Read Библи: Сыгъдӕг Эфесӕгтӕм 4 Bible Online

Эфесӕгтӕм 4 - Библи: Сыгъдӕг bible

Эфесӕгтӕм 4

¹Уӕдӕ ӕз — Бардарӕджы сӕраппонд ахӕст, курын сымахӕй, цӕмӕй уӕ цард уа, Хуыцау уын цы цардыхӕс снысан кодта, уый аккаг.

²Кӕддӕриддӕр ут сӕрныллӕг, ӕвӕлмас; уарзгӕйӕ быхсут кӕрӕдзийы хъуагдзинӕдтӕн.

³Уӕхи хъарут кӕрӕдзиимӕ ӕмуд уӕвыныл, кӕрӕдзийы уарзгӕйӕ цӕрут.

⁴Уд иу у, буар дӕр — иу, Хуыцау уӕм цы зӕрдӕдарӕнмӕ фӕсидтис, уыйау.

⁵Иу у Бардарӕг, иу — уырнындзинад, иу — аргъуыд;

⁶иу у Хуыцау — не ’ппӕты Фыд. Ӕппӕтӕй уӕлдӕр Уый у, алкӕй уылты дӕр ӕмӕ алкӕй мидӕг дӕр архайы.

⁷Махӕй алкӕмӕн дӕр лӕвӕрд уыдис хицӕн хорзӕх, Чырыстийы кӕмӕн цас раттын бафӕндыд, уыйас.

⁸Уымӕ гӕсгӕ Сыгъдӕг Фыст зӕгъы: «Ссыд уӕлӕмӕ, райста уацайрӕгты ӕмӕ адӕймӕгтӕн радта лӕвӕрттӕ».

⁹«Ссыд уӕлӕмӕ» та уӕд цы амоны, кӕд ӕмӕ, раздӕр дӕлдзӕхмӕ кӕй ныццыд, уымӕ нӕ амоны, уӕд?

¹⁰Чи ныццыд, ӕппӕт уӕлӕрвтӕй уӕлдӕр дӕр Уый ссыд, цӕмӕй дун-дунейӕн паддзахиуӕг кӕна.

¹¹Ӕмӕ Уый иуты сӕвӕрдта апостолтӕй, иннӕты — пехуымпартӕй, аннӕты — Фарны Уац хъусынгӕнджытӕй, кӕйдӕрты та — фыййӕуттӕй ӕмӕ ахуыргӕнджытӕй,

¹²цӕмӕй уыдон сыгъдӕджыты цӕттӕ кӕной Хуыцауӕн уазлӕггад кӕнынмӕ, ӕмӕ афтӕмӕй рӕза Чырыстийы Буар,

¹³цалынмӕ не ’ппӕт дӕр нӕ уырнындзинады ӕмуд не суӕм, Хуыцауы Фырты нӕ базонӕм ӕмӕ Чырыстийау алцӕмӕй дӕр ӕххӕст нӕ уӕм, уӕдмӕ.

¹⁴Уӕд нал уыдзыстӕм, алы ахуырӕдтӕ уылӕнтау кӕмӕй хъазынц ӕмӕ дымгӕйау кӕй ахӕссынц, ахӕм сабитӕ; сайынмӕ дӕсны чи у, уыдоны амӕттаг нал уыдзыстӕм.

¹⁵Фӕлӕ ӕнувыд уӕм ӕцӕгад ӕмӕ уарзтыл, алцӕмӕй дӕр суӕм Чырыстийы хуызӕн ӕмӕ баиу уӕм Йемӕ, Чырыстиимӕ, Буары Сӕримӕ.

¹⁶Уый у, йе уӕнгтӕ кӕрӕдзиуыл ӕнгом кӕмӕн хӕцынц, уыцы Буары иугӕнӕг: алы уӕнг дӕр кӕны йӕхи куыст, ӕмӕ афтӕмӕй Буар ӕгасӕй дӕр рӕз хӕссы ӕмӕ арӕзт цӕуы уарзондзинады фӕрцы.

