Read Библи: Сыгъдӕг 1 Коринфӕгтӕм 11 Bible Online

1 Коринфӕгтӕм 11 - Библи: Сыгъдӕг bible

1 Коринфӕгтӕм 11

¹Мӕн бафӕзмут, ӕз Чырыстийы куыд фӕзмын, афтӕ.

²Разы уӕ дӕн, ӕфсымӕртӕ, алы хъуыддаджы дӕр уӕ зӕрдыл кӕй лӕууын ӕмӕ уӕм цы ахуырад ӕрхастон, ууыл иууылдӕр фидар кӕй хӕцут, уымӕй.

³Ноджы ма мӕ фӕнды, цӕмӕй сымах зонат: алы нӕлгоймагӕн дӕр йӕ хицау Чырысти у, сылгоймаджы хицау нӕлгоймаг у, Чырыстийы хицау та Хуыцау у.

⁴Кувгӕйӕ кӕнӕ пехуымпариуӕг кӕнгӕйӕ, бӕгъӕмсар цы нӕлгоймаг нӕ уа, уый йӕхи ӕмӕ йӕ Хицауы ӕгад кӕны.

⁵Бӕгъӕмсарӕй цы сылгоймаг кувы кӕнӕ пехуымпариуӕг кӕны, уый дӕр йӕхи ӕмӕ йӕ хицауы ӕгад кӕны — ахӕм сылгоймаг дастсӕрӕй уӕлдай нӕу.

⁶Кӕд сылгоймаг сӕрбӕттӕн нӕ дары, уӕд йӕ сӕр алвынӕд; фӕлӕ сылгоймагмӕ кӕд йӕ сӕр алвынын кӕнӕ адасын худинаг кӕсы, уӕд сӕрбӕттӕн дарӕд.

⁷Нӕлгоймаг бӕгъӕмсар хъуамӕ уа, уымӕн ӕмӕ йӕ Хуыцау Йӕхимӕ гӕсгӕ сфӕлдыста, ӕмӕ Хуыцауы кадӕй кадджын у; сылгоймаджы кад та нӕлгоймагӕй у.

⁸Уымӕн ӕмӕ сылгоймаг нӕлгоймагӕй нӕ равзӕрди, фӕлӕ нӕлгоймаг — сылгоймагӕй.

⁹Нӕлгоймаджы не сфӕлдыстӕуыди сылгоймаджы тыххӕй, фӕлӕ сылгоймаджы сфӕлдыстӕуыди нӕлгоймаджы тыххӕй.

¹⁰Уымӕ гӕсгӕ хицаудзинады нысанӕн сылгоймаг йӕ сӕрыл хъуамӕ сӕрбӕттӕн дара — зӕдтӕн зонынӕн.

¹¹Ӕниу ног царды, Бардарӕджы раз, сылгоймагӕн нӕлгоймаг куыд ахсджиаг у, афтӕ ахсджиаг у сылгоймаг дӕр нӕлгоймагӕн.

¹²Уымӕн ӕмӕ, кӕд сылгоймаг нӕлгоймагӕй равзӕрди, уӕддӕр нӕлгоймаг сылгоймагӕй райгуыры. О, фӕлӕ ӕппӕт дӕр сфӕлдыста Хуыцау.

¹³Ахъуыды-ма кӕнут уӕхӕдӕг, сылгоймагӕн бӕгъӕмсарӕй Хуыцаумӕ кувын фидауы?

¹⁴Ӕрдз уӕ йӕхӕдӕг ахуыр кӕны: нӕлгоймагӕн сӕрыхъуынтӕ уадзын ӕгад у,

¹⁵сылгоймаг та сӕрыхъуынтӕ куы уадза, уӕд ын уый кад у, уымӕн ӕмӕ йын сӕрыхъуынтӕ ӕрдзон ӕмбӕрзӕнау лӕвӕрд сты.

¹⁶Фӕлӕ кӕд уыдӕтты тыххӕй искӕй быцӕу кӕнын фӕнды, уӕд мах дӕр ӕмӕ Хуыцауы аргъуантӕ дӕр ахӕм ӕгъдауыл хӕст не стӕм.

¹⁷Ныр та уын цы зӕгъдзынӕн, уымӕй уӕ ӕппӕлгӕ нӕ кӕнын, уымӕн ӕмӕ уе ’мбырдтӕ пайдайы бӕсты зиан ӕрхӕссынц.

¹⁸Фыццаджыдӕр, ӕз хъусын, зӕгъгӕ, аргъуанмӕ куы ӕрцӕут, уӕд фӕкъордтӕ вӕййут, ӕмӕ афтӕ кӕй у, уый мӕ иуӕрдыгӕй уырнгӕ дӕр кӕны.

