Read Библи: Сыгъдӕг Матфей 25 Bible Online

Матфей 25 - Библи: Сыгъдӕг bible

Матфей 25

¹Уӕд Уӕларвон Паддзахад уыдзӕни, сиахсаджы размӕ цырӕгътимӕ чи рацыди, уыцы дӕс чызджы хуызӕн.

²Уыдонӕй фондз зондджынтӕ уыдысты, фондз та — ӕнӕзӕндтӕ.

³Ӕнӕзонд чызджытӕ сӕ цырӕгътӕ рахастой, фӕлӕ семӕ сой нӕ райстой.

⁴Зондджынтӕ та сӕ цырӕгътимӕ сойы дурынтӕ дӕр рахастой.

⁵Сиахсаг афӕстиат ис, ӕмӕ чызджыты хуыссӕг ӕрцахста, се ’ппӕт дӕр бафынӕй сты.

⁶Ӕмбисӕхсӕв райхъуысти хъӕр: „Сиахсаг ӕрбацӕуы, йӕ размӕ рацӕут!“

⁷Чызджытӕ иууылдӕр фестадысты ӕмӕ сӕ цырӕгътӕ ӕрцӕттӕ кодтой.

⁸Ӕнӕзонд чызджытӕ зондджынтӕм бадзырдтой: „Авӕрут-ма нын уӕ сойӕ, науӕд нӕ цырӕгътӕ фӕхуыссынц“.

⁹Зондджынтӕ сын дзуапп радтой: „Цӕмӕй нӕ дыууӕтӕ дӕр сойхъуагӕй ма баззайӕм, уый тыххӕй фӕлтау уӕйгӕнджытӕм ауайут ӕмӕ балхӕнут уӕхицӕн“.

¹⁰Фӕлӕ куыддӕр ӕлхӕнынмӕ ацыдысты, афтӕ сиахсаг ӕрбахӕццӕ ис, ӕмӕ цӕттӕ цы чызджытӕ уыдысты, уыдон йемӕ бацыдысты чындзӕхсӕвмӕ, ӕмӕ дуар ӕхгӕд ӕрцыди.

¹¹Уӕдмӕ иннӕ чызджытӕ дӕр ӕрбаздӕхтысты ӕмӕ хъӕр кӕнын райдыдтой: „Хицау, Хицау, дуар нын бакӕн!“

¹²Фӕлӕ сын уый дзуапп радта: „Ӕцӕг уын зӕгъын: ӕз, чи стут, уый нӕ зонын“.

¹³Уӕдӕ ӕдзухдӕр уӕхи цӕттӕ дарут, уымӕн ӕмӕ нӕ зонут нӕдӕр уыцы бон, нӕдӕр уыцы сахат [Адӕймаджы Фырт кӕд ӕрцӕудзӕни].

¹⁴Уӕд уыдзӕнис уыцы ӕмбисондау: иу адӕймаг балцы ацӕуыны размӕ йӕ цагъартӕм фӕсидти ӕмӕ сын йӕ исбон бафӕдзӕхста.

¹⁵Сӕ иуӕн радта фондз таланты, иннӕмӕн — дыууӕ, ӕртыккагӕн — иу, алкӕмӕн дӕр — йӕ арӕхстдзинадмӕ гӕсгӕ, ӕмӕ ацыди.

¹⁶Фондз таланты чи райста, уый уайтагъд ацыд, спайда сӕ кодта ӕмӕ ма сӕ ноджы фондз таланты бакуыста.

¹⁷Дыууӕ таланты чи райста, уый дӕр ма бакуыста дыууӕ таланты.

¹⁸Иу талант чи райста, уый та ацыди, уӕрм скъахта ӕмӕ дзы йӕ хицауы ӕвзист баныгӕдта.

¹⁹Бирӕ рӕстӕджы фӕстӕ ӕрыздӕхти уыцы цагъарты хицау ӕмӕ сӕ дзуапп ӕрдомдта.

