Read Библи: Сыгъдӕг Нуны фырт Йешуа 20 Bible Online

Нуны фырт Йешуа 20 - Библи: Сыгъдӕг bible

Нуны фырт Йешуа 20

¹Дунедарӕг Йешуайӕн загъта:

²«Израилӕгтӕм зӕгъ, цӕмӕй сӕхицӕн снысан кӕной ӕмбӕхсӕн сахартӕ, кӕддӕр уын уый тыххӕй Моисейӕн куыд бафӕдзӕхстон, афтӕ.

³Ӕмӕ ӕнӕбары искӕй чи амара, уымӕн уым уыдзӕни тугисӕджы азарӕй йӕ сӕр бафснайыны фадат.

⁴Цы сахармӕ лидза, уымӕн-иу раздӕр йӕ кулдуары цур ӕрлӕууӕд ӕмӕ сахары хистӕртӕн йӕ хъуыддаг радзурӕд. Уый фӕстӕ-иу ӕй уыдон сахармӕ бауадзӕнт ӕмӕ йын уым цӕрӕнбынат раттӕнт.

⁵Тугисӕг йӕ фӕдыл фӕдисы куы ’рбацӕуа, уӕд ын ӕй йӕ къухмӕ ма раттӕнт, уымӕн ӕмӕ амардта ӕнӕбары, йӕ амӕттаг ын уӕд дӕр ӕмӕ уымӕй размӕ дӕр ӕнӕуынон нӕ уыди.

⁶Гъемӕ ӕмбӕхсӕн сахары цӕрӕд, цалынмӕ дзыллӕйы тӕрхоны раз ӕрлӕууа кӕнӕ, бӕллӕх цы алчеры заман ӕрцыд, уый амӕла, уӕдмӕ, стӕй-иу, кӕцӕй ралыгъд, уыцы сахармӕ йӕ хӕдзармӕ аздӕхӕд».

⁷Ӕмӕ израилӕгтӕ сӕрӕфснайынӕн снысан кодтой мӕнӕ ацы сахартӕ: Галилейы, Неффалимы байзӕддӕгты хӕхбӕсты — Кедеш, Ефремы фӕдонты хӕхбӕсты — Шехем, иудейӕгты хӕхбӕсты та — Кирйат-Арба (ома Хеврон).

⁸Иорданы фале, Йерихонӕй скӕсӕнӕрдӕм сӕрӕфснайынӕн сбӕрӕг кодтой мӕнӕ ацы сахартӕ: ӕдзӕрӕг быдыры, тъӕпӕны — Бецер (Рувимы хӕдзарвӕндаджы зӕххӕй), Галаады — Рамот (Гады хӕдзарвӕндаджы зӕххӕй) ӕмӕ Башаны — Голан (Менассиайы хӕдзарвӕндаджы зӕххӕй).

⁹Рахастой ахӕм уынаффӕ: израилӕгтӕй, йе та се ’хсӕн цӕрӕг ӕрцӕуӕггӕгтӕй исчи ӕнӕбары искӕй куы амара, уӕд, цалынмӕ дзыллӕйы тӕрхоны раз ӕрлӕууа, уӕдмӕ йын уым туджджынтӕй йӕ сӕр бафснайыны фадат уӕд.