Read Библи: Сыгъдӕг Нуны фырт Йешуа 19 Bible Online

Нуны фырт Йешуа 19 - Библи: Сыгъдӕг bible

Нуны фырт Йешуа 19

¹Дыккаг схаудта Симеоны хӕдзарвӕндаджы мыггӕгты хал. Йӕ зӕххыты хай уыдис Иудӕйы байзӕддаджы зӕххыты ’хсӕн.

²Симеоны зӕххы хаймӕ хаудтой: Беер-Шевӕ кӕнӕ Шевӕ, Молада,

³Хацар-Шуал, Бала, Эцем,

⁴Елтолад, Бетул, Хорма,

⁵Циклаг, Бет-Маркавот, Хацар-Суса,

⁶Бет-Леваот ӕмӕ Шарухен — ӕртындӕс сахары сӕ алыварс хъӕутимӕ;

⁷Аин, Риммон, Етер ӕмӕ Ашан — цыппар сахары сӕ алыварс хъӕутимӕ,

⁸стӕй ацы сахарты алыварс суанг Баалат-Бееры ӕмӕ Рамат-Негевы онг цы хъӕутӕ уыдис, уыдон иууылдӕр. Ахӕм уыди Симеоны хӕдзарвӕндаджы мыггӕгты фыдӕй-фыртмӕйы исбон.

⁹Лӕвӕрд сын ӕрцыд Иудӕйы байзӕддӕгты зӕххытӕй. Иудӕйы хӕдзарвӕндагӕн сӕ зӕххы хай егъау кӕй уыди, уымӕ гӕсгӕ Симеоны байзӕддӕгтӕ фыдӕй-фыртмӕйы исбон райстой уыдоны зӕххыты ’хсӕн.

¹⁰Ӕртыккаг схаудта Зевулоны байзӕддӕгты хал — мыггаггай. Сӕ зӕххы хай хӕццӕ кодта Сариды онг.

¹¹Ныгуылӕнӕрдӕм ссыди Маралайы онг, бахӕццӕ Даббешетмӕ ӕмӕ, Йокнеамы раз цы тӕрф ис, ууыл ӕрлӕууыд.

¹²Саридӕй скӕсӕнӕрдӕм та арӕн ахӕццӕ Кислот-Таворы зӕххыты онг, уырдыгӕй ахызти Давератмӕ ӕмӕ ссыди Йафиамӕ.

¹³Ардыгӕй дарддӕр скӕсӕнӕрдӕм цыди Гат-Хефермӕ ӕмӕ Ет-Кацинмӕ, ахызт Риммонмӕ ӕмӕ фӕзылд Неамӕ.

¹⁴Дарддӕр цӕгатаг арӕн цыди ныгуылӕнӕрдӕм, цӕгатӕй ӕрзылд Ханнатоныл ӕмӕ Ифтах-Елы дӕлвӕзы ӕрлӕууыд.

¹⁵Зевулоны зӕххытӕм хаудтой Каттат, Нахалал, Шимрон, Идала ӕмӕ Вифлеем. Ӕдӕппӕт дыууадӕс сахары сӕ алыварс хъӕутимӕ.

¹⁶Ахӕм уыди Зевулоны байзӕддӕгты фыдӕй-фыртмӕйы зӕххы хай мыггаггай. Уыдон сты сӕ сахартӕ сӕ алыварс хъӕутимӕ.

¹⁷Цыппӕрӕм схаудта Иссахары байзӕддӕгты хал мыггаггай.

¹⁸Сӕ зӕххы хаймӕ хаудтой Изреел, Кесуллот, Шунем,

¹⁹Хафараим, Шион, Анахарат,

²⁰Раббит, Кишион, Евец,

²¹Ремет, Ен-Ганним, Ен-Хадда ӕмӕ Бет-Паццец.

²²Арӕн цӕгаты хӕццӕ кодта Фаворы хохмӕ, Шахацим ӕмӕ Бет-Шемешмӕ, скӕсӕны та банцад Иорданыл. Ӕдӕппӕт ӕхсӕрдӕс сахары сӕ алыварс хъӕутимӕ.

²³Ахӕм уыд Иссахары хӕдзарвӕндаджы зӕххы хай мыггаггай. Уыдон сты сӕ сахартӕ сӕ алыварс хъӕутимӕ.

²⁴Фӕндзӕм схаудта Асиры хӕдзарвӕндаджы хал мыггаггай.

²⁵Сӕ зӕххы хаймӕ хаудтой Хелкат, Хали, Бетен, Ахшаф,

²⁶Аламелех, Амад ӕмӕ Мишал. Сӕ хуссайраг арӕн ныгуылӕнӕрдыгӕй хӕццӕ кодта Кармелы хохмӕ ӕмӕ Шихор-Ливнаты тӕрфмӕ.

²⁷Скӕсӕнӕрдӕм та арӕн цыд Бет-Дагонмӕ ӕмӕ цӕгатӕрдыгӕй Ифтах-Елы дӕлвӕзмӕ ӕввахс хӕццӕ кодта Зевулоны зӕххытӕм. Дарддӕр арӕн цыд Бет-Емек ӕмӕ Неиелмӕ ӕмӕ цӕгатӕрдӕм Кавулмӕ бахызт.

