Read Библи: Сыгъдӕг Нуны фырт Йешуа 17 Bible Online

Нуны фырт Йешуа 17 - Библи: Сыгъдӕг bible

Нуны фырт Йешуа 17

¹Йӕ хал схаудта Йосефы фыццаг зӕнӕг Менассиайы хӕдзарвӕндагӕн дӕр. Менассиайы фыццаг зӕнӕг Махирӕн — Галаады фыдӕн — йӕ байзӕддӕгтӕ хъӕбатыр хӕстонтӕ кӕй уыдысты, уымӕ гӕсгӕ сӕ хай — Галаад ӕмӕ Башан — райстой раздӕр.

²Уыцы халмӕ гӕсгӕ зӕххытӕ райстой Менассиайы байзӕддаджы иннӕ мыггӕгтӕ дӕр: Авиезеры мыггаг, Хелекы мыггаг, Асриелы мыггаг, Шехемы мыггаг, Хеферы мыггаг, Шемидайы мыггаг. Авиезер, Хелек, Асриел, Шехем, Хефер, Шемида сты Йосефы фырт Менассиайы нӕлгоймаг-байзӕддӕгтӕ ӕмӕ сӕ мыггӕгты фыдӕлтӕ.

³Цалфахадӕн (йӕ фыдӕлтӕ хистӕрӕй кӕстӕрмӕ: Менассиа, Махир, Галаад ӕмӕ Хефер) фырттӕ нӕ уыди, фӕлӕ ӕрмӕст чызджытӕ: Махла, Ноа, Хогла, Милка ӕмӕ Тирца.

⁴Чызджытӕ сауджын Елеазармӕ, Нуны фырт Йешуамӕ ӕмӕ адӕмы хицӕуттӕм бацыдысты ӕмӕ сын загътой: «Дунедарӕг Моисейӕн бафӕдзӕхста не ’фсымӕрты ӕмрӕнхъ махӕн дӕр фыдӕй-фыртмӕйы исбонӕн зӕххытӕ раттын». Ӕмӕ сын Дунедарӕджы фӕдзӕхстмӕ гӕсгӕ сӕ фыды ӕфсымӕртау лӕвӕрд ӕрцыди зӕххытӕ.

⁵Афтӕмӕй Иорданы скӕсӕнварс Галаады ӕмӕ Башаны зӕххытӕй уӕлдай Менассиайы хӕдзарвӕндагмӕ ӕрхауди дӕс хайы,

⁶уымӕн ӕмӕ Менассиайы байзӕддӕгтӕ, чызджытӕ, фыдӕй-фыртмӕйы исбон райстой йӕ нӕлгоймаг байзӕддӕгты ӕмрӕнхъ. Галаады зӕхх та ӕрхауди Менассиайы иннӕ байзӕддӕгтӕм.

⁷Менассиайы зӕхх Ашерӕй аххӕссыд Михметаты онг, уый ис Шехемы акомкоммӕ. Уырдыгӕй Менассиайы арӕн йӕхи айтыгъта хуссарӕрдӕм, Ен-Таппуахы донгуырӕны цур Йашувы онг.

⁸Таппуахы алыварс зӕхх баци Менассиайы хай, Менассиайы арӕныл Таппуахы сахар йӕхӕдӕг та — Ефремы байзӕддӕгты хай.

⁹Дарддӕр арӕн ӕрхызти Канайы тӕрфмӕ. Уырдыгӕй хуссарӕрдӕм сахартӕ сты Ефремы, кӕд Менассиайы сахарты ӕхсӕн сты, уӕддӕр. Дарддӕр Менассиайы арӕн цыди тӕрфы цӕгатвӕрсты ӕмӕ ӕххӕссыди суанг Зӕххастӕуы денджызмӕ.

¹⁰Хуссары зӕххытӕ сты Ефремы, цӕгаты зӕххытӕ та — Менассиайы. Сӕ арӕн уыди Зӕххастӕуы денджыз. Цӕгатӕрдыгӕй ӕмарӕн уыдысты Асиримӕ, скӕсӕнӕрдыгӕй та — Иссахаримӕ.

¹¹Иссахары ӕмӕ Асиры зӕххыл Менассиамӕ ӕрхаудысты Бет-Шеан, Ивлеам, Дор, Ен-Дор, Таанах ӕмӕ Мегиддо сӕ сахаргӕрӕттимӕ.

¹²Фӕлӕ Менассиайы байзӕддӕгты бон нӕ бацис уыцы сахартӕ байсын, ӕмӕ ханаанӕгтӕ ацы зӕххыл цӕргӕйӕ баззадысты.

¹³Фӕстӕдӕр та израилӕгтӕ сӕ тыхы куы бацыдысты, уӕд ханаанӕгтӕй цагъайрӕгтӕ скодтой, фӕлӕ сӕ нӕ фӕсырдтой.

¹⁴Иуахӕмы Йосефы байзӕддӕгтӕ Йешуайӕн загътой: «Иунӕг хал нын цӕмӕн сӕппӕрстай ӕмӕ нын иу хай йеддӕмӕ цӕуылнӕ радтай фыдӕй-фыртмӕйы исбонӕн, Дунедарӕджы арфӕйӕ тынг куы сбирӕ стӕм, уӕд?»

¹⁵Йешуа сын дзуапп радта: «Кӕд афтӕ сбирӕ стут, ӕмӕ уын Ефремы хӕхбӕстӕ скъуындӕг ис, уӕд марадзут, хъӕдбӕстӕм балидзут ӕмӕ уым периззӕгтӕ ӕмӕ рефаимты зӕххыл уӕхицӕн бынат ӕрсыгъдӕг кӕнут».

¹⁶Йосефы байзӕддӕгтӕ загътой: «Хӕхбӕстӕ нын скъуындӕг ис цӕрынӕн. Дӕлвӕзы чи цӕры, уыцы ханаанӕгтӕм та — Бет-Шеан ӕмӕ йӕ сахаргӕрӕтты, стӕй Изреелы дӕлвӕзы — ис ӕфсӕндзагъд хӕстон уӕрдӕттӕ».

¹⁷Уӕд Йешуа Йосефы хӕдзарвӕндагӕн — Ефремы ӕмӕ Менассиайы байзӕддӕгтӕн — загъта: «Бирӕ адӕм стут, ӕмӕ уӕ хъару дӕр бирӕ у. Уымӕ гӕсгӕ иу халӕй нӕ ахицӕн уыдзӕн уӕ хай,

¹⁸фӕлӕ хъӕдбыны хӕхбӕстӕ дӕр сымах уыдзӕн. Ӕрсыгъдӕг ӕй кӕнут, ӕмӕ хохрӕбынтимӕ уӕхи бауыдзӕн. Ханаанӕгтӕм та кӕд ӕфсӕндзагъд уӕрдӕттӕ ис ӕмӕ цыфӕнды тыхджын сты, уӕддӕр сӕ фӕсурдзыстут».