Бардарӕг кӕй рарвыста, уый. Уыдӕттӕ ӕрцӕудзысты, уӕ Дунедарӕг Хуыцаумӕ зӕрдиагӕй куы хъусат, уӕд».