Read Библи: Сыгъдӕг Фӕтӕгтӕ 14 Bible Online

Фӕтӕгтӕ 14 - Библи: Сыгъдӕг bible

Фӕтӕгтӕ 14

¹Иу хатт Самсон Тимнайы сахармӕ ацыд ӕмӕ дзы иу филистимаг чызджы федта.

²Сӕхимӕ куы ӕрыздӕхт, уӕд йӕ фыд ӕмӕ йӕ мадӕн загъта: «Тимнайы сахары иу филистимаг чызджы федтон, ӕмӕ мын ӕй ракурут».

³Фӕлӕ йын йӕ фыд ӕмӕ йӕ мад загътой: «Ау, нӕ мыггаг ӕмӕ нӕ адӕмы ’хсӕн сылгоймӕгтӕ нал ис? Ӕнӕсунӕт филистимӕгтӕй ус ракурын цӕмӕн сфӕнд кодтай?» Самсон дзуапп радта: «Ракурут мын уыцы чызджы, мӕ зӕрдӕмӕ фӕцыди».

⁴Уыцы заман израилӕгтӕ уыдысты филистимӕгты дӕлбар. Дунедарӕджы фӕндыд, цӕмӕй филистимӕгтӕ сӕхӕдӕг загъд ракъахой. Самсоны фыд ӕмӕ мад нӕ зыдтой, уыцы хъуыддаг Дунедарӕгӕй кӕй рацыди, уый.

⁵Самсон йӕ ныййарджытимӕ Тимнайы сахармӕ ацыд. Сахары сӕндӕттӕм куы бахӕццӕ сты, уӕд Самсоны размӕ рыхгӕ иу лӕппын домбай разгъордта.

⁶Дунедарӕджы Уд ӕртыхсти Самсоныл, ӕмӕ домбайы йӕ къухтӕй сӕныччы скъуыдтӕ акодта. Уыцы хабар йӕ фыд ӕмӕ йӕ мадӕн нӕ радзырдта.

⁷Самсон Тимнайы сахармӕ ӕрбацыд ӕмӕ, чызгимӕ куы аныхас кодта, уӕд йӕ зӕрдӕмӕ ноджы тынгдӕр фӕцыди.

⁸Цасдӕр рӕстӕджы фӕстӕ Самсон ногӕй ӕрбацыди Тимнамӕ — чызджы курынмӕ. Фӕндагыл, цы домбайы амардта, уый фенынмӕ баздӕхти. Домбайы марды разынди мыд ӕмӕ бирӕ мыдыбындзытӕ.

⁹Самсон мыдӕй йӕ армы дзаг систа ӕмӕ дарддӕр хӕргӕ араст ис. Йӕ ныййарджыты куы баййӕфта, уӕд мыдӕй уыдонӕн дӕр авӕрдта, фӕлӕ сын, домбайы мардӕй йӕ кӕй систа, уый нӕ загъта.

¹⁰Ӕмӕ мӕнӕ Самсоны фыд чызджы хӕдзармӕ бацыди. Усгур лӕппуты ’гъдаумӕ гӕсгӕ Самсон уым куывд скодта.

¹¹Фысымтӕ йӕ ӕрбацӕугӕ куы федтой, уӕд ын фынгӕмбӕлттӕн дӕс ӕмӕ ссӕдз адӕймаджы ӕрбахуыдтой.

¹²Самсон сын загъта: «Цӕй ӕмӕ уын уыци-уыци радзурон. Куывд авд боны фӕстӕ фӕуыдзӕнис, ӕмӕ йӕ кӕд уӕдмӕ базонат, уӕд уын ратдзынӕн дӕс ӕмӕ ссӕдз хӕдоны гӕнӕй уафт хъуымацӕй, стӕй ма ноджыдӕр дӕс ӕмӕ ссӕдз фӕлысты.

¹³Куынӕ йӕ базонат, уӕд та мын гӕнӕй уафт хъуымацӕй дӕс ӕмӕ ссӕдз хӕдоны сымах ратдзыстут, стӕй дӕс ӕмӕ ссӕдз фӕлысты». Уыдон ын дзуапп радтой: «Цӕй, радзур нын дӕ уыци-уыци, хъусӕм дӕм».

¹⁴Самсон сын загъта: «Иннӕты чи хордта, уый йӕхӕдӕг сси хӕринаг, тыхджын сси адджын». Филистимӕгтӕ ӕртӕ боны фӕхъуыды кодтой, фӕлӕ уыци-уыци сӕ бон базонын нӕ уыди.

¹⁵Куывды цыппӕрӕм бон куы ралӕууыд, уӕд Самсоны усӕн загътой: «Дӕ сӕрыхицауы ракъах, ӕмӕ уыци-уыцийӕн йӕ дзуапп схъӕр кӕна. Науӕд дын дӕхи дӕр ӕмӕ дӕ бинонты дӕр басудздзыстӕм. Цӕмӕн нӕм фӕдзырдтат? Цӕмӕй нӕ бастигъат, уымӕн?»

¹⁶Уӕд ус, цӕссыгкалгӕ, Самсонӕн загъта: «Нал мӕ уарзыс! Мӕ хӕстӕджытӕн мын уыци-уыци радзырдтай ӕмӕ йын йӕ дзуапп мӕнӕн дӕр нӕ дзурыс!» Самсон ын афтӕ зӕгъы: «Мӕ ныййарджытӕн куы ницы схъӕр кодтон, уӕд ӕй дӕуӕн цӕмӕн хъуамӕ радзурон?»

¹⁷Ус ӕнӕхъӕн авд боны, цалынмӕ куывд цыди, уӕдмӕ фӕкуыдта ӕмӕ йӕ сӕрыхицауы иу ран нал уагъта. Самсон дзы стыхсти ӕмӕ йын ӕвдӕм бон уыци-уыцийы дзуапп загъта, уый та йӕ радзырдта филистимӕгтӕн.

¹⁸Ӕвдӕм бон, хур нӕма аныгуылд, афтӕ сахары цӕрджытӕ Самсонӕн дзуапп радтой: «Цы ис мыдӕй адджындӕр? Чи у домбайӕ тыхджындӕр?» Самсон сын загъта: «Мӕ дыгӕрдыгыл мын куынӕ хуым кодтаиккат, уӕд мын мӕ уыци-уыци нӕ базыдтаиккат».

¹⁹Дунедарӕджы Уд Самсоныл ӕртыхсти. Самсон Ашкелонмӕ ацыд ӕмӕ уым дӕс ӕмӕ ссӕдз лӕджы амардта. Сӕ дарӕстӕ сын раласта ӕмӕ сӕ, уыци-уыци чи базыдта, уыдонӕн радта. Уый фӕстӕ мӕстджынӕй йӕ фыды хӕдзармӕ раздӕхти.

²⁰Самсоны усы та йӕ сиахсӕмбӕлттӕй иуӕн радтой.