¹⁷Уымӕ гӕсгӕ уын зӕгъын ӕмӕ Бардарӕджы номӕй фӕдзӕхсын, цӕмӕй мауал цӕрат, муртаттӕгтӕ сӕ рӕузонды аххосӕй куыд цӕрынц, афтӕ.

¹⁸Уыдонӕн сӕ зонд аныгъуылд талынджы, ӕнӕфенд ӕмӕ дурзӕрдӕ кӕй сты, уый аххосӕй ӕнӕхай фесты, Хуыцау цы цард дӕтты, уымӕй.

¹⁹Хъӕбӕрзӕрдӕтӕ систы ӕмӕ уымӕ гӕсгӕ бафтыдысты ӕлгъаг хъуыддӕгтыл, чъизи митӕй сын бафсис нал ис.

²⁰Сымах та афтӕ нӕ базыдтат Чырыстийы, ӕмӕ ахӕм цардӕй цӕрат.

²¹Уымӕн ӕмӕ сымах фехъуыстат Йесойы тыххӕй ӕмӕ Йӕ фӕрцы ӕцӕгадыл сахуыр стут, уымӕн ӕмӕ ӕцӕгад ис Чырыстийы мидӕг.

²²Сымах ахуыр кодтой уӕ раздӕры царды уаг ныууадзыныл, уӕ чъизи монцтӕ уӕ куы сайдтой ӕмӕ уӕ раууатмӕ куы тардтой, раздӕры уыцы цардӕй аздӕхыныл,

²³цӕмӕй сног уат уд ӕмӕ зондӕй

²⁴ӕмӕ суат, Хуыцауы сконды хуызӕн чи у, ӕцӕгадмӕ гӕсгӕ рӕстӕй ӕмӕ сыгъдӕгӕй чи цӕры, ахӕм ног адӕймӕгтӕ.

²⁵Уӕдӕ мӕнг ныхӕстӕ мауал кӕнут — алчидӕр йӕ хионӕн дзурӕд, ӕцӕг цы у, уый, уымӕн ӕмӕ мах стӕм иу буары уӕнгтӕ.

²⁶«Уӕ масты фӕдыл ма цӕут ӕмӕ уӕхимӕ тӕригъӕд ма исут»: дӕ мастӕй фервӕз, цалынмӕ хур нӕ аныгуылд, уӕдмӕ;

²⁷хӕйрӕджы уӕхимӕ ӕмгӕрон ма уадзут.

²⁸Чи давта, уый мауал давӕд, уый бӕсты кусӕд, йӕхи къухтӕй пайдайаг хъуыддӕгтӕ кӕнӕд, ӕмӕ йӕм уа, хъуаг чи ӕййафы, уымӕ фӕкӕсыны фаг дӕр.

²⁹Ӕнӕуаг ныхас ӕппындӕр ма схауӕд уӕ дзыхӕй, фӕлӕ, адӕймагӕн йӕ тыхсты чи феххуыс уыдзӕн ӕмӕ йӕ чи фӕфидар кӕндзӕн, ӕрмӕстдӕр ахӕм хорз ныхӕстӕ, — чи сӕ фехъуса, уыдонӕн фарны хос куыд уой, афтӕ.

³⁰Сыгъдӕг Уды хъыджы ма цӕут, уымӕн ӕмӕ уыл Ирвӕзындзинады бонмӕ сӕвӕрдӕуыд Йӕ мыхуыр.

³¹Мӕстыгӕр ӕмӕ знӕт уӕвын, хъӕр-хъӕлӕба, фыдгой ӕмӕ алы ӕндӕр фыдӕх — ӕппӕт уыдӕттӕ ныууадзут.

³²Цӕрут хӕларӕй, кӕрӕдзийы зындзинад уӕм хъарӕд, Хуыцау уын Чырыстийы фӕрцы куыд ныббарста, афтӕ хатыр кӕнут кӕрӕдзийӕн.