Read Библи: Сыгъдӕг Матфей 1 Bible Online

Матфей 1 - Библи: Сыгъдӕг bible

Матфей 1

¹Мӕнӕ Йесо Чырыстийы — Авраам ӕмӕ Давиды байзӕддаджы — хӕдзарвӕндаг.

²Авраамӕй райгуырд Исаак, Исаакӕй — Йаков, Йаковӕй — Иудӕ ӕмӕ йе ’фсымӕртӕ;

³Иудӕйӕн Тамарӕй райгуырдысты Парец ӕмӕ Зарах. Парецӕй райгуырд Есром, Есромӕй — Арам;

⁴Арамӕй райгуырд Аминадав, Аминадавӕй — Нахшон; Нахшонӕй — Салмон;

⁵Салмонӕн Рахавӕй райгуырд Боаз, Боазӕн Руфӕй — Овед, Оведӕй райгуырд Йессей;

⁶Йессейӕ райгуырди паддзах Давид, Давидӕн Уриайы усӕй — Соломон;

⁷Соломонӕй райгуырди Роховам, Роховамӕй — Авийа; Авийайӕ — Асаф;

⁸Асафӕй райгуырд Иосафат, Иосафатӕй — Иорам; Иорамӕй — Озиа;

⁹Озиайӕ райгуырд Йотам, Йотамӕй — Ахаз; Ахазӕй — Езекиа;

¹⁰Езекиайӕ райгуырди Менассиа, Менассиайӕ — Амон, Амонӕй — Иосиа;

¹¹Иосиайӕ райгуырдысты Йехониа ӕмӕ йе ’фсымӕртӕ. Уый уыдис Вавилоны размӕ.

¹²Вавилоны фӕстӕ Йехониайӕ райгуырди Шеалтиел, Шеалтиелӕй — Зоровавел;

¹³Зоровавелӕй райгуырд Авиуд, Авиудӕй — Елиаким, Елиакимӕй — Азор;

¹⁴Азорӕй райгуырди Цадок; Цадокӕй — Ахим, Ахимӕй — Элиуд;

¹⁵Элиудӕй райгуырд Елеазар; Елеазарӕй — Матфан, Матфанӕй — Йаков;

¹⁶Йаковӕй райгуырди Мариайы мой Йосиф; Мариа ныййардта, Чырысти Кӕй хонынц, уыцы Йесойы.

¹⁷Уӕдӕ Авраамӕй Давиды онг ӕдӕппӕтӕй уыди цыппӕрдӕс фӕлтӕры; Давидӕй Вавилонмӕ хаст ӕрцӕуыны онг дӕр — цыппӕрдӕс фӕлтӕры; ӕмӕ Вавилоны заманӕй Чырыстийы онг дӕр — цыппӕрдӕс фӕлтӕры.

¹⁸Йесо Чырыстийы райгуырд уыдис афтӕ. Йӕ мад Мариа ма куырдуаты бадти, Йосифимӕ нӕма баиу сты, афтӕмӕй рабӕрӕг ис, Мариа Сыгъдӕг Уды хъомысӕй ӕнхъӕлцау кӕй у, уый.

¹⁹Йӕ мойаг Йосифы, раст адӕймаг куыд уыди, уымӕ гӕсгӕ нӕ фӕндыди Мариайы адӕмы цӕсты бафтауын ӕмӕ хъавыди, се ’хсӕн цы фидыд уыд, уый ӕнӕ иу ӕвдисӕнӕй фехалын.

²⁰Ахӕм хъуыды йӕм куы сӕвзӕрди, уӕд ӕм фыны Хуыцауы зӕд раргом ис ӕмӕ йын загъта: «Давиды байзӕддаг Йосиф! Ма тӕрс дӕ усаг Мариайы хӕдзармӕ ӕрхонынӕй, уымӕн ӕмӕ, йӕ зӕрдӕйы бын кӕй хӕссы, Уый йын Сыгъдӕг Удӕй у.

²¹Ныййардзӕни дын Фырт ӕмӕ Йӕ схондзынӕ Йесо, уымӕн ӕмӕ Уый Йӕ адӕмы сӕ тӕригъӕдтӕй фервӕзын кӕндзӕн»[1].

²²Ӕппӕт уыдӕттӕ ӕрцыдысты, цӕмӕй сӕххӕст уа, Хуыцау пехуымпары дзыхӕй цы фехъусын кодта, уый:

²³«Чызг банхъӕлцау уыдзӕн ӕмӕ ныййардзӕн Фырт, схондзысты Йӕ Эммануил», ома «Хуыцау немӕ ис».

²⁴Йосиф куы райхъал ис, уӕд, Хуыцауы зӕд ын куыд бафӕдзӕхста, афтӕ бакодта — Мариайы йӕхицӕн усӕн ӕрхуыдта.

²⁵Ӕмӕ йӕм ӕмгӕрон не ’рцыд, афтӕмӕй Мариа ныййардта Фырт, ӕмӕ Йӕ Йосиф схуыдта Йесо.