Read Библи: Сыгъдӕг Фӕтӕгтӕ 4 Bible Online

Фӕтӕгтӕ 4 - Библи: Сыгъдӕг bible

Фӕтӕгтӕ 4

¹Ехуд куы амарди, уӕд та израилӕгтӕ фӕстӕмӕ Дунедарӕджы сӕ митӕй мӕсты кӕнын райдыдтой,

²ӕмӕ сӕ Дунедарӕг ханаанаг паддзах Йавины къухмӕ радта, уый хицауиуӕг кодта Хацоры сахары. Йавинӕн йе ’фсады хицау хуынди Сисера, царди Харошет-Гоимы.

³Сисерамӕ уыдис фарастсӕдӕ ӕфсӕн тохуӕрдоны. Ссӕдз азы дӕргъы израилӕгты хъизӕмарӕй фӕмардта, ӕмӕ та Дунедарӕгмӕ скуывтой.

⁴Уыцы заман израилӕгты фӕтӕг уыди Деворӕ, сылгоймаг-пехуымпар, Лаппидоты бинойнаг.

⁵Уый бадти Деворӕйы пальмӕйы бын, Рама ӕмӕ Вефилы ’хсӕн, Ефремы хӕхты. Израилӕгтӕ йӕм уырдӕм цыдысты, ӕмӕ сын уый сӕ хъуыддӕгтӕ ӕвзӕрста.

⁶Иу хатт Деворӕ фӕсидтис Авиноамы фырт Баракмӕ. Уый царди Кедешы сахары, Неффалимы зӕххыл. Куы ’рбацыди, уӕд ын Деворӕ загъта: «Дунедарӕг, Израилы Хуыцау, зӕгъы дӕуӕн: „Фаворы хохмӕ демӕ Неффалим ӕмӕ Зевулоны хӕдзарвӕндӕгтӕй дӕс мин хӕстоны акӕн ӕмӕ уым ӕрлӕуу.

⁷Ӕз афтӕ бакӕндзынӕн, ӕмӕ Сисера, Йавины ӕфсады хицау, ӕд ӕфсӕдтӕ ӕмӕ ӕд тохуӕрдӕттӕ Кишоны дӕлвӕзмӕ дӕ размӕ рацӕудзӕн, ӕмӕ дын ӕй Ӕз дӕ къухмӕ ратдзынӕн“».

⁸Барак Деворӕйӕн дзуапп радта: «Кӕд мемӕ ацӕудзынӕ, уӕд разы дӕн. Ды куынӕ ацӕуай, уӕд ӕз дӕр нӕ цӕуын».

⁹Уый йын загъта: «Ӕз демӕ ацӕудзынӕн, фӕлӕ ацы балц дӕу не скадджын кӕндзӕн. Дунедарӕг Сисерайы сылгоймаджы къухмӕ ратдзӕн». Ӕмӕ Деворӕ Баракимӕ Кедешмӕ ацыди.

¹⁰Барак Неффалим ӕмӕ Зевулоны хӕдзарвӕндӕгтӕм Кедешы сахармӕ фӕсидти. Йӕ фӕдыл рацыди дӕс мин хӕстоны, Деворӕ дӕр уыдис йемӕ.

¹¹Уыцы заман Каины фӕдон Хевер кенӕгтӕй, Моисейы каис Ховавы фӕдонтӕй йӕхи фӕхицӕн кодта. Кедешмӕ хӕстӕг, Цаананнимы тулдзы цур, йе ’фсадимӕ рӕсӕнуат скодта.

¹²Сисерамӕ фӕхабар чындӕуыд, Авиноамы фырт Барак Фаворы хохыл ис, зӕгъгӕ.

¹³Сисера йӕ фарастсӕдӕ ӕфсӕн уӕрдоны, стӕй йын Харошет-Гоимы цыдӕриддӕр хӕстонтӕ уыди, уыдоны иууылдӕр Кишоны дӕлвӕзмӕ ӕрбакодта.

¹⁴Деворӕ Баракӕн загъта: «Цӕугӕ! Абон дын Дунедарӕг Сисерайы дӕ къухмӕ ратдзӕни. Дунедарӕг Йӕхӕдӕг цӕудзӕн дӕ разӕй!» Барак дӕс мин хӕстонимӕ Фаворы хохы сӕрӕй ӕрцыди.

¹⁵Уыцы рӕстӕг Дунедарӕг Сисерайы катайы бацӕуын кодта. Йӕ хӕстонтыл дӕр ӕмӕ, тохуӕрдӕтты чи бадти, уыдоныл дӕр, Барак куы фӕзынди, уӕд карды цӕфӕй амӕлыны тӕссӕй ризӕг бахӕцыди. Сисера та тохуӕрдонӕй рагӕпп ласта ӕмӕ лидзӕг фӕцис.

¹⁶Барак ын йӕ тохуӕрдӕттӕ ӕмӕ йӕ хӕстонты суанг Харошет-Гоимы онг фӕсырдта. Сисерайы хӕстонтӕ иууылдӕр цагъды фесты, иу дӕр дзы нӕ аирвӕзти.

¹⁷Сисера ӕрбалыгъдис Йаелы, кенӕгты байзӕддаг Хеверы усы, цатырмӕ. Хеверы мыггаг Хацоры паддзах Йавинимӕ цӕдисонтӕ уыдысты.

¹⁸Йаел Сисерайы размӕ рацыд ӕмӕ загъта: «Рахиз мидӕмӕ, ме ’лдар, ма тӕрс». Сисера цатырмӕ бацыд, ӕмӕ йӕ Йаел хъӕццулӕй ӕрӕмбӕрзта.

¹⁹Сисера бахатыди Йаелмӕ: «Дойны мын у, иу чысыл-ма мын дон авӕр». Йаел ӕхсыры лалым байгом кодта, Сисерайӕн ӕхсыр радта ӕмӕ та йӕ ногӕй ӕрӕмбӕрзта.

²⁰Сисера йын загъта: «Цатырмӕ бахизӕны раз слӕуу. Исчи куы ’рбацӕуа ӕмӕ дӕ куы фӕрса, цатыры исчи ис, зӕгъгӕ, уӕд-иу мӕ ма схъӕр кӕн».

²¹Хеверы ус Йаел райста дзӕбуг ӕмӕ цатыр фидаргӕнӕн мих, сабыргай Сисерамӕ бахъуызыд, мих ын йӕ къӕмисӕны ныссагъта ӕмӕ йӕ зӕхмӕ ныххоста. Сисера фыр фӕлладӕй фынӕй уыд ӕмӕ уыцы ран амарди.

²²Барак Сисерайы агурӕг куы фӕзынди, уӕд Йаел йӕ размӕ рацыд ӕмӕ загъта: «Рахиз мидӕмӕ, ӕз дын, кӕй агурыс, уый фенын кӕндзынӕн». Барак цатырмӕ бахызтис ӕмӕ федта: Сисера мардӕй хуыссы, йӕ къӕмисӕны — мих сагъд.

²³Уыцы бон Дунедарӕг израилӕгтӕн уӕлахиз балӕвар кодта, ӕмӕ ханаанӕгты паддзах Йавины басастой.

²⁴Израилӕгтӕ хӕцыдысты дарддӕр, цалынмӕ ханаанаг паддзах Йавин ӕмӕ йӕ адӕмы бынтондӕр ныццагътой, уӕдмӕ.