Read Библи: Сыгъдӕг Нуны фырт Йешуа 9 Bible Online

Нуны фырт Йешуа 9 - Библи: Сыгъдӕг bible

Нуны фырт Йешуа 9

¹Иорданӕй ныгуылӕнӕрдӕм хӕхбӕсты, Шефелайы ӕмӕ Стыр денджызы ӕппӕт былгӕрӕтты, суанг Ливаны онг — хеттӕгтӕ, аморӕгтӕ, ханаанӕгтӕ, периззӕгтӕ, хиввӕгтӕ ӕмӕ йевусӕгты паддзӕхтӕм — Израилы адӕмы уӕлахизты кой куы байхъуыст,

²уӕд сӕ тыхтӕ баиу кодтой Йешуа ӕмӕ Израилы ныхмӕ ӕмвӕндӕй схӕцынмӕ.

³Фӕлӕ Йешуа Йерихонӕн ӕмӕ Гайӕн цы бакодта, уый куы фехъуыстой хивваг сахар Гивоны цӕрджытӕ,

⁴уӕд ыл хинӕй рацӕуынвӕнд скодтой. Цалдӕрӕй бавдӕлдысты ӕмӕ фӕндагмӕ хойраг ӕрцӕттӕ кодтой, сӕ хӕрджытыл сӕвӕрдтой лӕзӕрд голджытӕ ӕмӕ сӕны лалымты хӕррӕгътӕ — скъуыдтӕ ӕмӕ ӕмпъызтытӕ.

⁵Сӕ къахыдарӕс дӕр уыди ихсыд, ӕмпъызтытӕ, сӕ фӕлыст дӕр бызгъуыр. Сӕ фӕндаггаг къӕбӕр ныххус ӕмӕ згъӕлди.

⁶Йешуамӕ ӕрбацыдысты Гилгалы рӕсӕнуатмӕ ӕмӕ йын Израилы адӕмы раз загътой: «Дард бӕстӕй уӕм курӕг ӕрбацыдыстӕм, цӕмӕй немӕ саразат сабырдзинады бадзырд».

⁷Израилӕгтӕ хиввӕгтӕн загътой: «Куыд хъуамӕ саразӕм уемӕ бадзырд? Уӕд та, мыййаг, нӕ зӕххыл цӕрут?[1]»

⁸Хиввӕгтӕ Йешуайӕн дзуапп радтой: «Мах дӕ цагъартӕ стӕм». Йешуа сӕ бафарста: «Чи стут ӕмӕ ардӕм кӕцӕй ӕрбафтыдыстут?»

⁹Хиввӕгтӕ йын загътой: «Тынг дард бӕстӕй ӕрбацыдысты дӕ цагъартӕ, уымӕн ӕмӕ фехъуыстам Дунедарӕджы, дӕ Хуыцауы, кой, Мысыры цыдӕриддӕр бакодта,

¹⁰стӕй Иорданы фаллаг фарс дыууӕ амораг паддзахӕн — Хешбоны паддзах Сигонӕн ӕмӕ, Аштароты чи царди, Башаны уыцы паддзах Огӕн — цытӕ бакодта, уыдӕттӕ.

¹¹Нӕ хистӕртӕ ӕмӕ нын нӕ бӕстӕйы адӕм иууылдӕр загътой, зӕгъгӕ, фӕндаггаг хӕлц райсут ӕмӕ сӕм фӕцӕут, зӕгъут сын: мах уӕ цагъартӕ стӕм, ӕмӕ немӕ бадзырд саразут.

¹²Куы уӕм рараст стӕм, уӕд ацы дзул немӕ хъармӕй рахастам, ныр ӕй мӕнӕ уынут: ныххус ӕмӕ згъӕлы.

¹³Ацы лалымты сӕн куы ныккодтам, уӕд ног уыдысты, ныр мӕнӕ ныскъуыдтӕ сты. Нӕ фӕлыст ӕмӕ нӕ къахыдарӕс дӕр дард фӕндагыл баихсыдысты».

