Read Библи: Сыгъдӕг Нуны фырт Йешуа 2 Bible Online

Нуны фырт Йешуа 2 - Библи: Сыгъдӕг bible

Нуны фырт Йешуа 2

¹Нуны фырт Йешуа Ситтимӕй дыууӕ сгарӕджы арвыста сусӕгӕй, бафӕдзӕхста сын: «Цӕут, фенут уыцы зӕхх, уӕлдайдӕр — Йерихон». Сгарджытӕ араст сты Йерихонмӕ ӕмӕ уым се ’хсӕв бахастой иу хӕтаг сылгоймаг Рахавы хӕдзармӕ.

²Йерихоны паддзахмӕ дзырд бахастӕуыд: «Ахсӕв нӕ сахары фӕзынд израилаг сгарджыты къорд».

³Ӕмӕ паддзах йӕ чапарты барвыста Рахавмӕ ахӕм бардзырдимӕ: «Дӕ уазджыты нӕм ракӕн! Сгарджытӕ сты, нӕ бӕстӕ басгарынмӕ нын ӕрбацыдысты».

⁴Фӕлӕ сылгоймаг уӕдмӕ дыууӕ лӕджы йӕ уӕлхӕдзар гӕны куыристы бын бамбӕхста, адонӕн та загъта: «Ӕцӕгдӕр мӕм чидӕртӕ уыди, фӕлӕ кӕцон сты, уый нӕ базыдтон. Изӕрӕрдӕм, сахары кулдуар сӕхгӕныны хӕдразмӕ, ацыдысты. Кӕцырдӕм, уый нӕ зонын, фӕлӕ сӕ ацы сахат куы асурат, уӕд сӕ, чи зоны, баййафат».

⁷Фӕдисӕттӕ Иорданы ’рдӕм атындзыдтой, донахизӕнты раз балӕууыдысты. Сахарӕй куыд федде сты, афтӕ сахары кулдуар ӕхгӕд ӕрцыд.

⁸Сгарджытӕ цалынмӕ нӕма бахуыссыдысты, уӕдмӕ сӕм Рахав уӕлхӕдзармӕ схызт

⁹ӕмӕ сын загъта: «Зонын ӕй, Дунедарӕг ацы зӕхх сымахӕн кӕй радта, уый. Ӕмӕ нӕ стыр тасы бафтыдтат, нӕ бӕстӕйы цӕрджытӕ иууылдӕр ӕмризӕджы ризынц.

¹⁰Уымӕн ӕмӕ фехъуыстам, Мысырӕй фӕндагыл уын Дунедарӕг Сырх денджыз уӕ размӕ куыд байсысын кодта ӕмӕ Иорданы фале дыууӕ амораг паддзахӕн, Сигонӕн ӕмӕ Огӕн, сӕ быныхъӕр куыд ссӕуын кодтат.

¹¹Уыдӕттӕ куы фехъуыстам, уӕд тас бацыди нӕ зӕрдӕты ӕмӕ нӕ иумӕ дӕр уӕ ныхмӕ ӕрлӕууыны ныфс нал ис, уымӕн ӕмӕ базыдтам: Дунедарӕг, уӕ Хуыцау, ӕлдариуӕг кӕны уӕларвыл дӕр ӕмӕ зӕххыл дӕр, уӕле дӕр ӕмӕ дӕле дӕр.

¹²Уӕдӕ мын Дунедарӕгӕй ард бахӕрут, ӕз уын хорзы куыд бацыдтӕн, афтӕ сымах дӕр мӕ бинонтӕн хорзы кӕй бацӕудзыстут. Бӕлвырд ӕвдисӕйнаг мын раттут,

¹³мӕ фыды ӕмӕ мын мӕ мады, ме ’фсымӕрты ӕмӕ мӕ хоты се ’ппӕт хӕдзаронтимӕ сӕрӕгасӕй кӕй ныууадздзыстут, адзалӕй нӕ кӕй бахиздзыстут».

¹⁴Сгарджытӕ йын загътой: «Хуыцауы фыдӕх нӕ баййафӕд, искӕй сӕрӕй уӕ ӕрду дӕр куы ӕрхауа, уӕд. Ӕрмӕст ам кӕй стӕм, уый ма схъӕр кӕнут. Дунедарӕг нын ацы зӕхх куы ратта, уӕд нӕ дзырд нӕ фӕсайдзыстӕм, хорзы дын бацӕудзыстӕм».

¹⁵Рахавы хӕдзар уыди сахары сисы мидӕг, ӕмӕ сӕ рудзынгӕй ӕруагъта бӕндӕныл.

¹⁶Загъта сын: «Хӕхтӕм уал уӕхи айсут, фӕдисӕттӕ уыл куыннӕ амбӕлой, афтӕ ӕмӕ уым ӕртӕ боны дӕргъы ӕмбӕхстӕй абадут, цалынмӕ адон фӕстӕмӕ ӕрбаздӕхой, уӕдмӕ, стӕй уӕхионтӕм ацӕудзыстут».

¹⁷Сгарджытӕ йын загътой: «Цы ард дын бахордтам, уымӕй сӕрибар уыдзыстӕм, мӕнӕ афтӕ куынӕ бакӕнай, уӕд.

¹⁸Уӕ бӕстӕмӕ уын куы ӕрбабырсӕм, уӕд нӕ цы рудзынгыл ӕруагътай, ууыл-иу ацы сырх бӕндӕн бабӕтт, стӕй дӕ фыды ӕмӕ дӕ мады, де ’фсымӕрты ӕмӕ де ’ппӕт хӕстӕджыты дӕ хӕдзары ӕрӕмбырд кӕн.

¹⁹Дӕ хӕдзары дуарӕй ӕддӕмӕ чидӕриддӕр рахиза, уымӕн-иу йӕ тӕригъӕд йӕхи фӕуӕд, махмӕ дзы ницы азым ӕрхаудзӕн. Дӕ хӕдзары мидӕг искӕй туг куы ныккӕла, уӕд-иу уый тӕригъӕд та мах сӕр баййафӕд.

²⁰Фӕлӕ нӕ куы ауӕй кӕнай, уӕд сӕрибар уыдзыстӕм, цы ард дын бахордтам, уымӕй».

²¹Сылгоймаг загъта: «Куыд зӕгъут, афтӕ фӕуӕд!» Йӕ уазджыты куы арвыста, уӕд рудзынгыл бабаста сырх бӕндӕн.

²²Сгарджытӕ хӕхбӕстӕм байстой сӕхи ӕмӕ уым ӕртӕ боны дӕргъы бафӕстиат сты, цалынмӕ фӕдисӕттӕ сахармӕ аздӕхтысты, уӕдмӕ. Фӕдисӕттӕ иу дзыхъхъ, иу къуыпп ӕнӕ басгаргӕ нал ныууагътой, фӕлӕ сӕ не ссардтой.

²³Уӕд дыууӕ сгарӕджы рацыдысты хӕхбӕстӕй ӕмӕ Иорданы фаллаг фарсмӕ бахызтысты. Уым Нуны фырт Йешуамӕ бацыдысты ӕмӕ йын сӕ хабӕрттӕ сӕрӕй кӕронмӕ рафӕзмыдтой.

²⁴Ноджы ма Йешуайӕн загътой: «Дунедарӕг нын уыцы зӕхх ӕнӕхъӕнӕй радта, ӕмӕ йӕ цӕрджытӕ ӕмризӕджы ризынц ӕрмӕст нӕ койӕ дӕр».