Read Библи: Сыгъдӕг Апостолты хъуыддӕгтӕ 21 Bible Online

Апостолты хъуыддӕгтӕ 21 - Библи: Сыгъдӕг bible

Апостолты хъуыддӕгтӕ 21

¹Уыдонӕй куы фӕхицӕн стӕм, уӕд науы ацыдыстӕм Космӕ, дыккаг бон та — Родосмӕ, уырдыгӕй — Патарӕмӕ.

²Уым бацагуырдтам, Финикимӕ чи цыдис, уыцы нау, сбадтыстӕм дзы ӕмӕ ацыдыстӕм.

³Баввахс стӕм Кипрмӕ ӕмӕ йӕ фӕуагътам галиуӕрдыгӕй. Нӕ ных сарӕзтам Сиримӕ ӕмӕ бацыдыстӕм Тирмӕ. Ам хъуыди равдӕлон кӕнын нау.

⁴Мах ссардтам ахуыргӕнинӕгты ӕмӕ дзы баззадыстӕм авд боны. Уыдон, Сыгъдӕг Удӕй разӕнгардӕй, дзырдтой Павелӕн, цӕмӕй Йерусалиммӕ ма ацӕуа.

⁵Фӕлӕ афон куы ӕрцыд, уӕд мах араст стӕм дарддӕр. Ахуыргӕнинӕгтӕ се ’ппӕт дӕр ӕд устытӕ ӕмӕ ӕд сывӕллӕттӕ нӕ фӕдыл фӕссахармӕ рацыдысты. Денджызы былгӕрон ӕрзоныг кодтам ӕмӕ скуывтам.

⁶Кӕрӕдзийӕн «хӕрзбон» загътам ӕмӕ сбадтыстӕм науы, уыдон та аздӕхтысты сӕхимӕ.

⁷Тирӕй ӕрхӕццӕ стӕм Птолемаидӕмӕ. Уым фембӕлдыстӕм ӕфсымӕртимӕ ӕмӕ сӕм фестӕм иу бон.

⁸Дыккаг бон араст стӕм Кесаримӕ. Уым бацыдыстӕм, аргъуан цы авд лӕджы сӕвзӕрста, уыдонӕй иумӕ — Фарны Уац хъусынгӕнӕг Филиппы хӕдзармӕ, ӕмӕ уымӕ баззадыстӕм.

⁹Филиппӕн уыди, пехуымпариуӕг чи кодта, ахӕм цыппар ӕнӕцыд чызджы.

¹⁰Дзӕвгар рӕстӕг сӕм куы фестӕм, уӕд Иудейӕ иу пехуымпар ӕрцыд, йӕ ном — Агав.

¹¹Уый нӕм бацыд, райста Павелы рон, сбаста дзы йӕ къухтӕ ӕмӕ йӕ къӕхтӕ, стӕй загъта: «Афтӕ зӕгъы Сыгъдӕг Уд: ацы рон кӕй у, уыцы лӕджы иудейӕгтӕ Йерусалимы мӕнӕ афтӕ сбӕтдзысты ӕмӕ йӕ ратдзысты муртаттӕгты къухтӕм».

¹²Уый куы фехъуыстам, уӕд, уым чи уыди, уыдонимӕ лӕгъстӕ кӕнын райдыдтам Павелӕн, Йерусалиммӕ ма ацу, зӕгъгӕ.

¹³Фӕлӕ Павел дзуапп радта: «Уый цытӕ кӕнут? Уӕ кӕуынӕй мын мӕ зӕрдӕ цӕмӕн риссын кӕнут? Ӕз цӕттӕ дӕн ӕрмӕст ахӕстоны сбадынмӕ нӕ, фӕлӕ Бардарӕг Йесойы номы сӕраппонд Йерусалимы амӕлынмӕ дӕр».

¹⁴Куынӕ йӕ басастам, уӕд банцадыстӕм ӕмӕ загътам: «Бардарӕджы куыд фӕнды, афтӕ уӕд!»

¹⁵Уый фӕстӕ нӕхи срӕвдз кодтам ӕмӕ араст стӕм Йерусалиммӕ.

¹⁶Немӕ ма рацыдысты кесариаг ахуыргӕнинӕгтӕ цалдӕрӕй. Уыдон нӕ ӕркодтой фыццаг ахуыргӕнинӕгтӕй иумӕ — кипраг Мнасонмӕ, цӕмӕй йӕм бафысым кӕнӕм.

¹⁷Йерусалиммӕ куы бахӕццӕ стӕм, уӕд ныл ӕфсымӕртӕ сӕмбӕлдысты ӕхсызгонӕй.

¹⁸Павел дыккаг бон немӕ ацыд Йаковмӕ; ӕрӕмбырд сты аргъуаны ӕппӕт хистӕртӕ дӕр.

¹⁹Павел сын салам радта ӕмӕ бӕлвырд радзырдта, йӕ куысты руаджы Хуыцау муртаттӕгты ӕхсӕн цы сарӕзта, уый тыххӕй.

²⁰Уыдон ӕм байхъуыстой, арфӕ ракодтой Хуыцауӕн ӕмӕ Павелӕн загътой: «Ӕфсымӕр, уыныс, цал мин иудейаджы баууӕндыди, уый! Ӕмӕ се ’ппӕт дӕр ӕнувыд сты Моисейы Ӕгъдауыл.

²¹Дӕу тыххӕй сын радзырдтой, зӕгъгӕ, муртаттӕгты ӕхсӕн чи цӕры, уыцы иудейӕгты ды се ’ппӕты дӕр ахуыр кӕныс Моисейы Ӕгъдау ныууадзыныл, сӕ сывӕллӕттӕн сунӕт нӕ кӕныныл ӕмӕ не ’гъдӕуттӕм гӕсгӕ нӕ цӕрыныл.

