Read Библи: Сыгъдӕг Матфей 11 Bible Online

Матфей 11 - Библи: Сыгъдӕг bible

Матфей 11

¹Йӕ дыууадӕс ахуыргӕнинагӕн уыдӕттӕ бафӕдзӕхсыны фӕстӕ Йесо уырдыгӕй ацыди, цӕмӕй иннӕ сахарты дӕр адӕмӕн амона ӕмӕ сын Фарны Уац хъусын кӕна.

²Иоанн ахӕстоны, Чырысти цы хъуыддӕгтӕ аразы, уыдоны кой куы фехъуыста, уӕд Ӕм йӕ ахуыргӕнинӕгты арвыста бафӕрсынмӕ:

³«Ӕрцӕуинаг Чи у, Уый Ды дӕ, ӕви ӕндӕрмӕ ӕнхъӕлмӕ кӕсӕм?»

⁴Йесо сын дзуапп радта: «Цӕут ӕмӕ зӕгъут Иоаннӕн, цы хъусут ӕмӕ цы уынут, уый:

⁵куырмытӕ райдыдтой уынын, цӕнкуылтӕ — цӕуын, хъотырджынтӕн сӕ низ сӕфы, къуырматӕ хъусынц, мӕрдтӕ ӕгас кӕнынц, мӕгуыртӕ хъусынц Фарны Уац.

⁶Ӕмӕ тӕхудиаг у, Мӕныл гуырысхо чи нӕ кӕны, уый».

⁷Уыдон куы ацыдысты, уӕд Йесо райдыдта адӕмӕн Иоанны тыххӕй дзурын: «Цы уынынмӕ цыдыстут ӕдзӕрӕг быдырмӕ? Дымгӕ кӕй ӕнкъусы, уыцы хъӕз?

⁸Уӕддӕр цы уынынмӕ цыдыстут? Зынаргъ дарӕс кӕуыл ис, ахӕм адӕймаджы? О, фӕлӕ зынаргъ дарӕс чи дары, уыдон паддзӕхты галуанты цӕрынц.

⁹Уӕдӕ сымах уӕддӕр цы уынынмӕ цыдыстут? Пехуымпары? О, зӕгъын уын, уый пехуымпарӕй уӕлдӕр у.

¹⁰Иоанн у, афтӕ кӕй тыххӕй фыст ис: „Мӕнӕ Ӕз Мӕ фидиуӕджы ӕрвитын Дӕ разӕй, ӕмӕ Дын уый ӕрцӕттӕ кӕндзӕни Дӕ развӕндаг“.

¹¹Ӕцӕг уын зӕгъын: сылгоймагӕй чи райгуырд, уыдонӕй Аргъауӕг Иоаннӕй стырдӕр нӕ уыди, фӕлӕ, Уӕларвон Паддзахады тӕккӕ къаддӕр чи у, уый дӕр Иоаннӕй стырдӕр у.

¹²Аргъауӕг Иоанны заманӕй фӕстӕмӕ Уӕларвон Паддзахад райсыныл хъӕуы ӕппӕт хъарутӕ бахардз кӕнын, ӕмӕ, чи архайы, уыдон ӕй райсынц[6].

¹³Ӕгъдау ӕмӕ пехуымпартӕ се ’ппӕт дӕр Уӕларвон Паддзахады кой кодтой Иоанны размӕ.

¹⁴Ӕмӕ уӕ кӕд зонын фӕнды, уӕд Иоанн, ӕрцӕуинаг чи уыди, уыцы Илийа у.

¹⁵Хъустӕ кӕуыл ис, уый хъусӕд!

¹⁶Фӕлӕ куыд рахонӕн ис ацы фӕлтӕры? Уыдон сывӕллӕтты хуызӕн сты, сахары фӕзы чи бады ӕмӕ се ’мбӕлттӕн афтӕ чи дзуры:

¹⁷„Мах уын уадындзӕй цагътам, ӕмӕ сымах нӕ кафыдыстут; мах уын хъарджытӕ кодтам, ӕмӕ сымах нӕ дзынӕзтат“.

