Read Библи: Сыгъдӕг Лука 5 Bible Online

Лука 5 - Библи: Сыгъдӕг bible

Лука 5

¹Иуахӕмы Йесо Геннисареты цады был лӕууыд, ӕмӕ Йӕм Хуыцауы ныхасмӕ байхъусынмӕ адӕм уырдӕм гуылф кодтой.

²Йесо фӕкасти ӕмӕ цады ауыдта дыууӕ бӕлӕгъы лӕугӕ — кӕсагахсджытӕ рахызтысты ӕмӕ сӕ хызтӕ ӕхсадтой.

³Йесо бӕлӕгътӕй иумӕ, Симоны чи уыд, уыцы бӕлӕгъмӕ бахызти ӕмӕ йын йӕ хицаумӕ бахатыд, былӕй иу чысыл адарддӕр уӕм, зӕгъгӕ. Сбадти бӕлӕгъы ӕмӕ афтӕмӕй ахуыр кодта адӕмы.

⁴Йӕ ныхас куы фӕци, уӕд Симонӕн загъта: «Дон арфдӕр кӕм у, уырдӕм бацу, ӕмӕ дзы уӕ хызтӕ баппарут».

⁵Симон Ын дзуапп радта: «Ахуыргӕнӕг, мах ӕнӕхъӕн ӕхсӕв фӕфыдӕбон кодтам ӕмӕ ницы ӕрцахстам. Фӕлӕ кӕд Дӕу афтӕ фӕнды, уӕд баппардзынӕн хызтӕ».

⁶Сӕ хызтӕ куы баппӕрстой, уӕд уый бӕрц кӕсаг ӕрцахстой, ӕмӕ ма суанг сӕ хызтӕ дӕр скъуыйын райдыдтой.

⁷Иннӕ бӕлӕгъы чи уыд, уыцы ӕмбӕлттӕм сӕ къухтӕ фӕтылдтой, цӕмӕй сын феххуыс кӕной. Ӕрбацыдысты сӕм, ӕмӕ дыууӕ бӕлӕгъы дӕр афтӕ байдзаг сты, ӕмӕ фӕцӕйдӕлдон кодтой.

⁸Симон Петр уый куы федта, уӕд Йесойы раз йӕ зонгуытыл ӕрхауд ӕмӕ Йын ныллӕгъстӕ кодта: «Мӕ Хицау, ныууадз мӕ, ӕз тӕригъӕдджын адӕймаг дӕн».

⁹Уымӕн ӕмӕ йӕхӕдӕг дӕр ӕмӕ, йемӕ чи уыди, уыдон дӕр, се ’хсӕн — Симоны ӕмбӕлттӕ Йаков ӕмӕ Иоанн, Зеведейы фырттӕ, уый бӕрц кӕсӕгтӕ куы федтой, уӕд тынг фӕтарстысты. Фӕлӕ Йесо загъта Симонӕн: «Ма тӕрс. Нырӕй фӕстӕмӕ адӕмахсӕг уыдзынӕ».

¹¹Кӕсагахсджытӕ дыууӕ бӕлӕгъы дӕр былмӕ раластой, ӕд кӕсӕгтӕ ӕмӕ сӕ ӕд хызтӕ уым ныууагътой ӕмӕ сӕхӕдӕг Йесойы фӕдыл ацыдысты.

¹²Сахартӕй иуы Йесо фембӕлд, йӕ буар ӕнӕхъӕнӕй дӕр хъотырӕй кӕмӕн нал зынди, ахӕм лӕгыл. Уый Йесойы куы федта, уӕд Йӕ разы зӕххыл ныддӕлгом ис ӕмӕ Йын лӕгъстӕ кодта: «Бардарӕг, Дӕу куы бафӕнда, уӕд мӕ ссыгъдӕг кӕндзынӕ».

¹³Йесо Йӕм Йӕ къух бадардта, бандзӕвыд ыл ӕмӕ загъта: «Фӕнды Мӕ, ссыгъдӕг у». Ӕмӕ рынчын уайтагъд йӕ хъотырӕй сдзӕбӕх ис.

¹⁴Йесо йын бафӕдзӕхста: «Макӕмӕн ӕй зӕгъ, фӕлӕ ацу, дӕхи сауджынӕн фенын кӕн ӕмӕ, кӕй ссыгъдӕг дӕ, уый тыххӕй, Моисей куыд бафӕдзӕхста, афтӕ нывонд ӕрхӕсс, кӕй сдзӕбӕх дӕ, уымӕн ӕвдисӕйнагӕн».

¹⁵Фӕлӕ уӕддӕр Йесойӕн Йӕ кой дӕрдтыл айхъуысти, ӕмӕ Йӕм адӕм гуылф кодтой — байхъусынмӕ ӕмӕ сӕхи сдзӕбӕх кӕнынмӕ.

¹⁶Йесо-иу Йӕхи ӕдзӕрӕг рӕттӕм айста ӕмӕ куывта.

¹⁷Иуахӕмы та Йесо адӕмы ахуыр кодта, ӕмӕ се ’хсӕн фарисейтӕ ӕмӕ динамонджытӕ дӕр уыди — уыдон ӕрбамбырд сты Галилей ӕмӕ Иудейы алы хъӕутӕй, стӕй Йерусалимӕй. Хуыцауы хъаруйӕ Йесо дзӕбӕх кодта рынчынты.

¹⁸Уӕд Ӕм чидӕртӕ ӕндзыгнизӕй рынчын адӕймаджы хуыссӕныл ӕрбахастой, цӕмӕй йӕ бахӕссой хӕдзармӕ ӕмӕ йӕ Йесойы раз ӕрӕвӕрой.

