Read Библи: Сыгъдӕг Лука 18 Bible Online

Лука 18 - Библи: Сыгъдӕг bible

Лука 18

¹Ӕдзух кувын кӕй ӕмбӕлы ӕмӕ хъынцъым кӕнын кӕй нӕ хъӕуы, уый тыххӕй сын Йесо ӕмбисонд ӕрхаста:

²«Иу сахары уыди, Хуыцауӕй чи нӕ тарст ӕмӕ адӕмӕй чи не ’фсӕрмы кодта, иу ахӕм тӕрхонгӕнӕг.

³Уыцы сахары ма цардис иу идӕдз сылгоймаг дӕр. Уый арӕх цыди тӕрхонгӕнӕгмӕ ӕмӕ йын лӕгъстӕ кодта: „Мӕ рӕстдзинад мын сбӕлвырд кӕн, равзар мын мӕ хъуыддаг“.

⁴Тӕрхонгӕнӕг ӕм цасдӕр рӕстӕг ницы йӕ хъус дардта, фӕлӕ ӕппынфӕстаг йӕхицӕн загъта: „Ӕз нӕдӕр Хуыцауӕй тӕрсын, нӕдӕр адӕмӕй ӕфсӕрмы кӕнын.

⁵Фӕлӕ мӕ иугӕр ацы идӕдз ус ӕнцад нал уадзы, уӕд ын баххуыс кӕнон, цӕмӕй мӕм мауал цӕуа ӕмӕ мӕ мауал фӕлмӕцын кӕна“».

⁶Ӕмӕ Бардарӕг бафарста: «Хъусут, уыцы мӕнгард тӕрхонгӕнӕг цы загъта, уымӕ?

⁷Ау, уӕдӕ уӕд Хуыцау, ӕхсӕвӕй-бонӕй Йын чи лӕгъстӕ кӕны, Йӕ уыцы ӕвзӕрстыты нӕ бахъахъхъӕндзӕн, ӕви? Мыййаг, Йе ’ххуысимӕ бафӕстиат уыдзӕн?

⁸Зӕгъын уын, рӕхджы сын баххуыс кӕндзӕн. Фӕлӕ Адӕймаджы Фырт куы ’рцӕуа, уӕд ма зӕххыл уырнындзинад ссардзӕни, цымӕ?»

⁹Йӕхи раст чи хуыдта ӕмӕ иннӕты та чи ницӕуыл нымадта, уыдонӕн та Йесо ӕрхаста ахӕм ӕмбисонд:

¹⁰«Дыууӕ адӕймаджы бацыдысты Кувӕндонмӕ кувынмӕ: сӕ иу — фарисей, иннӕ — хъалонисӕг.

¹¹Фарисей слӕууыд ӕмӕ йӕхинымӕр кувын райдыдта: „Хуыцау, бузныг дӕн Дӕуӕй, ӕз иннӕтау стигъӕг, ӕдзӕсгом ӕмӕ хъахбай кӕй нӕ дӕн, стӕй мӕнӕ ацы хъалонисӕджы хуызӕн дӕр кӕй нӕ дӕн, уый тыххӕй.

¹²Ком дарын къуыри дыууӕ хатты; ме ’ппӕт ӕфтиаджы дӕсӕймаг хай дӕттын Дӕуӕн“.

¹³Хъалонисӕг та дӕрддзӕф лӕууыд ӕмӕ арвмӕ скӕсын дӕр нӕ уӕндыди, ӕрмӕст йӕ риу хоста ӕмӕ дзырдта: „Хуыцау, ныббар мын, тӕригъӕдджын дӕн ӕз“.

¹⁴Зӕгъын уын, йӕ хӕдзармӕ хъалонисӕг Хуыцауӕй хатыргондӕй ацыд, фарисей та — нӕ. Уымӕн ӕмӕ, йӕхи бӕрзонд чи кӕны, уый ӕрныллӕг уыдзӕн, йӕхи чи ныллӕг кӕны, уый та сбӕрзонд уыдзӕн».

¹⁵Йесомӕ кодтой сабиты дӕр, цӕмӕй сыл бандзӕва, фӕлӕ ахуыргӕнинӕгтӕ уый куы федтой, уӕд сӕ нӕ уагътой.

¹⁶Йесо сабитӕм фӕдзырдта, Йӕ ахуыргӕнинӕгтӕн та загъта: «Ӕрбауадзут Мӕм сӕ, ма сӕ хъыгдарут, уымӕн ӕмӕ Хуыцауы Паддзахад, адоны хуызӕн чи у, уыдоны у.

¹⁷Ӕцӕг цы у, уый уын зӕгъын: Хуыцауы Паддзахадыл сывӕллонау чи нӕ баууӕнда, уый йӕм нӕ бацӕудзӕни».

¹⁸Иу хицау Йесойы бафарста: «Хорз Ахуыргӕнӕг, мыггагмӕйы цард райсыны тыххӕй цы саразон?»

¹⁹Йесо йын дзуапп радта: «Цӕмӕн Мӕ хоныс хорз? Иунӕг Хуыцауы йеддӕмӕ хорз ничи у.