²⁰Фондз таланты чи райста, уый бацыд, бахаста йӕм иннӕ фондз таланты ӕмӕ загъта: „Хицау, ды мын радтай фондз таланты, ӕз сӕ спайда кодтон ӕмӕ ма сӕм мӕнӕ фондз таланты бафтыдтон“.

²¹Йӕ хицау ын загъта: „Хорз, ды дзӕбӕх ӕмӕ иузӕрдион цагъар дӕ! Гыццыл хъуыддаджы иузӕрдион уыдтӕ, ӕмӕ дын ӕз стырдӕр хъуыддаг бабар кӕндзынӕн. Рацу мидӕмӕ ӕмӕ цин кӕн дӕ хицауимӕ“.

²²Дыууӕ таланты чи райста, уый дӕр ӕм бацыд ӕмӕ йын загъта: „Хицау, ды мын радтай дыууӕ таланты, ӕз сӕ спайда кодтон ӕмӕ ма сӕм ноджы бафтыдтон дыууӕ таланты“.

²³Йӕ хицау ын загъта: „Хорз, мӕ дзӕбӕх ӕмӕ иузӕрдион цагъар! Гыццыл хъуыддаджы иузӕрдион уыдтӕ, ӕмӕ дын ӕз стырдӕр хъуыддаг бабар кӕндзынӕн. Рацу мидӕмӕ ӕмӕ цин кӕн дӕ хицауимӕ“.

²⁴Иу талант чи райста, уый дӕр бацыд ӕмӕ йын загъта: „Хицау, ӕз зыдтон, ды карз лӕг кӕй дӕ, уый. Кӕм нӕ байтыдтай, уым кӕрдыс, кӕм нӕ райдзӕгътай, уым ӕмбырд кӕныс.

²⁵Ӕз тарстӕн, ацыдтӕн ӕмӕ дын дӕ талант баныгӕдтон зӕххы. Мӕнӕ айс дӕхион“.

²⁶Йӕ хицау ын загъта: „Ӕвзӕр ӕмӕ зивӕггӕнаг цагъар! Кӕм нӕ байтыдтон, уым кӕй кӕрдын ӕмӕ, кӕм нӕ райдзӕгътон, уым кӕй ӕмбырд кӕнын, уый кӕд зыдтай,

²⁷уӕд дын ӕмбӕлди ме ’взист сӕудӕджертӕм раттын, ӕмӕ уӕд, куы ӕрыздӕхтӕн, уӕд ӕй ӕфтиагимӕ райстаин.

²⁸Райсут ын уӕдӕ йӕ талант ӕмӕ йӕ, дӕс таланты кӕмӕ ис, уымӕн раттут.

²⁹Уымӕн ӕмӕ, кӕмӕ ис, уымӕн рардӕуыдзӕн ӕмӕ йӕм уыдзӕни бирӕ; кӕмӕ нӕй, уымӕй та ист ӕрцӕудзӕни, цы йӕм ис, уый дӕр.

³⁰Ацы ницӕйаг цагъары та аппарут ӕддӕмӕ, талынгмӕ: кӕуын ӕмӕ дӕндӕгты хъыс-хъыс кӕцӕй хъуысдзӕни, уырдӕм“». [Уыцы ныхӕсты фӕстӕ Йесо хъӕрӕй загъта: «Хъустӕ кӕуыл ис, уый хъусӕд!»]

³¹«Адӕймаджы Фырт ӕппӕт зӕдтимӕ Йӕ кадимӕ куы ’рцӕуа, уӕд сбаддзӕнис Йӕ кадджын бынаты.

³²Йӕ разы ӕрӕмбырд уыдзысты ӕппӕт адӕмтӕ, ӕмӕ иуты фӕхицӕн кӕндзӕн иннӕтӕй, фыййау фысты сӕгътӕй куыд фӕхицӕн кӕны, афтӕ.