²²Ныр цы чындӕуа? Адӕм ӕнӕмӕнг [ӕрӕмбырд уыдзысты, уымӕн ӕмӕ] фехъусдзысты де ’рцыды кой.

²³Уӕдӕ байхъус, цы дын зӕгъӕм, уымӕ: не ’хсӕн ис, Хуыцауӕн дзырд чи радта, ахӕм цыппар лӕджы.

²⁴Акӕн сӕ ӕмӕ дӕхи ссыгъдӕг кӕн семӕ, сӕ хӕрдзтӕ сын дӕхимӕ райс. Уыдон адасдзысты сӕ сӕртӕ, ӕмӕ иууылдӕр фендзысты, дӕу тыххӕй цы фехъуыстой, уый ӕцӕг кӕй нӕу, ды дӕхӕдӕг дӕр Ӕгъдаумӕ гӕсгӕ кӕй цӕрыс.

²⁵Муртаттӕгтӕй Бардарӕгыл чи баууӕндыд, уыдоны тыххӕй та рахастам уынаффӕ ӕмӕ сӕм ныффыстам, мӕнгхуыцӕуттӕн хаст нывӕндтӕй, туг ӕмӕ хӕдмӕл дзидза хӕрынӕй, стӕй хъахбайдзинадӕй сӕхи куыд бахизой».

²⁶Уӕд Павел ахуыдта уыцы лӕгты ӕмӕ дыккаг бон семӕ ссыгъдӕг кодта йӕхи. Уый фӕстӕ бацыди Кувӕндонмӕ ӕмӕ фехъусын кодта, сыгъдӕг кӕныны бонтӕ кӕд фӕуыдзысты ӕмӕ уыдонӕй алкӕй тыххӕй дӕр нывӕндтӕ кӕд ӕрхастӕуыдзӕн.

²⁷Уыцы авд боны куы фӕуд кодтой, уӕд асиаг иудейӕгтӕ Павелы федтой Кувӕндоны, сардыдтой йыл ӕппӕт адӕмы ӕмӕ йӕ ӕрцахстой.

²⁸Хъӕр систой: «Израилӕгтӕ, баххуыс кӕнут! Ацы адӕймаг алкӕй дӕр ӕмӕ алы ран дӕр ахуыр кӕны нӕ адӕмы, Ӕгъдауы ӕмӕ ацы бынаты ныхмӕ. Суанг ма муртаттӕгты дӕр бахуыдта Кувӕндонмӕ ӕмӕ фӕчъизи кодта ацы сыгъдӕг бынат!»

²⁹Уымӕн ӕмӕ уымӕй размӕ Павелимӕ сахары федтой эфесаг Трофимы ӕмӕ ӕнхъӕлдтой, Павел ӕй Кувӕндонмӕ бахуыдта, зӕгъгӕ.

³⁰Сахар ӕгасӕй дӕр базмӕлыд, ӕрӕмбырд бирӕ адӕм. Ӕрцахстой Павелы, лӕгдыхӕй йӕ ракодтой Кувӕндонӕй ӕмӕ уайтагъд сӕхгӕдтой дуӕрттӕ.

³¹Хъавыдысты йӕ амарынмӕ, фӕлӕ ӕфсӕддон хицаумӕ фӕхабар чындӕуыд, ӕгас Йерусалим базмӕлыди, зӕгъгӕ.

³²Уый ӕфсӕддонтӕ ӕмӕ сӕдӕйыхицӕуттимӕ ӕвӕстиатӕй атындзыдта адӕммӕ. Уыдон ӕфсӕддон хицауы ӕмӕ йе ’фсӕддонты куы федтой, уӕд Павелы нал надтой.

³³Ӕфсӕддон хицау бацыди Павелмӕ, ӕрцахста йӕ ӕмӕ бардзырд радта, цӕмӕй йӕ дыууӕ рӕхысӕй сбӕттой. Уый фӕстӕ бафарста: «Чи у ӕмӕ цы сарӕзта?»

³⁴Адӕмӕй иутӕ иу хъӕр кодтой, иннӕтӕ та — иннӕ. Ӕфсӕддон хицауӕн змӕсты тыххӕй йӕ бон бӕлвырдӕй базонын кӕй ницы уыд, уымӕ гӕсгӕ бардзырд радта, цӕмӕй Павелы фидармӕ акӕной.

³⁵Павел асинмӕ куы бахӕццӕ, уӕд ӕй ӕфсӕддонты бахъуыди хӕссын, уымӕн ӕмӕ йӕм адӕм лӕбурдтой.

³⁶Йӕ фӕдыл хъӕргӕнгӕ цыди бирӕ адӕм: «Маринаг у!»

³⁷Фидармӕ бацӕуӕны цур Павел ӕфсӕддон хицауӕн загъта: «Иу цыдӕр зӕгъыны бар мын дӕттыс?» Уый дзуапп радта: «Ды бердзенаг ӕвзаг зоныс?

³⁸Ӕрӕджы уыцы змӕст чи сарӕзта ӕмӕ ӕдзӕрӕг быдырмӕ цыппар мин сикарийы[13] чи акодта, уыцы мысыраг нӕ дӕ?»

³⁹Павел дзуапп радта: «Ӕз иудейаг дӕн, киликиаг зындгонд сахар Тарсы гражданин. Курын дӕ, ратт мын адӕмимӕ ныхас кӕныны бар».

⁴⁰Бар ын куы радта, уӕд Павел, асиныл лӕугӕйӕ, адӕмӕн йӕ къухӕй ацамыдта ӕмӕ, куы ӕрсабыр сты, уӕд райдыдта дзуттагау дзурын: