Read Библи: Сыгъдӕг Филиппӕгтӕм 2 Bible Online

Филиппӕгтӕм 2 - Библи: Сыгъдӕг bible

Филиппӕгтӕм 2

¹Уӕдӕ Чырыстиимӕ кӕй стут, уый уын кӕд исты ныфс дӕтты, кӕд уын Йӕ уарзондзинад циндзинад хӕссы ӕмӕ уын кӕд Сыгъдӕг Удимӕ иудзинад ис, кӕд хатырджын ӕмӕ тӕригъӕдгӕнаг стут,

²уӕд ноджыдӕр бафтаут мӕ циныл: тынг уарзут кӕрӕдзийы, ӕмуд ӕмӕ ӕмзонд ут.

³Пайда кӕнӕ хи стауыны охыл мацы аразут. Иу уӕ иннӕйы йӕхицӕй уӕлдӕр ӕвӕрӕд.

⁴Алкӕмӕн дӕр уӕ йӕ мӕт йӕхиуыл нӕ, фӕлӕ иннӕтыл уӕд.

⁵Сымах алцӕмӕ дӕр хъуамӕ кӕсат Йесо Чырыстийы цӕстӕй:

⁶Уый Йӕ ӕрдзыхъӕдмӕ гӕсгӕ уыди Хуыцау, фӕлӕ Йӕхи Хуыцауы ӕмсӕр не ’вӕрдта,

⁷фӕлӕ барвӕндонӕй ӕрныллӕнг кодта Йӕхи, адӕймаджы фӕлгонц райста ӕмӕ уыди адӕймаджы ӕнгӕс.

⁸Уый нӕ, фӕлӕ ма Йӕхи уымӕй ноджы фӕныллӕгдӕр кодта ӕмӕ сӕрныллӕгӕй мӕлӕт райста, дзуарылтыгъдӕй мӕлӕт.

⁹Ӕмӕ Йӕ Хуыцау афтӕ сбӕрзонд кодта, ӕмӕ Йын радта ӕппӕт нӕмттӕй дӕр уӕлдӕр ном,

¹⁰цӕмӕй Йесойы номы раз ӕрзоныг кӕной, уӕларв, зӕххыл ӕмӕ дӕлдзӕх чидӕриддӕр ис, уыдон иууылдӕр,

¹¹ӕмӕ Хуыцауы кадӕн алкӕй ӕвзаг дӕр расида, Йесо Чырысти — Бардарӕг, зӕгъгӕ.

¹²Мӕ уарзон хӕлӕрттӕ, сымах иудадзыг коммӕгӕс уыдыстут — ӕз уемӕ куы уыдтӕн, уӕд дӕр, уӕлдайдӕр та ныртӕккӕ, ӕз уемӕ куы нӕ дӕн, уӕд. Уӕдӕ тӕрсгӕ-ризгӕйӕ уӕхи хъарут уӕ фервӕзыныл,

¹³уымӕн ӕмӕ Хуыцау Йӕхӕдӕг кусы уӕ зӕрдӕты — фӕндон Ын чи у, уӕ уыцы бӕллицтӕ ӕмӕ хъуыддӕгтӕ Уымӕй рацӕуынц.

¹⁴Ӕппӕт дӕр кӕнут ӕнӕ хъуыр-хъуырӕй ӕмӕ ӕнӕ гуырысхойӕ,

¹⁵цӕмӕй уат Хуыцауы ӕнаипп, сыгъдӕг ӕмӕ ӕнӕфау хъӕбултӕ ацы ӕнӕуаг ӕмӕ хӕлд адӕмы ’хсӕн. Арвыл цы стъалытӕ ферттивы, сымах ахӕм стъалытау стут се ’хсӕн,

¹⁶Парахат кӕнут царддӕттӕг ныхас. Ӕмӕ, Чырысти куы ’рцӕуа, уӕд мӕ бон раппӕлын уыдзӕни, дзӕгъӕлы кӕй нӕ архайдтон, стӕй дзӕгъӕлы кӕй нӕ фӕкуыстон, уымӕй.

¹⁷Фӕлӕ мӕ, мыййаг, суанг нывондӕн куы ӕрхастӕуа ӕмӕ нывонды тугау мӕ туг уӕ уырнындзинады нывондыл куы акӕла, уӕд дӕр ӕз цин кӕнын, стӕй цин кӕнын уе ’ппӕтимӕ дӕр.

¹⁸Афтӕ цин кӕнут сымах дӕр, стӕй цин кӕнут мемӕ иумӕ дӕр!

¹⁹Бардарӕг Чырыстийы фӕрцы мӕ зӕрдӕ дарын сымахмӕ рӕхджы Тимофейы арвитыныл, цӕмӕй ӕз дӕр базонон уӕ уавӕрты тыххӕй ӕмӕ барухс уа мӕ зӕрдӕ.

²⁰Мӕнӕн ӕндӕр ахӕм адӕймаг нӕй, Тимофейау сымахыл афтӕ зӕрдиагӕй чи бамӕт кӕна.

²¹Иннӕтӕ иууылдӕр мӕт кӕнынц, Йесо Чырыстийӕн фӕндон цы у, ууыл нӕ, фӕлӕ сӕхи пайдайыл.

²²Тимофей фӕлтӕрд кӕй у, уый та зонут, уымӕн ӕмӕ, фырт йӕ фыды фарсмӕ куыд балӕууа, афтӕ мемӕ Фарны Уац хъусын кӕныныл куыста ӕнувыдӕй.

²³Дарддӕр мӕм цы ’нхъӕлмӕ кӕсы, уый куыддӕр базонон, афтӕ мӕ ныфс ис ӕвӕстиатӕй йӕ сымахмӕ арвитынӕй.

²⁴Бардарӕджы фӕрцы мӕ фидарӕй уырны, рӕхджы уӕм мӕхӕдӕг дӕр кӕй зындзынӕн, уый.

²⁵Ӕнӕмӕнг хъуыддагыл ма ноджы мӕхицӕн нымайын, бахъуаджы рӕстӕг мӕм ӕххуысмӕ кӕй ӕрбарвыстат, мӕ уыцы ӕфсымӕр, ӕмкусӕг ӕмӕ ӕмтохгӕнӕг Эпафродиты фӕстӕмӕ арвитын.

²⁶Уымӕн ӕмӕ тынг бӕллы уе ’ппӕты фенынмӕ дӕр ӕмӕ стыр мӕты бафтыд, йӕ фӕрынчыны хабар уӕм кӕй байхъуыст, уый тыххӕй.

²⁷Уыди рынчын ӕмӕ фӕцӕймард, фӕлӕ йын Хуыцау батӕригъӕд кодта, ӕмӕ ӕрмӕст уымӕн нӕ, фӕлӕ мӕнӕн дӕр, мӕ хъыгыл куыннӕуал бафта, афтӕ.

²⁸Уымӕ гӕсгӕ уӕм ӕй ӕрвитын ӕвӕстиатӕй, цӕмӕй уын йӕ фенд ӕрхӕсса цин, мӕнӕн та мӕ хъыг фӕкъаддӕр уа.

²⁹Уӕдӕ, Бардарӕгӕн ӕхсызгон куыд уа, афтӕ йыл сӕмбӕлут цинимӕ. Аргъ кӕнут ахӕмтӕн.

³⁰Чырыстийы хъуыддаджы сӕраппонд Эпафродит мӕлӕтмӕ цыди, йӕ цард ӕвгъау нӕ кодта, цӕмӕй, сымахӕн уӕ бон цы нӕ уыди, уыцы ӕххуыс мын уӕ бӕсты бакӕна.