²⁸Ноджыдӕр Асиры зӕххытӕм хаудтой Еврон, Рехов, Хаммон ӕмӕ Кана. Арӕн хӕццӕ кодта Стыр Сидоны онг,

²⁹дарддӕр фӕзылд Рамамӕ, бацыди фидар сахар Тиры онг, фӕзылди Хосамӕ ӕмӕ Зӕххастӕуы денджызы былгӕрӕттыл банцад. Уымӕй уӕлдай Асиры зӕххытӕм хаудтой Махалав, Ахзив,

³⁰Умма, Афек ӕмӕ Рехов. Ӕдӕппӕт дыууӕ ӕмӕ ссӕдз сахары сӕ алыварс хъӕутимӕ.

³¹Ахӕм уыдис Асиры хӕдзарвӕндаджы мыггӕгты фыдӕй-фыртмӕйы исбон. Адон уыдысты сӕ сахартӕ сӕ алыварс хъӕутимӕ.

³²Неффалимы байзӕддӕгтӕн, се ’ппӕт мыггӕтӕн, сӕ хал уыдис ӕхсӕзӕм.

³³Сӕ зӕххы хуссайраг арӕн Хелефӕй ӕмӕ Цаананнимы тулдзӕй скӕсӕнӕрдӕм йӕхи айтыгъта Адами-Некевмӕ ӕмӕ Йавнелмӕ, бахӕццӕ Лакуммӕ ӕмӕ Иорданыл банцад.

³⁴Ныгуылӕнӕрдӕм арӕн фӕзылд Азнот-Тавормӕ, уырдыгӕй та — Хукокмӕ. Хуссарӕрдыгӕй Неффалимы зӕххы ӕмарӕн уыди Зевулоны зӕхх, ныгуылӕнӕрдыгӕй — Асиры зӕхх, скӕсӕнӕрдыгӕй та, Иорданы былыл, — Иудӕйы зӕхх.

³⁵Неффалимы зӕххы хаймӕ хаудтой фидар сахартӕ Циддим, Цер, Хаммат, Раккат, Киннерет,

³⁶Адама, Рама, Хацор,

³⁷Кедеш, Едреи, Ен-Хацор,

³⁸Ирон, Мигдал-Ел, Хорем, Бет-Анат ӕмӕ Бет-Шемеш. Ӕдӕппӕт нудӕс сахары сӕ алыварс хъӕутимӕ.

³⁹Ахӕм уыд Неффалимы хӕдзарвӕндаджы фыдӕй-фыртмӕйы зӕххы хай мыггаггай. Уыдон сты сӕ сахартӕ сӕ алыварс хъӕутимӕ.

⁴⁰Даны хӕдзарвӕндаджы мыггӕгтӕн сӕ хал уыд ӕвдӕм.

⁴¹Сӕ зӕххы хаймӕ хаудтой Цора, Ештаол, Ир-Шемеш,

⁴²Шаалвим, Айалон, Итла,

⁴³Елон, Тимна, Екрон,

⁴⁴Елтехъе, Гиббетон, Баалат,

⁴⁵Йехуд, Бене-Берак, Гат-Риммон,

⁴⁶Ме-Иаркон ӕмӕ Раккон, стӕй Яффойы бакомкоммӕ зӕххытӕ.

⁴⁷Даны хӕдзарвӕндаг фӕстӕдӕр, сӕ зӕхх куы фесӕфтой, уӕд ссыдысты Лешеммӕ, балӕбурдтой йӕм, бацахстой йӕ ӕмӕ йын йӕ адӕмы кардӕй ныццагътой. Ацы сахар сси сӕ фыдӕй-фыртмӕйы исбон, ӕрцардысты дзы ӕмӕ йӕ сӕ фыдӕл Даны кадӕн схуыдтой Дан.

⁴⁸Ахӕм уыд Даны хӕдзарвӕндаджы фыдӕй-фыртмӕйы зӕххы хай мыггаггай. Уыдон сты сӕ сахартӕ алыварс хъӕутимӕ.

⁴⁹Израилӕгтӕ зӕххытӕ куы байуӕрстой, уӕд Нуны фырт Йешуайӕн сӕ зӕххытӕй радих кодтой хай — фыдӕй-фыртмӕйы исбонӕн.

⁵⁰Дунедарӕджы фӕдзӕхстмӕ гӕсгӕ йын радтой, Йешуа йӕхицӕн кӕй куырдта, уыцы сахар Тимнат-Серах, Ефремы хӕхбӕсты. Йешуа сахар рацарӕзта ӕмӕ дзы царди.

⁵¹Ацы зӕххытӕ сты, сауджын Елеазар, Нуны фырт Йешуа ӕмӕ Израилы мыггӕгты хистӕртӕ хӕдзарвӕндӕгтӕн хӕлттӕм гӕсгӕ Силомы, Дунедарӕджы раз, Фембӕлды Цатырмӕ бацӕуӕны цур цы зӕххы хӕйттӕ байуӕрстой, уыдон. Уыйадыл зӕххытӕ уӕрст фесты.