Read Библи: Сыгъдӕг Фӕтӕгтӕ 11 Bible Online

Фӕтӕгтӕ 11 - Библи: Сыгъдӕг bible

Фӕтӕгтӕ 11

¹Галаадаг Йеффай уыди домбай хӕстон. Йӕ фыд — Галаад, йӕ ныййарӕг мад — хӕтаг сылгоймаг.

²Галаадӕн ма йӕ бинойнаг ӕндӕр фырттӕ дӕр ныййардта, ӕмӕ уыдон куы байрӕзтысты, уӕд Йеффайы сӕ хӕдзарӕй ратардтой ӕмӕ йын загътой: «Ды нӕ фыды бынтӕй ницы айсдзынӕ, уымӕн ӕмӕ ӕндӕр мадӕй гуырд дӕ».

³Йеффай йе ’фсымӕртӕй алыгъд ӕмӕ Товы бӕстӕйы ӕрцарди. Уым ыл алы дзӕгъӕлдзутӕ ӕрӕмбырд сты, ӕмӕ иумӕ адӕмы стыгътой.

⁴Цасдӕр рӕстӕджы фӕстӕ израилӕгтӕм аммонӕгтӕ ӕрбабырстой.

⁵Аммонӕгтӕ Израилы ныхмӕ куы схӕцыдысты, уӕд Галаады хистӕртӕ Йеффаймӕ Товы бӕстӕм ацыдысты

⁶ӕмӕ йын загътой: «Раздӕх ӕмӕ у нӕ фӕтӕг, аммонӕгты ныхмӕ нӕ хӕстмӕ акӕн».

⁷Йеффай Галаады хистӕртӕн дзуапп радта: «Раздӕр уын ӕнӕуынон куы уыдтӕн, мӕ фыды хӕдзарӕй мӕ куы ратардтат. Ныр фыдбылызы куы бахаудыстут, уӕд та мӕ ӕрцагуырдтат».

⁸Галаады хистӕртӕ йын загътой: «Мах дӕм ӕрбацыдыстӕм, цӕмӕй нӕ аммонӕгты ныхмӕ хӕстмӕ акӕнай. Ды суыдзынӕ нӕ паддзах, ӕгас Галаады паддзах».

⁹Йеффай загъта: «Хорз, ӕз раздӕхдзынӕн ӕмӕ уӕ аммонӕгты ныхмӕ хӕстмӕ акӕндзынӕн. Ӕмӕ мын кӕд Дунедарӕг уӕлахиз ратта, уӕд уӕ паддзах суыдзынӕн».

¹⁰Галаады хистӕртӕ расомы кодтой: «Дунедарӕг не ’вдисӕн! Ард дын хӕрӕм, мах нӕ дзырд нӕ фӕсайдзыстӕм».

¹¹Йеффай Галаады хистӕртимӕ рацыдис. Адӕм дзы сӕхицӕн фӕтӕг загътой. Мицпайы Йеффай Дунедарӕджы раз ногӕй фехъусын кодта сӕ бадзырд.

¹²Йеффай аммонӕгты паддзахмӕ минӕвӕрттӕ арвыста ахӕм фарстимӕ: «Цы дӕ хъӕуы мӕнӕй? Мӕ зӕхмӕ мын хӕстмӕ цӕмӕн цӕуыс?»

¹³Аммонӕгты паддзах Йеффайы минӕвӕрттӕн дзуапп радта: «Израилӕгтӕ Мысырӕй куы рацыдысты, уӕд мын мӕ зӕххытӕ Арнонӕй Йавок ӕмӕ Иорданы онг бацахстой. Ратт мын сӕ фӕстӕмӕ ӕнӕмастӕй!»

¹⁴Йеффай аммонӕгты паддзахмӕ ногӕй минӕвӕрттӕ арвыста, цӕмӕй йын зӕгъой:

¹⁵«Афтӕ зӕгъы Йеффай: Израил моавӕгтӕ ӕмӕ аммонӕгты зӕххытӕ никуы байста.

