Read Библи: Сыгъдӕг Иоанн 2 Bible Online

Иоанн 2 - Библи: Сыгъдӕг bible

Иоанн 2

¹Ӕртыккаг бон галилейаг Канӕйы уыди чындзӕхсӕв, ӕмӕ Йесойы мад уыди уым.

²Йесо ӕмӕ Йӕ ахуыргӕнинӕгтӕ дӕр хуынд уыдысты чындзӕхсӕвмӕ.

³Ӕмӕ, сӕн куы фӕци, уӕд Йесойӕн Йӕ мад загъта: «Сӕн сӕм нӕй».

⁴Йесо йын дзуапп радта: «Уый Мӕнӕй цӕмӕн домыс, сылгоймаг? Мӕ рӕстӕг нӕма ӕрцыд».

⁵Уӕд Йӕ мад лӕггадгӕнджытӕн бафӕдзӕхста: «Цы уын зӕгъа, уый-иу бакӕнут».

⁶Иудейаг ӕгъдаумӕ гӕсгӕ, уым хи цӕхсынӕн лӕууыди, фӕйнӕ дыууӕ-ӕртӕ метреты[5] бӕрц кӕм цыди, ахӕм дурӕйконд ӕхсӕз донгарзы.

⁷Йесо лӕггадгӕнджытӕн загъта: «Донгӕрзтӕ донӕй байдзаг кӕнут». Ӕмӕ сӕ байдзаг кодтой сӕ былтӕм.

⁸Уӕд та сын Йесо загъта: «Ныр дзы сӕвгӕнут ӕмӕ йӕ фынджы уагдармӕ ахӕссут». Ӕмӕ афтӕ бакодтой.

⁹Фынджы уагдар сӕнӕй куы ацахуыста, — ныр, кӕцӕй у, уый та нӕ зыдта, зыдтой йӕ ӕрмӕстдӕр, донгӕрзтӕй дон чи сӕвгӕдта, уыцы лӕггадгӕнджытӕ, — уӕд фӕдзырдта сиахсагмӕ

¹⁰ӕмӕ йын загъта: «Алчи уал раздӕр хорз сӕн ӕрӕвӕры фынгыл, ӕмӕ сӕ фаг куы бануазынц, уӕд та — ӕвзӕрдӕр. Ды та хорз сӕн нырмӕ ныууагътай».

¹¹Йесо галилейаг Канӕйы цы бакодта, уый уыди Йӕ диссӕгты райдайӕн, уымӕй равдыста Йӕ кады хъомыс, ӕмӕ Йыл Йӕ ахуыргӕнинӕгтӕ баууӕндыдысты.

¹²Уый фӕстӕ Йесо Йӕ мад, Йе ’фсымӕртӕ ӕмӕ Йӕ ахуыргӕнинӕгтимӕ ацыди Капернауммӕ, ӕмӕ дзы цалдӕр боны фесты.

¹³Ӕрӕввахс ис иудейаг Куадзӕн, ӕмӕ Йесо ацыди Йерусалиммӕ.

¹⁴Уым Кувӕндоны баййӕфта галтӕ, фыстӕ ӕмӕ бӕлонуӕйгӕнджыты, стӕй ӕхцаивджыты бадгӕ.

¹⁵Уӕд синагӕй ехс сарӕзта ӕмӕ се ’ппӕты дӕр ӕд фыстӕ ӕмӕ ӕд галтӕ Кувӕндонӕй ратардта, ӕхцаивджытӕн се ’хца ныппырх кодта, сӕ фынгтӕ сын афӕлдӕхта.

¹⁶Бӕлӕттӕ уӕйгӕнджытӕн та загъта: «Айсут сӕ ардыгӕй ӕмӕ Мын Мӕ Фыды Хӕдзарӕй базаргӕнӕн хӕдзар ма аразут».

¹⁷Уӕд Йӕ ахуыргӕнинӕгты зӕрдыл ӕрлӕууыди, Сыгъдӕг Фыст цы зӕгъы, уый: «Дӕ Хӕдзары мӕт Мӕ удхарӕй мары».

¹⁸Уӕд Ӕй иудейӕгтӕ бафарстой: «Ахӕм бартӕ Дӕм кӕй ис, ууыл нӕ цӕмӕй баууӕндын кӕндзынӕ?»

¹⁹Йесо сын дзуапп радта: «Фехалут ацы Кувӕндон, ӕмӕ йӕ Ӕз ӕртӕ бонмӕ сараздзынӕн».

²⁰Уӕд Ын иудейӕгтӕ загътой: «Ацы Кувӕндон ӕхсӕз ӕмӕ дыууиссӕдз азы арӕзтой, Ды та йӕ ӕртӕ бонмӕ сараздзынӕ?»

²¹Фӕлӕ Йесо, Кувӕндоны тыххӕй дзургӕйӕ, Йӕ буары кой кодта.

²²Ӕмӕ, мӕрдтӕй куы райгас ис, уӕд Йӕ ахуыргӕнинӕгтӕн уыцы ныхӕстӕ ӕрлӕууыдысты сӕ зӕрдыл ӕмӕ баууӕндыдысты Сыгъдӕг Фыстыл ӕмӕ, цы дзырдта, ууыл.

²³Куадзӕны бӕрӕгбоны Йесо Йерусалимы куы уыди, уӕд цы диссӕгтӕ ӕвдыста, уыдон бирӕтӕ федтой ӕмӕ Йыл баууӕндыдысты.

²⁴Йесо сыл Йӕхӕдӕг та не ’ууӕндыд, уымӕн ӕмӕ се ’ппӕты дӕр зыдта

²⁵ӕмӕ Йын адӕймаджы тыххӕй исчи исты загътаид, уый сӕр Ӕй нӕ хъуыд — йӕ зӕрдӕйы кӕмӕн цы ис, уый Йӕхӕдӕг хорз зыдта.