Read Библи: Сыгъдӕг Захариа 8 Bible Online

Захариа 8 - Библи: Сыгъдӕг bible

Захариа 8

¹Уӕларвӕфсады Бардарӕг мын загъта:

²Афтӕ зӕгъы Уӕларвӕфсады Бардарӕг: «Сионмӕ Мӕ зӕрдӕ ’хсайы, Мӕ зӕрдӕхсайд пиллон артау судзы.

³Дунедарӕг афтӕ зӕгъы: Ӕз Ме ’ргом раздахдзынӕн Сионмӕ, ӕрцӕрдзынӕн Йерусалимы, схондзысты йӕ рӕстдзинады сахар, Уӕларвӕфсады Бардарӕджы хох та — уаз хох.

⁴Уӕларвӕфсады Бардарӕг афтӕ зӕгъы: зӕронд лӕгтӕ ӕмӕ зӕронд устытӕ ногӕй сӕ лӕдзджыты ’нцой Йерусалимы фӕзты баддзысты;

⁵сахары уынгтӕ байдзаг уыдзысты лӕппутӕ ӕмӕ чызджытӕй, уынгты хъаздзысты.

⁶Уӕларвӕфсады Бардарӕг афтӕ зӕгъы: Мӕ адӕмӕй ма чи аирвӕзт, уыдон абон ацы ныхӕстӕ, ӕрцӕуӕн кӕмӕн нӕй, ахӕм хъуыддагыл нымайынц, фӕлӕ Мӕнӕн Мӕ бон саразын цы нӕу? — зӕгъы Уӕларвӕфсады Бардарӕг.

⁷Уӕларвӕфсады Бардарӕг афтӕ зӕгъы: Ӕз фервӕзын кӕндзынӕн Мӕ адӕмы скӕсӕн ӕмӕ ныгуылӕны бӕстӕтӕй,

⁸ӕрбакӕндзынӕн сӕ, ӕмӕ цӕрдзысты Йерусалимы. Уыдон уыдзысты Мӕ адӕм, Ӕз та сын уыдзынӕн иузӕрдион ӕмӕ раст Хуыцау.

⁹Уӕларвӕфсады Бардарӕг афтӕ зӕгъы: Уӕларвӕфсады Бардарӕгӕн Йӕ Кувӕндоны бындур ӕвӕрд цы бон ӕрцыд, аразын ӕй куы райдыдтой, уыцы бон пехуымпартӕй ацы ныхӕстӕ чи хъусы, уыдонӕн сӕ ныфс ма фӕцудӕд!

¹⁰Ныронг нӕдӕр фос, нӕдӕр адӕймаджы куыстӕн фидын никӕй бон уыди, алы цӕуӕджы алырдыгӕй хъахъхъӕдтой знӕгтӕ, уымӕн ӕмӕ Ӕз адӕмы кӕрӕдзимӕ сфыдӕх кодтон.

¹¹Фӕлӕ нырӕй фӕстӕмӕ Ӕз, Мӕ адӕмӕй ма чи аирвӕзт, уыдонмӕ раздӕры цӕстӕй нал кӕсдзынӕн, — зӕгъы Уӕларвӕфсады Бардарӕг. —

¹²Сабырӕй байтаудзысты сӕ хуымтӕ, сӕнӕфсиры талайыл гагатӕ равзӕрдзӕн, зӕхх тыллӕг ратдзӕнис, арвӕй ӕртӕх ӕрызгъӕлдзӕн. Ӕмӕ уыдӕттӕ Ӕз иууылдӕр, Мӕ адӕмӕй ма чи аирвӕзт, уыдонӕн ратдзынӕн исбонӕн.

¹³Иудӕ ӕмӕ Израилы адӕм! Сымах ӕппӕт адӕмты ’хсӕн ӕлгъыстаг уыдыстут, фӕлӕ уӕ Ӕз фервӕзын кӕндзынӕн, ӕмӕ суыдзыстут арфӕгонд. Ма тӕрсут! Уӕ ныфс ма фӕцудӕд!»

¹⁴Уӕларвӕфсады Бардарӕг афтӕ зӕгъы: уӕ фыдӕлтӕ Мӕ куы мӕсты кодтой, уӕд уӕ бафхӕрын сфӕнд кодтон ӕмӕ Мӕ фӕнд нӕ аивтон, — зӕгъы Уӕларвӕфсады Бардарӕг. —

¹⁵Фӕлӕ ныр та Йерусалим ӕмӕ Иудӕйы хӕдзарӕн Мӕ зӕрды ис хорздзинад ракӕнын. Ма тӕрсут.

¹⁶Мӕнӕ уын, цы хъуамӕ кӕнат, уыдӕттӕ: уӕ кӕрӕдзийӕн дзурут рӕстдзинад; тӕрхондоны тырнут рӕстдзинад ӕмӕ сабырдзинадмӕ;

¹⁷йӕ хионы ныхмӕ фыдвӕндтӕ мачи аразӕд; мӕнг сомытӕй уӕхи хизут, уымӕн ӕмӕ Мын уыдӕттӕ ӕнӕуынон сты, — зӕгъы Дунедарӕг.

¹⁸Уӕларвӕфсады Бардарӕг мын загъта:

¹⁹— Афтӕ зӕгъы Уӕларвӕфсады Бардарӕг: цыппӕрӕм ӕмӕ фӕндзӕм мӕйты, стӕй ӕвдӕм ӕмӕ дӕсӕм мӕйты цы комдарӕн бонтӕ ис, уыдон Иудӕйы хӕдзарӕн хъӕлдзӕг бӕрӕгбӕттӕ фестдзысты, ӕрмӕст рӕстдзинад ӕмӕ сабырдзинад уарзут.

²⁰Уӕларвӕфсады Бардарӕг зӕгъы: ӕрбацӕудзысты бирӕ адӕмтӕ ӕмӕ бирӕ сахарты цӕрджытӕ.

²¹Иу сахары цӕрджытӕ иннӕмӕ цӕудзысты ӕмӕ дзурдзысты: «Цомут ӕмӕ Дунедарӕгмӕ бакувӕм, Уӕларвӕфсады Бардарӕджы ӕрцагурӕм». Ӕмӕ фехъусдзысты ахӕм дзуапп: «Ӕз дӕр уемӕ! Цӕуын ӕз дӕр!»

²²Ӕмӕ Йерусалиммӕ бирӕ знӕмтӕ ӕмӕ хъомысджын адӕмтӕ ’рбацӕудзысты, цӕмӕй Уӕларвӕфсады Бардарӕджы ӕрцагурой Йерусалимы ӕмӕ Дунедарӕгмӕ скувой.

²³Уӕларвӕфсады Бардарӕг зӕгъы: уыцы заман алы ӕвзӕгтӕй ӕмӕ алы адӕмтӕй дӕс адӕймаджы иу иудейаджы фӕччийыл ныххӕцдзысты ӕмӕ дзурдзысты: «Мах цӕуӕм уемӕ, уымӕн ӕмӕ фехъуыстам, Хуыцау уемӕ кӕй ис, уый».