¹⁸Ӕрцыдис Иоанн, нӕдӕр хӕргӕ кӕны, нӕдӕр нуазгӕ, ӕмӕ дзы уыдон зӕгъынц: „Хӕйрӕджджын у“.

¹⁹Ӕрцыдис Адӕймаджы Фырт, хӕры ӕмӕ нуазы, ӕмӕ Дзы уыдон зӕгъынц: „Мӕнӕ гуыбындзӕл ӕмӕ расыггӕнаг, хъалонисджытӕ ӕмӕ тӕригъӕдджынты лымӕн“. Фӕлӕ Хуыцауы Уӕлзонд цы хъуыддӕгтӕ аразы, уыдон сты Йӕ растгӕнӕг».

²⁰Уый фӕстӕ Йесо уайдзӕф кӕнын райдыдта, фылдӕр диссӕгтӕ кӕм равдыста, фӕлӕ уӕддӕр чи не ’рфӕсмон кодта, уыцы сахартӕн:

²¹«Сар дӕ сӕр, Хоразин! Сар дӕ сӕр, Вифсаидӕ! Сымах цы диссӕгтӕ федтат, уыдон Тир ӕмӕ Сидоны куы равдыстӕуыдаид, уӕд уымы цӕрджытӕ, сӕ уӕлӕ сӕхъис скӕнгӕйӕ ӕмӕ сӕ сӕртыл фӕнык байзӕргӕйӕ, раджы ӕрфӕсмон кодтаиккой.

²²Уӕдӕ уын зӕгъын: Тӕрхоны Бон Тир ӕмӕ Сидонӕн сымахӕй ӕнцондӕр уыдзӕн.

²³Науӕд ды, Капернаум, афтӕ ӕнхъӕл дӕ, ӕмӕ дӕ арвмӕ сисдзысты? Нӕ, дӕлзӕхмӕ ныххаудзынӕ, уымӕн ӕмӕ, ды цы диссӕгтӕ федтай, уыдон Содомы куы равдыстӕуыдаид, уӕд ма уый абон дӕр ма йӕ бынаты лӕууид.

²⁴Уӕдӕ уын зӕгъын: Тӕрхоны Бон Содомы зӕххӕн дӕуӕй ӕнцондӕр уыдзӕни».

²⁵Йесо ма ноджы загъта: «Стауын Дӕ, Мӕ Фыд, арв ӕмӕ зӕххы Хицау, Ды адӕттӕ зондджынтӕ ӕмӕ ӕмбаргӕтӕй кӕй басусӕг кодтай ӕмӕ сӕ сабитӕн кӕй раргом кодтай, уый тыххӕй.

²⁶О Мӕ Фыд! Дӕу афтӕ бафӕндыди.

²⁷Мӕ Фыдӕй Мын лӕвӕрд у ӕппӕт дӕр, ӕмӕ Фыды йеддӕмӕ Фырты ничи зоны, стӕй Фыды дӕр ничи зоны — зоны Йӕ ӕрмӕстдӕр Фырт ӕмӕ, Уый Йӕ Фыды раргом кӕнын кӕмӕн фӕнды, уыдон.

²⁸Ӕрцӕут Мӕм, йӕ уӕззау уаргъӕй чи сфӕлмӕцыд, уыдон, ӕмӕ уын Ӕз ратдзынӕн ӕнцой.

²⁹Сӕвӕрут уӕ уӕлӕ Ме ’фсондз ӕмӕ сахуыр ут Мӕнау фӕлмӕн ӕмӕ сӕрныллӕг уӕвын, ӕмӕ уӕд удӕнцой ссардзыстут.

³⁰Уымӕн ӕмӕ ӕнцон хӕссӕн у Ме ’фсондз, ӕмӕ рог у Мӕ уаргъ».