Read Библи: Сыгъдӕг Нуны фырт Йешуа 1 Bible Online

Нуны фырт Йешуа 1 - Библи: Сыгъдӕг bible

Нуны фырт Йешуа 1

¹Дунедарӕджы цагъар Моисей куы амарди, уӕд Нуны фырт Йешуайӕн, Моисейы кӕстӕриуӕггӕнӕгӕн, Дунедарӕг загъта:

²«Мӕ цагъар Моисей амарди. Ныр бавдӕл ӕмӕ Израилы адӕмимӕ, Иорданы фале сын цы зӕхх дӕттын, уырдӕм бахиз.

³Уӕ къах кӕмдӕриддӕр ӕрӕвӕрат, уыцы бынӕттӕ иууылдӕр Ӕз лӕвар кӕнын сымахӕн, Моисейӕн зӕрдӕ куыд бавӕрдтон, афтӕ.

⁴Ӕдзӕрӕг быдыр ӕмӕ Ливаны хӕхтӕй Евфраты стыр цӕугӕдоны онг (ноджы ма хеттӕгты зӕхх иууылдӕр), стӕй Зӕххастӕуы денджызы онг ныгуылӕны — уыцы зӕххытӕ иууылдӕр суыдзысты уӕ бӕстӕ.

⁵Цард-цӕрӕнбонты дӕ ныхмӕ ничи фӕлӕудзӕн, уымӕн ӕмӕ Ӕз, Моисейыл куыд аудыдтон, афтӕ ауддзынӕн дӕуыл дӕр. Мӕхи дыл нӕ атигъ кӕндзынӕн, нӕ дӕ ныууадздзынӕн.

⁶Фидар лӕуу ӕмӕ ма фӕтас! Афтӕ бакӕн, цӕмӕй ацы бӕстӕ Израилы адӕмӕн суа фыдӕй-фыртмӕйы исбон, уымӕн ӕмӕ Ӕз сӕ фыдӕлтӕн сомы ракодтон йӕ раттыны тыххӕй!

⁷Уӕдӕ фидар лӕуу ӕмӕ ма фӕтас! Дӕхи хъар, Мӕ цагъар Моисей дын цы Ӕгъдау бафӕдзӕхста, уый ӕнӕхъӕнӕй ӕххӕст кӕныныл! Мадӕр дзы рахизӕрдӕм ахиз, мадӕр галиуӕрдӕм, ӕмӕ уӕд дӕ аразинӕгтӕ иууылдӕр дӕ къухы ӕфтдзысты.

⁸Ӕгъдауы чиныджы дзырд дӕ былалгъыл уӕд иудадзыг, фӕлхат ӕй кӕн бон дӕр ӕмӕ ӕхсӕв дӕр, иууылдӕр сӕ лӕмбынӕг ӕххӕст кӕн, — уӕд уыдзынӕ фӕрнӕйдзаг ӕмӕ ӕнтыстджын.

⁹Фӕдзӕхсын дын: фидар лӕуу ӕмӕ ма фӕтас, ӕппындӕр мацӕмӕй тӕрс — цыдӕриддӕр аразай, уым демӕ уыдзӕни Дунедарӕг, дӕ Хуыцау».

¹⁰Уӕд Йешуа йӕ адӕмы цӕстдарджытӕн бардзырд радта,

¹¹цӕмӕй рӕсӕнуатыл ӕрзилой ӕмӕ адӕмӕн зӕгъой: «Уӕхицӕн фӕндаггаг хӕлц ӕрцӕттӕ кӕнут, уымӕн ӕмӕ ӕртӕ боны фӕстӕ Иорданы фаллаг фарсмӕ бахиздзыстут, Дунедарӕг, уӕ Хуыцау, сымахӕн исбонӕн цы зӕхх дӕтты, уый байсынмӕ».

¹²Рувимы ӕмӕ Гады хӕдзарвӕндӕгтӕн, стӕй Менассиайы хӕдзарвӕндаджы ӕмбисӕн та Йешуа загъта:

¹³«Дунедарӕджы цагъар Моисей уын афтӕ куы дзырдта, Дунедарӕг, уӕ Хуыцау, сымахӕн ӕнцой ӕрхаста, ацы зӕхх уын радта, зӕгъгӕ, уӕд уын цы бафӕдзӕхста, уый уӕ зӕрдыл ӕрлӕууын кӕнут.

¹⁴Уӕ устытӕ, уӕ сывӕллӕттӕ ӕмӕ уӕ фос баззайӕнт, Моисей уын Иорданы ацы фарс цы зӕхх радта, уым, сымахӕй та хӕцынхъом чидӕриддӕр у, уыдон хӕстифтонгӕй бахизӕнт фаллаг фарсмӕ, уе ’фсымӕртӕн сӕ разӕй. Баххуыс сын кӕнут,

¹⁵Дунедарӕг сымах хуызӕн уыдонӕн дӕр цалынмӕ ӕнцой ӕрхӕсса, уӕдмӕ. Дунедарӕг, уӕ Хуыцау, уыдонӕн цы зӕхх дӕтты, уый куы райсой уе ’фсымӕртӕ дӕр, уӕд фӕстӕмӕ раздӕхут ӕмӕ уӕ исбон уыдзӕни, Дунедарӕджы цагъар Моисей уын Иорданӕй скӕсӕнӕрдӕм цы зӕхх радта, уый».

¹⁶Уыдон Йешуайӕн дзуапп радтой: «Цыдӕриддӕр нын бафӕдзӕхсай, уый сараздзыстӕм, кӕдӕмдӕриддӕр нӕ ӕрвитай, уырдӕм ацӕудзыстӕм.

¹⁷Моисейы коммӕ ӕдзух куыд кастыстӕм, афтӕ дӕ коммӕ дӕр кӕсдзыстӕм, ӕрмӕст Дунедарӕг, дӕ Хуыцау, демӕ уӕд, Моисеимӕ куыд уыдис, афтӕ.

¹⁸Дӕ бардзырдтӕ, дӕ фӕдзӕхстытӕм дын чи нӕ хъуса, чи нӕ сӕ ӕххӕст кӕна, уый-иу мард ӕрцӕуӕд. Ӕрмӕст нын дӕхӕдӕг макуы фӕцуд, фидар лӕуу!»