Read Библи: Сыгъдӕг Руф 3 Bible Online

Руф 3 - Библи: Сыгъдӕг bible

Руф 3

¹Иуахӕмы Наоми загъта Руфӕн: «Дӕ амонд куыд ссарай, афтӕ дын къонайы мӕт куы бакӕнин, уый мӕ зӕрды ис, мӕ хъӕбул.

²Уӕртӕ кӕй ӕххуырстытимӕ куыстай, нӕ уыцы хӕстӕг Боаз ахсӕв мусы хъӕбӕрхор дымгӕмӕ дары.

³Дӕхи цынай, хӕрздӕфгӕнӕнтӕй дӕхимӕ базил, дӕ дзӕбӕхдӕр фӕлыст скӕн ӕмӕ мусмӕ фӕцу. Ӕрмӕст, цалынмӕ бахӕра ӕмӕ бануаза Боаз, уӕдмӕ йӕм дӕхи ма равдис.

⁴Кӕм хуысдзӕни, уыцы бынат базон; бацу, дӕлфӕдты ’рдыгӕй йын йе ’мбӕрзӕныл схӕц ӕмӕ уым ӕрхуысс. Йӕхӕдӕг дын зӕгъдзӕни, цы гӕнгӕ у, уый».

⁵Руф ын дзуапп радта: «Цыдӕриддӕр мын загътай, уый бакӕндзынӕн».

⁶Мусмӕ фӕцыд ӕмӕ йын йе ’фсин куыддӕриддӕр бафӕдзӕхста, афтӕ бакодта.

⁷Боаз бахордта ӕмӕ бануӕзта, йӕ зӕрдӕ бахъӕлдзӕг ӕмӕ кӕрийы цур бахуыссыди. Руф ӕнӕ уынӕрӕй бацыд, йӕ дӕлфӕдты ’рдыгӕй йын йе ’мбӕрзӕныл схӕцыд ӕмӕ ӕрхуыссыди.

⁸Ӕмбисӕхсӕвтыл фестъӕлфыди Боаз, рабадти, кӕсы — ӕмӕ йӕ дӕлфӕдтӕм сылгоймаг хуыссы.

⁹Бафарста йӕ: «Кӕцы дӕ уый?» Сылгоймаг ын дзуапп радта: «Руф дӕн ӕз, дӕ цагъар; дӕ дӕлбазыр мӕ бакӕн — хӕстӕг нын куы ӕййафыс».

¹⁰Боаз загъта: «Дунедарӕджы арфӕ дыл сӕмбӕлӕд, мӕ къона! Амӕй размӕ фаг иузӕрдион уыдтӕ, ныр та ноджы иузӕрдиондӕр разындтӕ: хъӕздыг уой ӕви мӕгуыр — ӕрыгон нӕлгоймӕгтӕ агурыныл не схӕцыдтӕ.

¹¹Уӕдӕ афтӕ, мӕ къона: тӕрсгӕ ма кӕн, цыдӕриддӕр загътай, уыдӕттӕ дын сараздзынӕн, уымӕн ӕмӕ хӕрзӕгъдау сылгоймаг кӕй дӕ, уый нӕ сахар иууылдӕр зонынц.

¹²Хӕстӕджытӕ кӕй стӕм, уый раст у, фӕлӕ дын мӕнӕй хӕстӕгдӕр ӕрвад дӕр ис.

¹³Ныр уал бахсӕвиуат кӕн. Йӕ хӕс куыд у, афтӕ дӕ йе ’вджид бакӕныныл кӕд сразы уа уыцы къабаз райсом, уӕд хорз; кӕд ӕй нӕ бафӕнда, уӕд та дӕ, сомы кӕнын Дунедарӕгӕй, мӕхи ӕвджид бакӕндзынӕн! Амӕй ӕрбабонмӕ уал хуысс».

¹⁴Боазы дӕлфӕдтӕм фӕхуыссыди бонивайӕнтӕм Руф ӕмӕ, адӕймаджы цӕсгом базонӕн нӕма уыд, афтӕ сӕударӕй сыстад, уымӕн ӕмӕ Боаз ахъуыды кодта: «Ацы сылгоймаг мусмӕ ӕрбацыд, уый мачи базонӕд».

¹⁵Стӕй йын ноджыдӕр загъта: «Рафтау-ма дӕ уӕлгуыр ӕмӕ йӕ ӕрбадар». Руф ӕм ӕй бадардта, ӕмӕ дзы Боаз ӕхсӕз мӕрты хъӕбӕрхор сӕвгӕдта, сӕккой йын ӕй кодта, йӕхӕдӕг сахармӕ ацыд.

¹⁶Руф сӕхимӕ куы ’рбаздӕхт, уӕд ӕй йе ’фсин бафарста: «Цы бадӕ, мӕ къона?» Боаз ын цы бакодта, уыдӕттӕ йын Руф иууылдӕр радзырдта.

¹⁷Ноджы ма загъта: «Мӕнӕ мын хъӕбӕрхоры ӕхсӕз мӕрты радта, де ’фсинмӕ афтидармӕй ма ацу, зӕгъгӕ».

¹⁸Наоми загъта: «Хъуыддаг йӕхи бар ауадз; цӕуыл ахицӕн уыдзӕн, уымӕ банхъӕлмӕ кӕс, мӕ къона. Уыцы лӕг хъуыддаг тӕккӕ абон ӕнӕ алыггӕнгӕ нӕ фӕуыдзӕн».