Read Библи: Сыгъдӕг Марк 15 Bible Online

Марк 15 - Библи: Сыгъдӕг bible

Марк 15

¹Куыддӕр ӕрбабон ис, афтӕ алчертӕ, адӕмы хистӕртӕ, динамонджытӕ ӕмӕ ӕппӕт синедрион ӕрӕмбырд сты ӕмӕ уынаффӕ рахастой. Йесойы сбастой, акодтой Йӕ ӕмӕ Йӕ Пилаты къухмӕ радтой.

²Пилат Ӕй бафарста: «Ды иудейӕгты Паддзах дӕ?» Йесо йын дзуапп радта: «Дӕхӕдӕг ӕй зӕгъыс».

³Ӕмӕ Йӕ алчертӕ бирӕ хъуыддӕгты азымджын кодтой.

⁴Пилат та Йӕ бафарста: «Ницы дзуапп дӕттыс? Уыныс, куыд бирӕ азым Дӕм хӕссынц».

⁵Фӕлӕ йын Йесо ницыуал загъта, ӕмӕ Пилат дисы бафтыди.

⁶Пилат-иу алы бӕрӕгбоны дӕр, адӕмы курдиатмӕ гӕсгӕ, иу ахӕсты ссӕрибар кодта.

⁷Уыцы рӕстӕг сӕм ахӕстоны йӕ хъузӕттимӕ — змӕстыты рӕстӕг туг чи ныккалдта, уыдонимӕ — бадти иу лӕг, йӕ ном — Вараввӕ.

⁸Адӕм ӕрӕмбырд сты ӕмӕ Пилатӕй куырдтой, цӕмӕй та сын ацы хатт дӕр, раздӕр куыд кодта, афтӕ бакӕна.

⁹Пилат сӕ бафарста: «Фӕнды уӕ, цӕмӕй уын иудейаг Паддзахы суӕгъд кӕнон?»

¹⁰Уый зыдта, алчертӕ йын Йесойы йӕ къухмӕ сӕ фыр хӕлӕгӕй кӕй радтой, уый.

¹¹Фӕлӕ алчертӕ адӕмы сардыдтой, Вараввӕйы сын рауадзыныл куыд дзурой, афтӕ.

¹²Пилат сӕ ногӕй бафарста: «Уӕдӕ, сымах иудейаг Паддзах Кӕй хонут, Уымӕн та цы бакӕнон?»

¹³Уыдон ныхъхъӕр кодтой: «Байтындз Ӕй!»

¹⁴Пилат сын загъта: «Уагӕр ӕвзӕрӕй цы ракодта?» Фӕлӕ уыдон ноджы тынгдӕр ныхъхъӕр кодтой: «Байтындз Ӕй!»

¹⁵Уӕд Пилат, адӕмы зӕрдӕ балхӕныны охыл, Вараввӕйы ахӕстонӕй рауагъта, Йесойы та ехсӕй фӕнӕмын кодта ӕмӕ Йӕ дзуарыл байтындзынмӕ радта.

¹⁶Ӕфсӕддонтӕ Йесойы акодтой бӕстыхицауы галуаны мидӕггаг кӕртмӕ, ӕмӕ ӕгас ӕфсӕддон хаймӕ дӕр уырдӕм фӕсидтысты.

¹⁷Сӕнт сырх пӕлӕз Ыл скодтой, сындзытӕй кады худ сбыдтой, Йӕ сӕрыл Ын ӕй ӕркодтой

¹⁸ӕмӕ дзырдтой: «Ӕгас цӕуӕд иудейаг Паддзах!»

¹⁹Йӕ сӕр Ын лӕдзӕгӕй цавтой, тутӕ Йыл кодтой, Йӕ разы-иу сӕ зонгуытыл ӕрхаудтой ӕмӕ-иу зӕххыл ныддӕлгом сты.

²⁰Сӕ зӕрдӕйы дзӕбӕхӕн сӕхи куы фӕирхӕфстой, уӕд Ын Йӕ сӕнт сырх пӕлӕз раластой, фӕстӕмӕ Йыл Йӕхи дарӕс скодтой ӕмӕ Йӕ дзуарыл байтындзынмӕ акодтой.

²¹Уыцы рӕстӕг фӕссахарӕй ӕрбацӕйцыди иу киренӕйаг лӕг, Симон, Александр ӕмӕ Руфы фыд; ӕмӕ Йесойы дзуар уымӕн ахӕссын кодтой.

²²Йесойы ӕркодтой, Голгофӕ (ома Сӕргӕхцы бынат) кӕй хонынц, уырдӕм.

²³Ӕмӕ Йын сӕн лӕвӕрдтой смирнӕимӕ хӕццӕйӕ, фӕлӕ йӕ Уый нӕ бакуымдта.

²⁴Дзуарыл Ӕй чи байтыгъта, уыдон Ын Йӕ дарӕстыл хӕлттӕ сӕппӕрстой ӕмӕ сӕ се ’хсӕн байуӕрстой.

²⁵Ӕртыккаг сахат уыди, афтӕ Йӕ дзуарыл байтыгътой[1].

²⁶Цӕй тыххӕй Йӕ азымджын кодтой, уый уыди Йӕ сӕрмӕ фыст: «Иудейӕгты Паддзах».

²⁷Йемӕ ма дзуӕрттыл байтыгътой дыууӕ абырӕджы, иуы — Йӕ рахизфарс, иннӕйы та — Йӕ галиуфарс.

²⁸[Афтӕ сӕххӕст ис, Сыгъдӕг Фысты цы загъдӕуыди, уый: «Фыдгӕнджыты хыгъдмӕ Йӕ бахастӕуыд».]

²⁹Йӕ рӕзты-иу чи фӕцӕйцыд, уыдон сӕ сӕртӕ ӕнкъуыстой ӕмӕ Йын алы ӕфхӕрӕн ныхӕстӕ кодтой: «Гъей, Кувӕндон халӕг ӕмӕ йӕ ӕртӕ бонмӕ аразӕг!

³⁰Дӕхи фервӕзын кӕн — дзуарӕй ӕрхиз».

³¹Афтӕ Дзы хынджылӕг кодтой алчертӕ дӕр динамонджытимӕ ӕмӕ кӕрӕдзийӕн дзырдтой: «Иннӕты ирвӕзын кодта, Йӕхи фервӕзын кӕнын та Йӕ бон нӕу!

³²Чырысти, Израилы Паддзах! Ныр дзуарӕй ӕрхизӕд, цӕмӕй Йӕ нӕхи цӕстӕй фенӕм ӕмӕ Йыл баууӕндӕм». Йемӕ Йын кӕй байтыгътой, уыдон дӕр Ӕй фаудтой.

³³Ӕхсӕзӕм сахат куы ралӕууыди, уӕд бӕстӕ ӕгасӕй дӕр баталынг ис, ӕмӕ афтӕ ахаста суанг фарӕстӕм сахаты онг.

³⁴Фарӕстӕм сахатыл Йесо хъӕрӕй ныууынӕргъыдта: «Элои, Элои, лема сабахтани?», ома: «Мӕ Хуыцау, Мӕ Хуыцау, цӕмӕн Мӕ ныууагътай?»

³⁵Уыцы ныхӕстӕ фехъусгӕйӕ, уым чи лӕууыди, уыдонӕй чидӕртӕ загътой: «Илийамӕ дзуры».

³⁶Уӕд сӕ иу азгъордта, хырыз комраз туаг сӕны атылдта, лӕдзӕгыл ӕй ӕрсагъта ӕмӕ Йын ӕй йӕ дзыхмӕ схаста, афтӕ дзургӕйӕ: «Фӕлӕуут-ма, бакӕсӕм, кӕддӕра Йӕм Илийа ӕрцӕуид ӕмӕ Йӕ дзуарӕй ӕрисид».

³⁷Йесо та хъӕрӕй ныууынӕргъыдта ӕмӕ Йӕ уд систа.

³⁸Уӕд Кувӕндоны мидӕмбӕрзӕн уӕлейӕ дӕлӕмӕ дыууӕ дихы фӕцис.

³⁹Йӕ бакомкоммӕ чи лӕууыди, уыцы сӕдӕйыхицау, Йесо хъӕрӕй куыд ныууынӕргъыдта ӕмӕ Йӕ уд куыд систа, уый куы федта, уӕд загъта: «Ацы Адӕймаг ӕцӕгдӕр Хуыцауы Фырт уыди».

⁴⁰Уым уыди сылгоймӕгтӕ дӕр ӕмӕ кастысты дардӕй: се ’хсӕн — магдалӕйаг Мариа, Иосет ӕмӕ кӕстӕр Йаковы мад Мариа, стӕй Саломи.

⁴¹Йесо ма Галилейы куы уыди, уӕд уыдон цыдысты Йӕ фӕдыл ӕмӕ Йын лӕггад кодтой. Уыди ма дзы, Йемӕ Йерусалиммӕ чи ӕрбацыд, бирӕ ахӕм ӕндӕр сылгоймӕгтӕ дӕр.

⁴²Уӕдмӕ баизӕр ис, ӕмӕ, майрӕмбон кӕй уыди — сабатмӕ цӕттӕгӕнӕн бон, —

⁴³уымӕ гӕсгӕ синедрионы уӕнг, нымад лӕг, аримафейаг Йосеф, йӕхӕдӕг дӕр Хуыцауы Паддзахадмӕ чи ӕнхъӕлмӕ касти, уый йӕ ныфс бахаста Пилатмӕ бацӕуын ӕмӕ дзы Йесойы мард ракурын.

⁴⁴Йесо ныридӕгӕн кӕй амарди, уый Пилатмӕ диссаг фӕкаст, сӕдӕйыхицаумӕ фӕсидти ӕмӕ йӕ бафарста: «Раджы амард?»

⁴⁵Ӕмӕ хабар бӕлвырд куы базыдта, уӕд Йесойы мард раттын кодта Йосефӕн.

⁴⁶Йосеф балхӕдта мӕрдӕмбӕрзӕн, Йесойы мард ӕриста, батыхта Йӕ уыцы мӕрдӕмбӕрзӕны ӕмӕ Йӕ бавӕрдта, къӕдзӕхы цы зӕппадз къахт уыди, уым; йӕ бахизӕныл ын дур бафӕлдӕхта.

⁴⁷Магдалӕйаг Мариа ӕмӕ Иосеты мад Мариа та кастысты ӕмӕ федтой, кӕм Ӕй бавӕрдтой, уый.