Read Библи: Сыгъдӕг Ромӕгтӕм 2 Bible Online

Ромӕгтӕм 2 - Библи: Сыгъдӕг bible

Ромӕгтӕм 2

¹Уӕдӕ, чидӕриддӕр ма у, искӕмӕн тӕрхон куы кӕнай, уӕд дын уый ныххатыр кӕнӕн нӕй. Искӕмӕн тӕрхон кӕнгӕйӕ, ды дӕхицӕн дӕр тӕрхон кӕныс, уымӕн ӕмӕ, цӕй тыххӕй тӕрхон кӕныс, дӕхӕдӕг дӕр уый гӕнӕг дӕ.

²Мах та зонӕм, афтӕ чи кӕны, уыдонӕн Хуыцау стӕрхон кӕндзӕн ӕцӕгадмӕ гӕсгӕ.

³Ау, афтӕ ӕнхъӕл дӕ, ӕмӕ, дӕхӕдӕг цы митӕ кӕныс, ахӕм миты тыххӕй искӕмӕн тӕрхонгӕнӕг куы уай, уӕд Хуыцауы тӕрхонӕй фервӕздзынӕ?

⁴Ӕви Хуыцау хӕрзаудӕг, барон ӕмӕ бирӕбыхсаг кӕй у ӕмӕ дӕ Йе ’нӕкӕрон зӕрдӕхӕларӕй ӕрфӕсмон кӕнынмӕ кӕй хоны, уый не ’мбарыс?

⁵Фӕлӕ ӕнӕсӕттон кӕй дӕ ӕмӕ дӕ ӕрфӕсмон кӕнын кӕй нӕ фӕнды, уымӕй дӕхӕдӕг ноджы карздӕр кӕныс де ’фхӕрд Хуыцауы азары бон, Хуыцау Йӕ ӕнӕхӕрам тӕрхон куы раргом кӕна, уӕд.

⁶Хуыцау уӕд алкӕмӕн дӕр саргъ кӕндзӕн йӕ хъуыддӕгтӕм гӕсгӕ:

⁷иудадзыг хорз хъуыддӕгтӕ чи аразы ӕмӕ афтӕмӕй намыс, кад ӕмӕ ӕнӕмӕлӕтмӕ чи тырны, уыдонӕн — мыггагмӕйы цард;

⁸хиуарзон чи у, ӕцӕгады коммӕ чи нӕ кӕсы ӕмӕ тӕригъӕдмӕ ӕмхиц чи у, уыдоны та баййафдзӕни Йӕ азар.

⁹Фыддзинад чи аразы, алы уыцы адӕймаджы бакӕндзӕн удхар ӕмӕ хъизӕмары хай: раздӕр иудейаджы, стӕй та — муртаттаджы.

¹⁰Хорздзинад чи кӕны, уыдонӕй та алкӕмӕ дӕр ӕнхъӕлмӕ кӕсынц кад, намыс ӕмӕ фарн: раздӕр — иудейагмӕ, стӕй та — муртаттагмӕ.

¹¹Уымӕн ӕмӕ Хуыцау никӕй хъулон кӕны.

¹²Иудейаг Ӕгъдау кӕмӕн нӕ уыд, афтӕмӕй тӕригъӕды чи бацыди, уыдон амӕлдзысты, фӕлӕ сын Ӕгъдау тӕрхонгӕнӕг нӕ уыдзӕн. Ӕгъдау кӕмӕн уыди, афтӕмӕй тӕригъӕды чи бацыд, уыдонӕн та тӕрхонгонд уыдзӕн Ӕгъдаумӕ гӕсгӕ.

¹³Уымӕн ӕмӕ Хуыцау сраст кӕндзӕн, Ӕгъдау хъусгӕ чи кӕны, уыдоны нӕ, фӕлӕ, Ӕгъдау ӕххӕст чи кӕны, уыдоны.

¹⁴Муртаттӕгтӕн Ӕгъдау нӕй, фӕлӕ сӕ мидхъӕлӕсмӕ гӕсгӕ Ӕгъдауы домӕнтӕ куы феххӕст кӕнынц, уӕд сӕхӕдӕг сӕхицӕн ӕгъдау сты, кӕд сын Ӕгъдау нӕй, уӕддӕр.

