Read Библи: Сыгъдӕг Нуны фырт Йешуа 18 Bible Online

Нуны фырт Йешуа 18 - Библи: Сыгъдӕг bible

Нуны фырт Йешуа 18

¹Израилы адӕм ӕрӕмбырд сты Силомы ӕмӕ уым ӕрӕвӕрдтой Хуыцауимӕ Фембӕлды Цатыр. Уӕдмӕ бӕстӕ иууылдӕр сӕ къухы уыд.

²Фӕлӕ Израилы хӕдзарвӕндӕгтӕй авдыл сӕ фыдӕй-фыртмӕйы исбон уӕрст нӕма ӕрцыд.

³Йешуа израилӕгтӕн загъта: «Дунедарӕг, уӕ фыдӕлты Хуыцау, сымахӕн цы бӕстӕ радта, уый райсынмӕ цӕуылнӕ ацӕут? Цы боны хорзмӕ ма ӕнхъӕлмӕ кӕсут?

⁴Алы хӕдзарвӕндагӕй дӕр фӕйнӕ ӕртӕ лӕджы равзарут. Ӕз сӕ арвитдзынӕн бӕстӕйыл ӕрзилынмӕ. Йӕ нывӕц ын биноныг ӕрфыссӕнт ӕмӕ бахынцӕнт, зӕххы хӕйттыл ӕй куыд адих кӕнӕн ис, уый, стӕй мӕм ӕрбаздӕхӕнт фӕстӕмӕ.

⁵Бӕстӕ авд хайыл адих кӕнӕнт. Иудӕйы байзӕддӕгтӕ хуссары сӕ зӕххы хайыл баззайӕнт, Йосефы хӕдзарвӕндаг дӕр йӕ зӕххыл баззайӕд цӕгаты.

⁶Сымах та бӕстӕйы иннӕ хай биноныг ӕрфыссут ӕмӕ йӕ авд хайыл куыд адих кодтат, уый ӕрфыст мӕм ӕрбахӕссут: ӕз уын ам хӕлттӕ сӕппардзынӕн Дунедарӕджы, нӕ Хуыцауы, раз.

⁷Левийы байзӕддӕгтӕн сымахимӕ хай нӕй — Дунедарӕджы сауджынтӕ кӕй сты, уый у сӕ исбон. Гад, Рувим ӕмӕ Менассиайы хӕдзарвӕндаджы ӕмбис та фыдӕй-фыртмӕйы исбон райстой Иорданы скӕсӕнварс, Дунедарӕджы цагъар Моисей сын ӕй радта».

⁸Йешуа, зӕхх ӕрфыссынмӕ чи цыди, уыдонӕн бафӕдзӕхста: «Марадзут, бӕстӕйыл ӕрзилут, биноныг ын ӕрфыссут йӕ нывӕц ӕмӕ мӕм уый фӕстӕ ӕрбаздӕхут. Ӕз та уын ам, Силомы, Дунедарӕджы раз хӕлттӕ сӕппардзынӕн».

⁹Уыдон бӕстӕйыл ӕрзылдысты ӕмӕ йӕ авд хайыл дихгондӕй чиныджы ӕрфыстой сахарты номхыгъдимӕ, стӕй ӕрбаздӕхтысты Йешуамӕ — Силомы сахары цур йӕ рӕсӕнуатмӕ.

¹⁰Силомы, Дунедарӕджы раз, Йешуа хӕлттӕ сӕппӕрста ӕмӕ Израилы хӕдзарвӕндӕгтыл зӕхх байуӕрста.

¹¹Фыццаг схаудта Бениамины хӕдзарвӕндаджы мыггӕгты хал. Йӕ зӕххыты хай уыди Иудӕйы байзӕддаджы ӕмӕ Йосефы байзӕддаджы зӕххыты ’хсӕн.

¹²Йӕ цӕгатаг арӕн райдыдта Иорданӕй, базылди Йерихоны цӕгатварсӕрдӕм, дарддӕр йе ’ргом сарӕзта ныгуылӕнӕрдӕм ӕмӕ схызти хӕхтӕм, стӕй йӕхи айтыгъта Бет-Авены цур ӕдзӕрӕг быдырмӕ.

¹³Уырдыгӕй арӕн бацыди Лузы (ома Вефилы) сахары ’рдӕм, йӕ хуссарварсмӕ, ӕмӕ ӕрхызти Атрот-Аддармӕ, Дӕллаг Бет-Хоронӕй хуссарӕрдӕм цы хох уыди, уымӕ.

¹⁴Ам, ныгуылӕны, арӕн фӕзылди хуссармӕ: Бет-Хороны хуссарварс цы хох ис, уымӕй йӕхи айтыгъта Иудӕйы байзӕддӕгты сахар Кирйат-Баалы (ома Кирйат-Иаримы) онг. Уый уыди йӕ ныгуылӕйнаг арӕн.

¹⁵Хуссайраг арӕн райдыдта Кирйат-Иаримы цур ӕмӕ хӕццӕ кодта Нефтоахы донгуырӕны онг.

¹⁶Уырдыгӕй арӕн ӕрхызти Хинномы фырты дӕлвӕзы акомкоммӕ ӕмӕ, Рефаимы дӕлвӕзы цӕгатварс цы хох ис, уый фахсмӕ. Стӕй Хинномы дӕлвӕзыл ӕрхызти йевусӕгты къуылдымы хуссарварсмӕ ӕмӕ фӕуырдыг кодта Ен-Рогелы донгуырӕнмӕ.

¹⁷Дарддӕр арӕн фӕзылди цӕгатӕрдӕм, бахӕццӕ Ен-Шемешмӕ, бахызт Адуммимы хӕрды акомкоммӕ Гелилотмӕ ӕмӕ фӕуырдыг кодта Рувимы фырт Боханы къӕдзӕхы ’рдӕм.

¹⁸Стӕй бахӕццӕ Бет-Аравӕйы цӕгатварсмӕ ӕмӕ ӕрхызт Иорданы дӕлвӕзмӕ.

¹⁹Дарддӕр йӕхи айтыгъта Бет-Хоглайы цӕгатварсӕрдӕм ӕмӕ банцади Мард денджызы цӕгатаг былгӕроныл, Иордан денджызмӕ кӕм кӕлы, уым. Уый уыди хуссайраг арӕн, Иордан та — скӕсӕйнаг арӕн.

²⁰Ацы зӕххытӕ сӕ алыварс арӕнтимӕ уыдысты Бениамины байзӕддӕгты, се ’ппӕт мыггӕгты фыдӕй-фыртмӕйы исбон.

²¹Бениамины хӕдзарвӕндаджы мыггӕгты сахартӕ уыдысты: Йерихон, Бет-Хогла, Емек-Кециц,

²²Бет-Аравӕ, Цемараим, Вефил,

²³Аввим, Пара, Офра,

²⁴Кефар-Аммони, Офни ӕмӕ Гевӕ — дыууадӕс сахары сӕ алыварс хъӕутимӕ.

²⁵Гивон, Рама, Беерот,

²⁶Мицпе, Кефира, Моца,

²⁷Рекем, Ирпеел, Тарала,

²⁸Цела-Елеф, Йевус (ома Йерусалим), Гевӕ ӕмӕ Кирйат-Иарим — цыппӕрдӕс сахары сӕ алыварс хъӕутимӕ. Ахӕм уыди мыггаггай Бениамины байзӕддӕгты фыдӕй-фыртмӕйы исбон.