Read Библи: Сыгъдӕг Фӕлхатгонд ӕгъдау 25 Bible Online

Фӕлхатгонд ӕгъдау 25 - Библи: Сыгъдӕг bible

Фӕлхатгонд ӕгъдау 25

¹Исчи искӕимӕ фӕбыцӕу ис, зӕгъгӕ, уӕд сӕ тӕрхоны раз ӕрлӕууын хъӕуы: уадз ӕмӕ хъуыддаг ӕвзӕрст ӕрцӕуа ӕмӕ рабӕрӕг уа, раст чи у ӕмӕ зылын чи у, уый.

²Кӕд зылынджын нӕминаг уа, уӕд тӕрхонгӕнӕг бардзырд раттӕд, цӕмӕй йын ӕй йӕ цӕстыты раз радӕргъ кӕной ӕмӕ йын, йӕ азыммӕ гӕсгӕ цас ӕмбӕлы, уал цӕфы ныккӕной.

³Дыууиссӕдз цӕфы фаг у. Уымӕй фылдӕр нӕ, науӕд де ’фсымӕр фӕхудинаг уыдзӕн дӕ цӕстыты раз.

⁴Найгӕнӕг галӕн йӕ дзых ма бӕтт.

⁵Ӕфсымӕртӕ иумӕ цӕрынц, ӕмӕ сӕ иу амарди, фырт та йын нӕ баззади, зӕгъгӕ, уӕд ын йӕ идӕдзы хъуамӕ иннӕ ӕфсымӕр ракура.

⁶Фыццаг сын цы лӕппу райгуыра, уый цыма мард ӕфсымӕры фырт у, афтӕ нымад ӕрцӕудзӕн, ӕмӕ мард ӕфсымӕрӕн израилӕгты ’хсӕн йӕ ном нӕ фесӕфдзӕн.

⁷Фӕлӕ уыцы лӕг йӕ чындзы ракурыныл разы куынӕ уа, уӕд чындз рацӕуӕд сахары кулдуары размӕ, хистӕртӕм, ӕмӕ зӕгъӕд: „Мӕ тиуы нӕ фӕнды, йе ’фсымӕры ном Израилы ’хсӕн ма фесӕфа, уый, мӕн ракурыныл разы нӕу“.

⁸Уӕд хистӕртӕ хъуамӕ фӕдзурой лӕгмӕ ӕмӕ йемӕ ӕрныхас кӕной. Уый сӕ коммӕ нӕ бакасти, нӕ мӕ хъӕуы, зӕгъгӕ, цӕхгӕр ныллӕууыди,

⁹уӕд йе ’фсымӕры идӕдз бацӕуӕд, хистӕрты раз ын йӕ дзабыр йӕ къахӕй раласӕд, йӕ тӕккӕ цӕсгомыл ын бату кӕнӕд ӕмӕ зӕгъӕд: „Йе ’фсымӕры хӕдзар ногӕй рацаразын кӕй нӕ фӕнды, уымӕн мӕнӕ афтӕ бакӕнынц“.

¹⁰Уыйадыл уыцы лӕджы хӕдзарвӕндагыл Израилы ’хсӕн, „бӕгъӕввӕдты мыггаг“, зӕгъгӕ, уыцы ном сбаддзӕн.

¹¹Дыууӕ нӕлгоймаджы хыл кӕнынц ӕмӕ сӕ иуы ус йӕ лӕджы фервӕзын кӕныны тыххӕй, чи йӕ нӕмы, уымӕ бацыд ӕмӕ йын йе ’рдон буархаймӕ ӕнӕфсармӕй фӕлӕбурдта, зӕгъгӕ,

¹²уӕд, дӕ цӕст дӕр ма фӕныкъул, афтӕмӕй йын йӕ къух атӕхын кӕн.

¹³Дӕ хызыны дыууӕ алыхуызон уӕзбарӕны ма уӕд, сӕ иу — стырдӕр, иннӕ — къаддӕр.

¹⁴Дӕ хӕдзары дыууӕ алыхуызон бӕрцбарӕн мигӕнӕны ма уӕд, сӕ иу — стырдӕр, иннӕ — къаддӕр.

¹⁵Дӕ уӕзбарӕнӕн хъуамӕ уа раст ӕмӕ бӕлвырд уӕз, дӕ барӕн мигӕнӕнӕн — раст ӕмӕ бӕлвырд бӕрцуат. Уӕд бирӕ фӕцӕрдзынӕ, Дунедарӕг, уӕ Хуыцау, сымахӕн исбонӕн кӕй дӕтты, уыцы зӕххыл:

¹⁶ахӕм митӕ чи кӕны, уыдонӕй алчидӕр, алы фӕлитой дӕр, ӕлгъаг у Дунедарӕгӕн, уӕ Хуыцауӕн.

¹⁷Мысырӕй куы рацыдыстут, уӕд уын уыцы фӕндагыл амалекӕгтӕ цы бакодтой, уый дӕ рох ма уӕд.

¹⁸Куы уыл бамбӕлдысты, уӕд уыл чъылдымӕрдыгӕй сӕхи ныццавтой ӕмӕ, йӕ бон цӕуын кӕмӕн нал уыд ӕмӕ фӕсте чи баззад, уыдоны ныццагътой: сымах фыр фӕлладӕй бастадыстут, уыдон та Хуыцауӕй нӕ фӕтарстысты.

¹⁹Дунедарӕг, уӕ Хуыцау, сымах куы фервӕзын кӕна уӕ алыварс знӕгтӕй ӕмӕ уын исбонӕн кӕй радта, уыцы зӕххыл уӕ куы ’рбынӕттон кӕна, уӕд-иу уӕ ма ферох уӕнт амалекӕгтӕ — сӕ кой дӕр-иу сын фесафут зӕххыл.