¹⁶Израилӕгтӕ Мысырӕй куы рацыдысты, уӕд суанг Сырх денджызы онг ӕдзӕрӕг быдырыл фӕцыдысты. Кадешмӕ куы бахӕццӕ сты,

¹⁷уӕд Едомы паддзахмӕ минӕвӕрттӕ барвыстой, дӕ зӕххыл нын ацӕуыны бар ратт, зӕгъгӕ, фӕлӕ сӕ Едомы паддзах нӕ бауагъта. Уӕд хатӕг барвыстой Моавы паддзахмӕ, фӕлӕ сӕ уый дӕр нӕ бауагъта. Израилӕгты бахъуыди Кадешы баззайын.

¹⁸Уый фӕстӕ та ногӕй ӕдзӕрӕг быдырыл ацыдысты, Едом ӕмӕ Моавы рӕзты ахызтысты. Моавӕй скӕсӕнӕрдӕм араст сты ӕмӕ Арноны фале рӕсӕнуат скодтой, Моавы зӕхмӕ нӕ бахызтысты, афтӕмӕй. Арнон та ис Моавы арӕныл.

¹⁹Израилӕгтӕ Хешбоны паддзах Сигонмӕ, аморӕгты паддзахмӕ, минӕвӕрттӕ арвыстой, нӕ бӕстӕм нӕ дӕ зӕххыл ацӕуын бауадз, зӕгъгӕ,

²⁰фӕлӕ сын Сигон бар нӕ радта. Йе ’фсад иууылдӕр ӕрӕмбырд кодта, Йахацмӕ хӕстӕг рӕсӕнуат скодта ӕмӕ израилӕгтимӕ схӕцыди.

²¹Дунедарӕг, Израилы Хуыцау, Сигоны йе ’ппӕт ӕфсадимӕ израилӕгты къухтӕм радта, ӕмӕ йыл фӕуӕлахиз сты, уыцы бӕстӕйы цы аморӕгтӕ цардысты, уыдонӕн сӕ зӕххытӕ иууылдӕр бацахстой.

²²Аморӕгты зӕххытӕ Арнонӕй Йавочы онг, стӕй ӕдзӕрӕг быдырӕй Иорданы онг сӕхи бакодтой.

²³Афтӕ Дунедарӕг, Израилы Хуыцау, уыцы зӕххытӕ аморӕгтӕй байста ӕмӕ сӕ радта йӕ адӕмӕн, Израилӕн. Ӕмӕ нын сӕ ныр ды та байсынмӕ хъавыс?

²⁴Дӕ хуыцау Кемош дын кӕй радта, уыцы зӕххытӕ дӕ къухы не сты? Уӕдӕ махӕн дӕр нӕ Хуыцау, Дунедарӕг, цы зӕххытӕ радта, уыдон нӕ бар сты.

²⁵Ды Моавы паддзахӕй, Ципоры фырт Балакӕй цӕмӕй хуыздӕр дӕ? Ӕмӕ уый Израилимӕ тох никуы кодта, никуы хӕцыд йӕ ныхмӕ!

²⁶Израилӕгтӕ Хешбон ӕмӕ йӕ алыварс хъӕуты, Ароер ӕмӕ йӕ алыварс хъӕуты, стӕй Арноны дон-дон цы хъӕутӕ ис, уыдоны ныридӕгӕн ӕртӕсӕдӕ азы цӕрынц. Ӕмӕ нӕ уӕд ацы зӕххытӕ раздӕр цӕуылнӕ истай?

²⁷Ӕз дӕу ницӕмӕй бафхӕрдтон, ды та мын аразыс фыдбылыз — мӕ ныхмӕ хӕстмӕ рацыдтӕ. Уӕдӕ ныр израилӕгтӕ ӕмӕ аммонӕгты хъаст Дунедарӕг — Тӕрхонгӕнӕг — равзарӕд Йӕхӕдӕг!»