²⁰Ды фӕдзӕхстытӕ зоныс: „Ма хӕт“, „Ма амар“, „Ма дав“, „Мӕнгӕвдисӕн ма ныллӕуу“, „Нымай дӕ фыд ӕмӕ дӕ мады“».

²¹Уый Йесойӕн загъта: «Ӕппӕт уыдӕттӕ ӕз ме ’взонджы бонтӕй нырмӕ ӕххӕст кӕнын».

²²Йесо уый куы фехъуыста, уӕд ын зӕгъы: «Иу хъуыддаг ма дын нӕ фаг кӕны: цыдӕриддӕр дӕм ис, уый ауӕй кӕн ӕмӕ де ’хца мӕгуыртыл байуар, ӕмӕ дын уӕд уӕлӕрвты уыдзӕни хӕзна. Стӕй-иу раздӕх ӕмӕ цу Мӕ фӕдыл».

²³Уый уыцы ныхӕстӕ куы фехъуыста, уӕд ӕрӕнкъард ис, уымӕн ӕмӕ тынг хъӕздыг уыди.

²⁴Кӕй ӕрӕнкъард ис, уый Йесо куы федта, уӕд загъта: «Ӕвӕдза, бонджынтӕн куыд зын у Хуыцауы Паддзахадмӕ бацӕуын!

²⁵Уымӕн ӕмӕ хъӕздыгӕн Хуыцауы Паддзахадмӕ бацӕуынӕй теуайӕн судзины быныл ахизын ӕнцондӕр у».

²⁶Уыцы ныхӕстӕ чи фехъуыста, уыдон бафарстой: «Уӕдӕ чи фервӕздзӕн?»

²⁷Йесо сын загъта: «Адӕмы бон цы нӕу, уый Хуыцауы бон у».

²⁸Уӕд Ын Петр загъта: «Мӕнӕ мах ныууагътам ӕппӕт дӕр ӕмӕ рацыдыстӕм Дӕ фӕдыл».

²⁹Йесо сын дзуапп радта: «Ӕцӕг цы у, уый уын зӕгъын: Хуыцауы Паддзахады тыххӕй йӕ хӕдзар, йӕ усы, йе ’фсымӕрты, йӕ ныййарджыты кӕнӕ йӕ сывӕллӕтты чи ныууадза, уыдонӕй иу дӕр ахӕм нӕй,

³⁰ӕмӕ ныртӕккӕ, ацы заманы, бирӕ фылдӕр чи не ссара, ӕрцӕуинаг дунейы та мыггагмӕйы цард чи нӕ райса».

³¹Йесо фӕхибар кодта дыууадӕсы ӕмӕ сын загъта: «Ныр мах цӕуӕм Йерусалиммӕ, ӕмӕ, Адӕймаджы Фырты тыххӕй пехуымпартӕ цыдӕриддӕр ныффыстой, уый сӕххӕст уыдзӕн:

³²Ратдзысты Йӕ муртаттӕгты къухмӕ, ӕмӕ Дзы уыдон хынджылӕг кӕндзысты, бафхӕрдзысты Йӕ ӕмӕ Йыл тутӕ кӕндзысты,

³³ехсӕй Йӕ фӕнӕмдзысты ӕмӕ Йӕ амардзысты, ӕмӕ ӕртыккаг бон райгас уыдзӕни».

³⁴Уыдон Ын Йӕ ныхӕстӕн ницы бамбӕрстой. Цӕуыл дзырдта, уыдӕттӕ сын ӕргом нӕ уыдысты ӕмӕ сӕм нӕ бахъардтой.

³⁵Йесо Йерихонмӕ куы баввахс ис, уӕд уым фӕндаггӕрон бадти иу куырм мӕгуыргур.

³⁶Ӕмӕ адӕм йӕ цурты фӕцӕуынц, уый фехъусгӕйӕ, бафарста: «Цы хабар у?»

³⁷Загътой йын: «Назаретаг Йесо ӕрбацӕуы».

³⁸Уӕд уый ныхъхъӕр кодта: «Йесо, Давиды Фырт, батӕригъӕд мын кӕн!»

³⁹Разӕй чи цыди, уыдон ӕй басабыр кӕнын фӕлвӕрдтой, фӕлӕ уый ноджы тынгдӕр хъӕр кодта: «Давиды Фырт, батӕригъӕд мын кӕн!»

⁴⁰Йесо ӕрлӕууыд ӕмӕ загъта, цӕмӕй Йӕм ӕй ӕрбакӕной. Куы Йӕм ӕрбацыд, уӕд ӕй Йесо бафарста:

⁴¹«Цы дӕ фӕнды? Цы дын саразон?» Уый Йын дзуапп радта: «Хицау, мӕн фӕнды цӕстӕй ракӕсын».

⁴²Йесо йын загъта: «Ракӕс! Дӕ уырнындзинад дӕ фервӕзын кодта».

⁴³Уыцы сахат куырм лӕг цӕстӕй суыдта ӕмӕ, Хуыцауы стаугӕйӕ, Йесойы фӕдыл ацыди. Адӕм уый куы федтой, уӕд се ’ппӕт дӕр кад кодтой Хуыцауӕн.