¹⁵Ӕмӕ уымӕй ӕвдисынц, Ӕгъдауы домӕнтӕ сӕ зӕрдӕты фыст кӕй сты, уый. Афтӕ кӕй у, ууыл дзурӕг сты се ’фсарм ӕмӕ сӕ хъуыдытӕ — куы сӕ азымджын фӕкӕнынц, куы — раст.

¹⁶Ӕппӕт уыдӕттӕ рабӕрӕг уыдзысты, Йесо Чырыстийы фӕрцы Хуыцау адӕмы сусӕг хъуыдытӕн ӕмӕ хъуыддӕгтӕн тӕрхон куы кӕна, уӕд. Афтӕ зӕгъы, ӕз цы Фарны Уац хъусын кӕнын, уый.

¹⁷Ныр та дӕумӕ дзурын, йӕхи иудейаг чи хоны, уый. Ныфс дӕ ис Ӕгъдауӕй; дӕхицӕй ныббуц дӕ, цыма Хуыцау дӕумӕ ӕндӕр цӕстӕй кӕсы;

¹⁸Хуыцауӕн фӕндон цы у, уый зоныс; Ӕгъдау дӕ сахуыр кодта, хуыздӕр цы у, уый ӕмбарыныл;

¹⁹фидарӕй ӕууӕндыс, куырмытӕн фӕндагамонӕг кӕй дӕ, талынджы цӕрджытӕн — рухс,

²⁰ӕнӕмбаргӕтӕн — зондамонӕг, ницызонджытӕн — ахуыргӕнӕг; ӕппӕт зонынад ӕмӕ ӕцӕгад дын Ӕгъдауы сты.

²¹Уӕдӕ, искӕй ахуыр кӕнгӕйӕ, дӕхи цӕуылнӕ ахуыр кӕныс? Давыны ныхмӕ дзурыс, дӕхӕдӕг та давыс!

²²Зӕгъыс «ма хӕт» — ӕмӕ хӕтыс! Былысчъилтӕ кӕныс гуымирытыл — ӕмӕ кувӕндӕттӕ къахыс!

²³Ӕгъдауӕй ӕппӕлыс, фӕлӕ Ӕгъдау халыс ӕмӕ уымӕй ӕгад кӕныс Хуыцауы.

²⁴Сыгъдӕг Фыст зӕгъы: «Сымах аххосӕй фауынц муртаттӕгтӕ Хуыцауы ном».

²⁵Ӕгъдаумӕ гӕсгӕ куы цӕрай, уӕд сунӕт пайда у. Фӕлӕ кӕд Ӕгъдауы сӕрты ахызтӕ, уӕд дӕ сунӕт ницыуал давы.

²⁶Сунӕтгонд чи нӕу, уый Ӕгъдауы домӕнтӕ куы ӕххӕст кӕна, уӕд ӕнӕсунӕтӕй дӕр Хуыцауы цӕсты сунӕтгонд нӕ уыдзӕн, ӕви?

²⁷Уӕдӕ йӕ буарыл сунӕт кӕмӕн нӕй, афтӕмӕй Ӕгъдау чи ӕххӕст кӕны, уый рахӕсдзӕн тӕрхон дӕуӕн, Ӕгъдауы сӕрты ахизӕгӕн, кӕд дын фыст Ӕгъдау ис ӕмӕ сунӕтгонд дӕ, уӕддӕр.

²⁸Ӕддаг бакастӕй иудейаг чи у, ӕцӕг иудейаг уый нӕу, буарыл цы сунӕт ис, ӕцӕг сунӕт уый нӕу.

²⁹Ӕцӕг иудейаг, зӕрдӕйӕ иудейаг чи у, уый у; ӕцӕг сунӕт, Ӕгъдау афтӕ кӕй домы, уый тыххӕй конд нӕу, фӕлӕ Удӕй аразгӕ зӕрдӕйы сунӕт у. Ахӕм адӕймагӕй адӕм нӕ, фӕлӕ Хуыцау раппӕлы.