Read Библи: Сыгъдӕг Марк 2 Bible Online

Марк 2 - Библи: Сыгъдӕг bible

Марк 2

¹Цалдӕр боны фӕстӕ Йесо ӕрбаздӕхти Капернауммӕ. Хӕдзары кӕй ис, уый адӕмыл айхъуысти.

²Уый бӕрц адӕм ӕрӕмбырд ис, ӕмӕ дуаргӕрон ӕрлӕууӕн дӕр нал уыди. Йесо сын хъусын кодта Хуыцауы ныхас.

³Ӕмӕ Йӕм мӕнӕ цыппар лӕджы ӕрбахастой ӕндзыгнизӕй хъыгдарды.

⁴Адӕмӕй Йӕм бацӕуӕн кӕй нӕ уыд, уымӕ гӕсгӕ хӕдзары сӕр байгом кодтой, цар ныххуынкъ кодтой ӕмӕ йӕ уырдыгӕй йӕ хуыссӕныл ӕруагътой.

⁵Йесо сын федта сӕ уырнындзинад ӕмӕ загъта ӕндзыгнизӕй хъыгдардӕн: «Мӕ хъӕбул, хатыр дын сты дӕ тӕригъӕдтӕ».

⁶Динамонджытӕ цалдӕрӕй уым бадтысты ӕмӕ хинымӕр дзырдтой:

⁷«Уый цытӕ дзуры? Хуыцауы куы фауы! Иунӕг Хуыцауы йеддӕмӕ тӕригъӕдтӕ хатыр кӕнын кӕй бон у?»

⁸Йесо сын уайтагъд Йӕ Удӕй базыдта сӕ хъуыдытӕ ӕмӕ сын загъта: «Цӕмӕн афтӕ хъуыды кӕнут?

⁹Ӕндзыгнизӕй хъыгдардӕн цы ӕнцондӕр у зӕгъын: „Хатыр дын сты дӕ тӕригъӕдтӕ“ ӕви: „Сыст, сис дӕ хуыссӕн ӕмӕ райдай цӕуын“?

¹⁰Фӕлӕ сымах хъуамӕ зонат: Адӕймаджы Фыртӕн ис зӕххыл тӕригъӕдтӕ хатыр кӕныны бар». Ӕмӕ ӕндзыгнизӕй хъыгдардӕн загъта:

¹¹«Дӕумӕ дзурын: сыст, сис дӕ хуыссӕн ӕмӕ цу дӕ хӕдзармӕ».

¹²Уый фестади, йӕ хуыссӕн систа ӕмӕ ӕппӕт адӕмы раз рацыди. Иууылдӕр дисы бафтыдысты, кад кодтой Хуыцауӕн ӕмӕ дзырдтой: «Ахӕм диссаг никуыма федтам».

¹³Йесо та ногӕй рацыди денджызы былмӕ. Уырдӕм Ӕм ӕрбацыди бирӕ адӕм, ӕмӕ сӕ ахуыр кодта.

¹⁴Куы фӕцӕйцыди, уӕд хъалонисӕн бынаты бадгӕ федта Алфейы фырт Левийы ӕмӕ йын загъта: «Рацу Мӕ фӕдыл». Уый сыстад ӕмӕ ацыди Йӕ фӕдыл.

¹⁵Йесо Йӕ ахуыргӕнинӕгтимӕ Левийы хӕдзары куы уыди, уӕд семӕ фынгыл бадти бирӕ хъалонисджытӕ ӕмӕ тӕригъӕдджынтӕ — Йесойы фӕдыл ахӕм адӕм бирӕ цыди.

¹⁶Динамонджытӕ ӕмӕ фарисейтӕ Йесойы тӕригъӕдджынтӕ ӕмӕ хъалонисджытимӕ иу фынгыл бадгӕ куы федтой, уӕд Ын Йӕ ахуыргӕнинӕгтӕн загътой: «Уый хъалонисджытӕ ӕмӕ тӕригъӕдджынтимӕ куыд хӕры?»

¹⁷Йесо уый куы фехъуыста, уӕд сын загъта: «Дохтыр ӕнӕнизты нӕ, фӕлӕ рынчынты хъӕуы. Ӕз ӕрцыдтӕн рӕстгӕнджытӕм нӕ, фӕлӕ тӕригъӕдджынтӕм фӕсидынмӕ».

¹⁸Иоанны ахуыргӕнинӕгтӕ ӕмӕ фарисейтӕ ком куы дардтой, уӕд чидӕртӕ Йесомӕ бацыдысты ӕмӕ Йӕ бафарстой: «Иоанны ахуыргӕнинӕгтӕ ӕмӕ фарисейты ахуыргӕнинӕгтӕ ком куы дарынц, уӕд Дӕ ахуыргӕнинӕгтӕ цӕуылнӕ дарынц ком?»

¹⁹Йесо сын загъта: «Сиахсаг цалынмӕ семӕ вӕййы, уӕдмӕ чындзӕхсӕвы уазджытӕ ком фӕдарынц, мыййаг? Цалынмӕ сиахсаг семӕ вӕййы, уӕдмӕ ком нӕ фӕдарынц.

²⁰Фӕлӕ ралӕудзӕни, сиахсаджы сын се ’хсӕнӕй куы байсой, ахӕм рӕстӕг, ӕмӕ уӕд дардзысты ком.

²¹Зӕронд дарӕсыл ног хъуымацӕй ӕмпъузӕн ничи ӕвӕры: лӕзӕрд хъуымац ӕй нӕ бауромдзӕн, ӕмӕ скъуыд ноджы фестырдӕр уыдзӕни.

²²Ногдыгъд сӕн дӕр зӕронд лалымты ничи кӕны: ног сӕн арӕмудздзӕни зӕронд лалымтӕ, ӕмӕ сӕн дӕр акӕлдзӕни, лалымтӕ дӕр фесӕфдзысты. Ногдыгъд сӕн ног лалымты ныккӕнынц».

²³Иу сабаты Йесо фӕцӕйцыди хоры хуымтыл. Йӕ ахуыргӕнинӕгтӕ-иу цӕугӕ-цӕуын ӕфсиртӕ ратыдтой.

²⁴Ӕмӕ Йын фарисейтӕ загътой: «Кӕс-ма! Сабаты цы не ’мбӕлы, уый куыд кӕнынц?»

²⁵Йесо сын дзуапп радта: «Давид ӕмӕ йе ’мбӕлттӕ куы сыстонг сты ӕмӕ сын бахӕринаг куы ницы уыди, уӕд цы бакодта, уый тыххӕй нӕ кастыстут, ӕви?

²⁶Авиафар алчер куы уыди, уыцы рӕстӕг бацыди Хуыцауы хӕдзармӕ ӕмӕ бахордта, ӕрмӕстдӕр сауджынтӕн хӕрын кӕмӕй ӕмбӕлди, уыцы нывонды дзултӕй, ӕмӕ ма дзы йе ’мбӕлттӕн дӕр радта».

²⁷Йесо ма сын загъта: «Адӕймаджы сабатӕн не сфӕлдыстӕуыд, фӕлӕ сабат — адӕймагӕн.

²⁸Уӕдӕ Адӕймаджы Фырт сабатӕн дӕр хицау у».