²⁸Аммоны паддзах Йеффайы ныхӕстӕ ницӕмӕ ӕрдардта.

²⁹Дунедарӕджы Уд Йеффайыл ӕртыхсти. Галаад ӕмӕ Менассиайы зӕххыл ацыд, бахӕццӕ ис Мицпайы сахармӕ. Уырдыгӕй аммонӕгты ныхмӕ хӕстмӕ рацыди.

³⁰Йеффай Дунедарӕгӕн дзырд радта: «Аммонӕгты мын мӕ къухмӕ куы радтай

³¹ӕмӕ уӕлахизимӕ куы раздӕхон, уӕд Дын, мӕ хӕдзарӕй мӕ размӕ фыццаг чи рацӕуа, уый иууылсудзинаг нывондӕн ӕрхӕсдзынӕн!»

³²Йеффай аммонӕгтӕм бабырста, ӕмӕ йын Дунедарӕг уӕлахиз радта.

³³Аммонӕгты ссӕдз хъӕуы ныддӕрӕн кодта — Ароерӕй Миннит ӕмӕ Авел-Керамимы онг. Афтӕмӕй израилӕгтӕ аммонӕгтыл фӕуӕлахиз сты.

³⁴Йеффай ӕрыздӕхтис йӕ хӕдзармӕ, Мицпайы сахармӕ. Йӕ размӕ, кафгӕ ӕмӕ дзӕнгӕрджытӕй цӕгъдгӕ, рацыди йӕ чызг. Уый уыдис йӕ иунӕг чызг, цотӕй йын ӕндӕр ницы уыди.

³⁵Куы йӕ ауыдта, уӕд йӕ дарӕс фӕйнӕрдӕм арӕдывта ӕмӕ ныхъхъӕр кодта: «Ехх, мӕ чызг, уый мын цы бакодтай! Сау бӕллӕхы мӕ куы баппӕрстай! Ӕз Дунедарӕгӕн дзырд радтон ӕмӕ йӕ мӕ бон нӕ сӕххӕст кӕнын нӕу!»

³⁶Чызг ын дзуапп радта: «Мӕ фыд! Кӕд Дунедарӕджы раз сомы ракодтай, уӕд дӕ сомы сӕххӕст кӕн, уымӕн ӕмӕ дын Дунедарӕг балӕвар кодта уӕлахиз, ӕмӕ де знӕгтӕй, аммонӕгтӕй, дӕ маст райстай».

³⁷Стӕй ма йӕ ныхасмӕ бафтыдта: «Ӕрмӕст мӕм иу курдиат ис: дыууӕ мӕйы-ма банхъӕлмӕ кӕс. Ӕз ме ’мбӕлттимӕ хӕхтӕм ацӕудзынӕн ӕмӕ уым фӕкӕудзынӕн мӕ хъысмӕтыл — мойы ад кӕй нӕ базондзынӕн, ууыл».

³⁸Йӕ фыд ын загъта: «Хорз, ацу». Ӕмӕ йӕ дыууӕ мӕйы ’мгъуыдмӕ ауагъта. Чызг йе ’мбӕлттимӕ хӕхтӕм ацыд ӕмӕ куыдта йӕ хъысмӕтыл, нӕлгоймаджы ад кӕй нӕ базондзӕнис, ууыл.

³⁹Дыууӕ мӕйы фӕстӕ йӕ фыдмӕ ӕрыздӕхти. Фыд йӕ сомы сӕххӕст кодта, ӕмӕ чызг нӕлгоймаджы ад нӕ базыдта. Уӕдӕй нырмӕ израилӕгтӕм фӕзынди ахӕм ӕгъдау:

⁴⁰алы аз дӕр чызджытӕ цыппар бонмӕ ацӕуынц хӕхтӕм ӕмӕ фӕкӕуынц галаадаг Йеффайы чызджы хъысмӕтыл.