¹⁹Ӕцӕг уӕм алыхуызон зондахаст дӕр хъуамӕ уа, уе ’хсӕн фӕлтӕрд чи у, уыдон куыд сбӕлвырд уой, афтӕ.

²⁰Сымах иумӕ куы ӕрӕмбырд вӕййут, уӕд уын дзы Бардарӕджы ӕхсӕвӕр нӕ рауайы —

²¹алчидӕр февналы йе ’хсӕвӕр ахӕрынмӕ, ӕмӕ иу ӕххормагӕй баззайы, иннӕ та ӕфсӕст ӕмӕ расыг вӕййы.

²²Хӕдзӕрттӕ уын нӕй, цӕмӕй хӕргӕ ӕмӕ нуазгӕ уым кӕнат? Ӕви Хуыцауы Аргъуан ницӕмӕ дарут? Кӕнӕ уӕм мӕгуыртыл дӕлӕмӕ хӕцын хорз кӕсы? Цы уын загъдӕуа? Ӕппӕлгӕ уӕ ракӕнон? Нӕ, уый тыххӕй уӕ нӕ раппӕлдзынӕн.

²³Уымӕн ӕмӕ, Бардарӕгӕй цы базыдтон, ӕз уый сымахӕн дӕр бацамыдтон: гадзрахатӕй Йыл куы рацыдӕуыд, уыцы ӕхсӕв Бардарӕг Йесо райста дзул,

²⁴арфӕ ракодта Хуыцауӕн, асаста йӕ ӕмӕ загъта: «[Айсут ӕмӕ хӕрут] — уый Мӕ Буар у, ӕмӕ саст цӕуы уӕ сӕраппонд. Афтӕ кӕнут Мӕ ӕрымысынӕн».

²⁵Ӕхсӕвӕры фӕстӕ райста сӕны кӕхц дӕр ӕмӕ загъта: «Ацы кӕхц у Мӕ Тугӕй фидаргонд ног фидыд. Кӕдфӕнды дӕр дзы ма нуазат — Мӕ ӕрымысынӕн нуазут».

²⁶Уӕдӕ ацы дзулӕй куы фӕхӕрут ӕмӕ ацы сӕнӕй куы бануазут, уӕд уымӕй хъусын кӕнут Бардарӕджы мӕлӕты тыххӕй — цалынмӕ ӕрцӕуа, уӕдмӕ.

²⁷Аккаг аргъ сын нӕ кӕны, афтӕмӕй ацы дзул ӕмӕ ацы сӕнӕй чидӕриддӕр ахода, уый бацӕудзӕни Бардарӕджы Буар ӕмӕ Туджы тӕригъӕды.

²⁸Уӕдӕ алы адӕймаг дӕр ныккӕсӕд йӕ зӕрдӕмӕ ӕмӕ уый фӕстӕ хӕрӕд ацы дзулӕй ӕмӕ нуазӕд ацы сӕнӕй.

²⁹Бардарӕджы буарӕн аргъ чи нӕ кӕны, афтӕмӕй чи хӕры ӕмӕ нуазы, уый уыцы дзул ӕмӕ сӕнӕй йӕхи тӕрхойнаг кӕны.

³⁰Уымӕн сты сымахӕй бирӕтӕ ӕнӕбон ӕмӕ рынчын; мӕлгӕ дӕр уӕ дзӕвгар акодта.

³¹Нӕхӕдӕг рагацау нӕхицӕн тӕрхонгӕнӕг куы уаиккам, уӕд-иу тӕрхойнаг нӕ кӕниккам.

³²Фӕлӕ нын Бардарӕг тӕрхон куы фӕкӕны ӕмӕ нӕ куы бафхӕры, уӕд нӕ Уый афтӕмӕй сраст кӕны, цӕмӕй нын иннӕ дунеимӕ иумӕ тӕрхон ма кӕна.

³³Уымӕ гӕсгӕ, ме ’фсымӕртӕ, ӕхсӕвӕрмӕ куы ӕрӕмбырд вӕййут, уӕд-иу кӕрӕдзимӕ банхъӕлмӕ кӕсут.

³⁴Кӕд исчи ӕххормаг у, уӕд йӕ хӕдзары бахӕрӕд. Уе ’мбырдтӕ уын хъуамӕ сӕ фӕдыл тӕрхон ма сайой. Иннӕ хъуыддӕгтӕ банывыл кӕндзынӕн, мӕхӕдӕг уӕм куы ӕрцӕуон, уӕд.