¹⁹Фӕлӕ дзы адӕмӕй бацӕуӕн нӕ уыди, ӕмӕ уӕлхӕдзармӕ схызтысты, ӕмбӕрзӕндуртӕ фелвӕстой ӕмӕ рынчыны ӕд хуыссӕн царӕй уаты хӕд астӕумӕ, Йесойы размӕ, ӕруагътой.

²⁰Йесо сын федта сӕ уырнындзинад ӕмӕ рынчынӕн загъта: «Хорз лӕг, хатыргонд дын сты дӕ тӕригъӕдтӕ».

²¹Динамонджытӕ ӕмӕ фарисейтӕ сӕхимидӕг райдыдтой дзурын: «Уый хӕрам ныхас нӕу? Иунӕг Хуыцауы йеддӕмӕ тӕригъӕдтӕ хатыр кӕнын кӕй бон у?»

²²Йесо сын бамбӕрста сӕ хъуыдытӕ ӕмӕ сын загъта: «Цӕмӕн уӕм афтӕ кӕсы?

²³Хатыргонд дын сты дӕ тӕригъӕдтӕ, зӕгъгӕ, ӕнцондӕр у зӕгъын ӕви: „Рабад ӕмӕ райдай цӕуын“?

²⁴Уӕдӕ зонут: Адӕймаджы Фыртӕн зӕххыл ис тӕригъӕдтӕ хатыр кӕныны бар». Ӕмӕ загъта ӕндзыгнизӕй рынчынӕн: «Дӕумӕ дзурын, рабад, сис дӕ хуыссӕн ӕмӕ дӕ хӕдзармӕ ацу».

²⁵Рынчын уайтагъд рабадти, фелвӕста йӕ хуыссӕн ӕмӕ, Хуыцауӕн кад кӕнгӕйӕ, ацыди йӕ хӕдзармӕ.

²⁶Уӕд се ’ппӕт дӕр дисы бафтыдысты ӕмӕ кад кодтой Хуыцауӕн. Тас сӕ бацыди ӕмӕ дзырдтой: «Абон федтам диссаджы хъуыддӕгтӕ».

²⁷Уый фӕстӕ Йесо уырдыгӕй рацыди. Кӕсы, ӕмӕ иу хъалонисӕг, Левий, хъалонисӕн бынаты бады. Йесо йын загъта: «Мӕ фӕдыл рацу».

²⁸Левий алцыдӕр фӕуагъта, фестад ӕмӕ ацыди Йӕ фӕдыл.

²⁹Левий Йесойӕн йӕ хӕдзары ӕрӕвӕрдта хъӕздыг фынг. Фынгыл Йемӕ бадти бирӕ хъалонисджытӕ, стӕй ма дзы ӕндӕр адӕм дӕр дзӕвгар уыд.

³⁰Фарисейтӕ ӕмӕ динамонджытӕ хъуыр-хъуыр кодтой ӕмӕ Йесойы ахуыргӕнинӕгтӕн дзырдтой: «Хъалонисджытимӕ ӕмӕ тӕригъӕдджынтимӕ цӕмӕн хӕрут ӕмӕ нуазут?»

³¹Йесо сын дзуапп радта: «Дохтыр ӕнӕнизты нӕ, фӕлӕ рынчынты хъӕуы.

³²Ӕз ӕрцыдтӕн рӕстытӕм нӕ, фӕлӕ тӕригъӕдджынтӕм фӕсидынмӕ, цӕмӕй сӕ тӕригъӕдтыл ӕрфӕсмон кӕной».

³³Уӕд Ын фарисейтӕ ӕмӕ динамонджытӕ загътой: «Иоанны ахуыргӕнинӕгтӕ ӕдзухдӕр ком дарынц ӕмӕ кувынц, афтӕ — фарисейты ахуыргӕнинӕгтӕ дӕр, Дӕ ахуыргӕнинӕгтӕ та хӕрынц ӕмӕ нуазынц».

³⁴Йесо сын загъта: «Сиахсаг цалынмӕ чындзхӕсджытимӕ уа, уӕдмӕ сӕ ком дарыныл бафтаудзыстут, мыййаг?

³⁵Фӕлӕ сын иу афон сиахсаджы куы акӕной, уӕд дардзысты ком».

³⁶Фӕсномыг ныхас дӕр сын ракодта: «Ног дарӕсӕй гӕппӕл ничи скъуыны ӕмӕ дзы зӕронд дарӕс не ’мпъузы. Науӕд ног дарӕс дӕр ныскъуыдтӕ уыдзӕн, зӕронд дарӕсыл дӕр ӕмпъузӕн не сбаддзӕн.

³⁷Ногдыгъд сӕн дӕр зӕронд лалымты ничи кӕны, уымӕн ӕмӕ ног сӕн лалымтӕ арӕмудздзӕн, ӕмӕ йӕхӕдӕг дӕр ӕнӕ ӕфтиагӕй баззайдзӕн, стӕй лалымтӕ дӕр фесӕфдзысты.

³⁸Ногдыгъд сӕн ног лалымты ныккӕнын хъӕуы, цӕмӕй сӕ дыууӕ дӕр баззайой ӕнӕхъӕнӕй.

³⁹Зӕронд сӕнӕй чи бануазы, уый ног сӕн нал фӕхъӕуы, уымӕн ӕмӕ фӕзӕгъы: „Зӕронд хуыздӕр у“».