¹⁴Израилӕгтӕ сын сӕ фӕндаггӕгтӕм ӕркастысты, фӕлӕ Дунедарӕджы нӕ бафарстой, афтӕмӕй сын сӕ хойрагӕй сахуыстой.

¹⁵Йешуа хиввӕгтимӕ бафидыдта, зӕрдӕ сын бавӕрдта, сӕрӕгасӕй уӕ ныууадздзынӕн, зӕгъгӕ. Ӕмӕ Израилы адӕмы фӕтӕгтӕ ард бахордтой, сӕ фидыд кӕй нӕ фехалдзысты, ууыл.

¹⁶Семӕ бафидауынӕй ӕртӕ боны фӕстӕдӕр израилӕгтӕ фехъуыстой, уыдон сӕ сыхӕгтӕ кӕй сты ӕмӕ сын сӕ зӕххыл кӕй цӕрынц.

¹⁷Уӕд израилӕгтӕ абалц кодтой ӕмӕ сын ӕртыккаг бон сӕ сахартӕм бахӕццӕ сты. Сӕ сахартӕ та уыдысты Гивон, Кефира, Беерот ӕмӕ Кирйат-Иарим.

¹⁸Фӕлӕ сӕ израилӕгтӕ нӕ ныццагътой, уымӕн ӕмӕ сын адӕмы хицӕуттӕ ард бахордтой Дунедарӕгӕй, Израилы Хуыцауӕй. Уымӕ гӕсгӕ Израилы адӕм иууылдӕр хъуыр-хъуыр кӕнын райдыдтой хицӕуттыл.

¹⁹Уыдон адӕмӕн дзуапп радтой: «Мах сын ард бахордтам Дунедарӕгӕй, Израилы Хуыцауӕй, ӕмӕ сӕ ныр нӕ бон бахъыгдарын нал у.

²⁰Афтӕ сын бакӕнӕм: сӕрӕгасӕй сӕ ныууадзӕм, науӕд нӕ ард куы фӕсайӕм, уӕд нӕ Дунедарӕджы азар баййафдзӕн.

²¹Уадз ӕмӕ цӕрӕнт, фӕлӕ нырӕй фӕстӕмӕ суг сӕттӕнт ӕмӕ дон хӕссӕнт ӕгас дзыллӕйӕн». Ӕмӕ адӕм сӕ хицӕуттимӕ сразы сты.

²²Йешуа фӕсидт гивонӕгтӕм ӕмӕ сын загъта: «Нӕ зӕххыл куы цӕрут, уӕд нӕ цӕмӕн асайдтат, сымахӕй тынг дард цӕрӕм, зӕгъгӕ?

²³Ӕлгъыст стут уый тыххӕй! Уӕ фӕды-фӕдмӕ уыдзыстут цагъартӕ, суг сӕтдзыстут ӕмӕ дон хӕсдзыстут мӕ Хуыцауы хӕдзарӕн!»

²⁴Уыдон дзуапп радтой Йешуайӕн: «Дӕ цагъартӕ фехъуыстой, Дунедарӕг, дӕ Хуыцау, Йӕ минӕвар Моисейӕн кӕй бафӕдзӕхста ацы зӕхх иууылдӕр сымахӕн раттын ӕмӕ йын йе ’ппӕт цӕрджыты дӕр ныццӕгъдын. Куы нӕ амарат, уымӕй тынг тарстыстӕм, ӕмӕ уымӕн афтӕ бакодтам.

²⁵Ныр мӕнӕ дӕ къухы стӕм, ӕмӕ дӕм хуыздӕр ӕмӕ растдӕр куыд кӕсы, афтӕ нын бакӕн».

²⁶Ӕмӕ Йешуа Израилы адӕмы нӕ бауагъта гивонӕгтӕм сӕ къух сисын.

²⁷Фӕлӕ уыцы бон Йешуа бардзырд радта, цӕмӕй гивонӕгтӕ суг сӕттой ӕмӕ дон хӕссой Израилы дзыллӕйӕн ӕмӕ Дунедарӕджы нывондхӕссӕнӕн. Ӕмӕ ныр дӕр уыцы куыстгӕнӕг сты, Дунедарӕг цы кувӕн бынат равзары, уым.