³³Фысты ӕрлӕууын кӕндзӕн Йӕ рахизфарс, сӕгъты та — Йӕ галиуфарс.

³⁴Уӕд, Йӕ рахизфарс чи ис, уыдонӕн Паддзах зӕгъдзӕн: „Ӕрцӕут, Мӕ Фыды арфӕйӕ хайджынтӕ, ӕмӕ райсут, дуне сфӕлдисынӕй нырмӕ уын цӕттӕгонд цы Паддзахад у, уый.

³⁵Уымӕн ӕмӕ Ӕз уыдтӕн стонг, ӕмӕ Мӕ бафсӕстат; дойны Мын уыди, ӕмӕ Мын дон радтат; уыдтӕн бӕлццон, ӕмӕ Мӕ суазӕг кодтат;

³⁶уыдтӕн бӕгънӕг, ӕмӕ Мыл дарӕс скодтат; уыдтӕн рынчын, ӕмӕ Мыл батыхстыстут; уыдтӕн ахӕстоны, ӕмӕ Мӕ бабӕрӕг кодтат“.

³⁷Уӕд Ӕй рӕстгӕнджытӕ фӕрсдзысты: „Хицау, кӕд Дӕ федтам стонгӕй ӕмӕ Дӕ кӕд бафсӕстам? Кӕнӕ Дын дойны кӕд уыди, ӕмӕ Дын дон кӕд радтам?

³⁸Кӕд Дӕ федтам бӕлццонӕй ӕмӕ Дӕ кӕд суазӕг кодтам? Кӕнӕ Дӕ кӕд федтам бӕгънӕгӕй ӕмӕ Дыл дарӕс кӕд скодтам?

³⁹Кӕд Дӕ федтам рынчынӕй кӕнӕ ахӕстоны бадгӕйӕ ӕмӕ Дӕ кӕд бабӕрӕг кодтам?“

⁴⁰Ӕмӕ сын Паддзах дзуапп ратдзӕн: „Ӕцӕг цы у, уый уын зӕгъын: Мӕ ацы кӕстӕр ӕфсымӕртӕй иуӕн цы сарӕзтат, уый Мӕнӕн сарӕзтат“.

⁴¹Уӕд, Йӕ галиуфарс чи ис, уыдонӕн та зӕгъдзӕн: „Ацӕут Мӕнӕй, ӕлгъыстытӕ, хӕйрӕгӕн ӕмӕ йӕ зӕдтӕн цӕттӕгонд цы мыггагмӕйы арт ис, уырдӕм.

⁴²Уымӕн ӕмӕ Ӕз уыдтӕн стонг, ӕмӕ Мӕ нӕ бафсӕстат; уыди Мын дойны, ӕмӕ Мын дон нӕ радтат;

⁴³уыдтӕн бӕлццон, ӕмӕ Мӕ не суазӕг кодтат; уыдтӕн бӕгънӕг, ӕмӕ Мыл дарӕс не скодтат; уыдтӕн рынчын ӕмӕ ахӕст, ӕмӕ Мыл нӕ батыхстыстут“.

⁴⁴Уӕд Ӕй уыдон дӕр фӕрсдзысты: „Бардарӕг, кӕд Дӕ федтам стонгӕй, кӕнӕ Дын дойны кӕд уыди? Кӕд Дӕ федтам бӕлццонӕй кӕнӕ бӕгънӕгӕй, рынчынӕй кӕнӕ ахӕстӕй ӕмӕ Дын кӕд нӕ балӕггад кодтам?“

⁴⁵Ӕмӕ сын Паддзах дзуапп ратдзӕн: „Ӕцӕг цы у, уый уын зӕгъын: ацы кӕстӕртӕй иуӕн цы нӕ бакодтат, уый Мӕнӕн нӕ сарӕзтат“.

⁴⁶Ӕмӕ уыдон ацӕудзысты ӕнусмӕ хъизӕмар кӕнынмӕ, рӕстудтӕ та — ӕнусон цардмӕ».