Read Библи: Сыгъдӕг Нуны фырт Йешуа 3 Bible Online

Нуны фырт Йешуа 3 - Библи: Сыгъдӕг bible

Нуны фырт Йешуа 3

¹Сӕумӕраджы Йешуа ӕппӕт израилӕгтимӕ Ситтимӕй рараст Иорданы былгӕронмӕ ӕмӕ уым ӕрбынат кодтой фаллаг фарсмӕ бахизыны размӕ.

²Ӕртӕ боны фӕстӕ Израилы чапартӕ рӕсӕнуатыл ӕрзылдысты

³ӕмӕ адӕмӕн бафӕдзӕхстой: «Сауджын левиттӕ Дунедарӕджы, уӕ Хуыцауы, Фидыды Чырын рахӕссынц, уый куы фенат, уӕд сымах дӕр уӕ бынатӕй фенкъуысут ӕмӕ йӕ фӕдыл араст ут.

⁴Афтӕмӕй, кӕуылты уын цӕугӕ у, уый базондзыстут, уымӕн ӕмӕ ныронг ацы фӕндагыл никуыма цыдыстут. Уӕвгӕ, сымах Чырынӕй хъуамӕ уат дыууӕ мин ӕлмӕрины дарддӕр — ӕгӕр ӕм ма баввахс ут».

⁵Йешуа адӕмӕн загъта: «Уӕхи ссыгъдӕг кӕнут, уымӕн ӕмӕ Дунедарӕг райсом уе ’хсӕн диссӕгтӕ сараздзӕн».

⁶Сауджынтӕн дӕр бафӕдзӕхста: «Фидыды Чырын сисут ӕмӕ адӕмӕн сӕ разӕй цӕугӕут». Сауджынтӕ систой Фидыды Чырын ӕмӕ адӕмӕн сӕ разӕй ӕрлӕууыдысты.

⁷Уӕд Дунедарӕг Йешуайӕн загъта: «Абонӕй фӕстӕмӕ дӕ Ӕз скадджын кӕндзынӕн Израилы адӕмы цӕсты. Ӕмӕ уыдон фендзысты: Ӕз Моисейыл куыд аудыдтон, афтӕ аудын дӕуыл дӕр.

⁸Чырынхӕссӕг сауджынтӕ куыддӕр Иорданы донмӕ бахизой, афтӕ-иу сӕ ӕрлӕууын кӕн».

⁹Йешуа израилӕгтӕм фӕсидт: «Ӕввахсдӕр ӕрбацӕут ӕмӕ байхъусут Дунедарӕджы, уӕ Хуыцауы, ныхӕстӕм!»

¹⁰Ноджы ма сын загъта: «Цы диссаг ӕрцӕуа, уымӕй базондзыстут, уе ’хсӕн кӕй ис удӕгас Хуыцау ӕмӕ уын уӕ разӕй кӕй атӕрдзӕн ханаанӕгты дӕр, хеттӕгты дӕр, хиввӕгты дӕр, периззӕгты дӕр, гиргашӕгты дӕр, аморӕгты дӕр, йевусӕгты дӕр.

¹¹Афтӕмӕй ӕппӕт зӕххы Бардарӕджы Фидыды Чырын уӕ разӕй ахиздзӕн Иорданыл.

¹²Израилы хӕдзарвӕндӕгтӕй равзарут дыууадӕс лӕджы — алы хӕдзарвӕндагӕй дӕр иу.

¹³Дунедарӕджы, ӕппӕт зӕххы Бардарӕджы, Фидыды Чырын хӕссӕг сауджынтӕн сӕ къӕхтӕ куыддӕр доныл андзӕвой, афтӕ Иорданы дон айсысдзӕн. Йӕ гуырӕнтӕй цыдӕриддӕр дон кӕлы, уый ауӕзтау ӕрлӕудзӕн, къуламады хуызӕн слӕудзӕн».

¹⁴Адӕм сӕ цатыртӕ систой ӕмӕ фаллаг фарсмӕ бахизыны фӕндӕй Иорданы былмӕ сӕ ных сарӕзтой. Сауджынтӕ Фидыды Чырынимӕ цыдысты сӕ разӕй.

¹⁵Хуымгӕрдӕнты заман куыд вӕййы, афтӕ та ныр дӕр Иордан ивылд уыдис, йӕ былтӕй ӕнхъӕвзта. Фӕлӕ йӕм, Фидыды Чырын чи хаста, уыцы сауджынтӕ куыддӕр бахӕццӕ сты ӕмӕ доны балӕгӕрстой,

¹⁶афтӕ дӕрддзӕф ран (Царетаны фарсмӕ Адамы сахары цур), Иорданӕн йӕ гуырӕнтӕй цыдӕриддӕр дон кӕлы, уый ауӕзтау ӕрлӕууыд, ӕмдзӕхгӕр сис фестади. Дӕлӕрдӕм, Мард денджызмӕ цы дон калди, уый фӕцыдӕр ис, байсыст. Ӕмӕ адӕм доны фаллаг фарсмӕ ахызтысты Йерихоны бакомкоммӕ.

¹⁷Дунедарӕджы Фидыды Чырын хӕссӕг сауджынтӕ Иорданы бӕстастӕу ӕнцад лӕууыдысты сурыл, цалынмӕ Израилы адӕм иууылдӕр сурыл доны фаллаг фарсмӕ ахызтысты, уӕдмӕ.