Read Библи: Сыгъдӕг 1 Паддзахӕдтӕ 1 Bible Online

1 Паддзахӕдтӕ 1 - Библи: Сыгъдӕг bible

1 Паддзахӕдтӕ 1

¹Ефремы хӕхбӕсты, Раматаим-Цофимы сахары, царди иу лӕг, ефремон, йӕ ном — Елкана. Йӕ фыд Йерохам уыди Елигуйы фырт, Елигуйы фыд Тоху — Цуфы фырт.

²Елканайӕн уыди дыууӕ усы: сӕ иуӕн йӕ ном — Аннӕ, иннӕмӕн — Пениннӕ. Пениннӕйӕн уыди сывӕллӕттӕ, Аннӕйӕн та зӕнӕг нӕ цыди.

³Лӕг-иу алы аз дӕр йӕ сахарӕй араст ис Силоммӕ, цӕмӕй Уӕларвӕфсады Бардарӕгмӕ скува ӕмӕ Йын нывонд ӕрхӕсса. Уым Дунедарӕджы сауджынтӕ уыдысты Елиа ӕмӕ йӕ дыууӕ фырты, Хофни ӕмӕ Пинхас.

⁴Елкана-иу нывонд куы ’рхаста, уӕд-иу дзы хӕйттӕ бакодта йӕ бинойнаг Пениннӕйӕн ӕмӕ Пениннӕйы лӕппутӕ ӕмӕ чызджытӕн се ’ппӕтӕн дӕр.

⁵Аннӕйӕн-иу радта сӕрмагонд хай, уымӕн ӕмӕ йӕ фылдӕр уарзта, кӕд ын Дунедарӕг зӕнӕг нӕ лӕвӕрдта, уӕддӕр.

⁶Йе ’мыджыр та йыл ӕфхӕрынӕй нӕ ауӕрста, мӕстӕй йӕ мардта, Дунедарӕг ын зӕнӕг кӕй нӕ радта, уый тыххӕй.

⁷Афтӕ уыди ӕрвылаз дӕр: Аннӕ-иу Дунедарӕджы хӕдзармӕ куы ссыди, уӕд ӕй Пениннӕ ӕнӕ бафхӕргӕ никуы ныууагъта. Иуахӕмы та Аннӕ куыдта, йӕ дзыхмӕ комдзаг нал иста,

⁸ӕмӕ йын Елкана, йӕ сӕрыхицау, загъта: «Аннӕ! Цӕуыл кӕуыс? Фынгмӕ цӕуылнӕ ӕвналыс? Цы маст дӕ бацыди? Исты дын ӕз дӕс фыртӕй дӕр адджындӕр нӕ дӕн?»

⁹Силомы куывдӕй куы сыстадысты, уӕд Аннӕ, кӕугӕйӕ, йӕ фыр тыхстӕй Дунедарӕгмӕ кувын райдыдта. Ныр сауджын Елиа та Дунедарӕджы Уаз Цӕрӕны дуары раз бандоныл бадти.

¹¹Аннӕ расомы кодта: «Уӕларвӕфсады Бардарӕг! Дӕ цагъары хъизӕмармӕ куы ’ркӕсай, куынӕ Дӕ ферох уа Дӕ цагъар ӕмӕ йын тырын куы ралӕвар кӕнай, уӕд ӕй Дунедарӕгӕн снывонд кӕндзынӕн. Цӕргӕ-цӕрӕнбонты уыдзӕни Дӕу, ӕмӕ йӕ сӕрыл сӕрдасӕн никуы андзӕвдзӕн».

¹²Дунедарӕгмӕ куывта ӕмӕ куывта, Елиа та йӕм касти.

¹³Аннӕ дзырдта йӕ мидзӕрдӕйы, ӕмӕ йӕ былтӕ змӕлыдысты, фӕлӕ йӕ хъӕлӕс нӕ хъуысти, ӕмӕ Елиамӕ расыджы хуызӕн фӕкаст.

¹⁴Ӕмӕ йын загъта Елиа: «Расыгӕй ма ам бирӕ лӕудзынӕ? Ацу ӕмӕ баулӕф».

¹⁵Аннӕ йын дзуапп радта: «Нӕ, ме ’лдар, ӕз сӕн дӕр нӕ бануӕзтон ӕмӕ махсымӕ дӕр. Фыр адӕргӕй цы акӕнон, уый нӕ зонын ӕмӕ мӕнӕ Дунедарӕгӕн мӕ риссӕгтӕ дзурын.

¹⁶Дӕ цагъарыл дӕ зӕрдӕ ма фӕхудӕд — мӕ маст ӕмӕ мӕ хъыг мӕ хуылфы нал цӕуынц, ӕмӕ мын банцайӕн уымӕн нал уыди».

¹⁷Елиа йын загъта: «Цу фарнимӕ. Израилы Хуыцаумӕ дӕ куывд фехъуысдзӕн ӕмӕ дын, цы курыс, уый ратдзӕн».

¹⁸Аннӕ загъта: «Дӕ хорзӕхӕй хайджын куы фӕуаид дӕ цагъар!» Сӕхимӕ рацыди, хӕринаг бахордта ӕмӕ уӕдӕй фӕстӕмӕ ӕрхӕндӕг нал уыд.

¹⁹Райсомӕй раджы сыстадысты, скуывтой Дунедарӕгмӕ ӕмӕ сӕхимӕ, Рамайы[1] сахармӕ, аздӕхтысты. Елкана йӕ ус Аннӕимӕ ӕмуат ӕрцыди. Дунедарӕджы зӕрдыл лӕууыд Аннӕ,

²⁰ӕмӕ Аннӕ банхъӕлцау ис. Йӕ арыны афон куы ӕрцыд, уӕд ын райгуырди лӕппу, ӕмӕ йыл сӕвӕрдта ном Самуел, уымӕн ӕмӕ дам ӕй Дунедарӕгӕй ракуырдтон.

²¹Елкана йӕ бинонтимӕ ссыди Дунедарӕгӕн ӕрвылазы нывонд ӕмӕ сомыйы нывӕндтӕ ӕрхӕссынмӕ.

²²Аннӕ та нӕ ацыди. Йӕ мойӕн загъта: «Саби риуӕй иртӕст куы ’рцӕуа, уӕд ӕй мӕхӕдӕг фӕхӕццӕ кӕндзынӕн Дунедарӕджы размӕ, ӕмӕ уыйадыл уым баззайдзӕн».

²³Елкана йын загъта: «Дӕ бар дӕхи. Лӕуу уал, дзидзи йын цалынмӕ дарыс, уӕдмӕ. Дунедарӕгӕн цы дзырд радтай, уый Йын фӕндон уӕд». Сылгоймаг баззади хӕдзары ӕмӕ хаста йӕ лӕппуйы, цалынмӕ дзидзидай уыди, уӕдмӕ.

²⁴Риуӕй иртӕст куы ӕрцыди саби, уӕд йемӕ ацыди Силоммӕ. Йемӕ ракодта ӕртӕаздзыд гал, райста ссады иу ефӕ ӕмӕ сӕны лалым, ӕмӕ афтӕмӕй ссыдысты Дунедарӕджы хӕдзармӕ. Лӕппу нырма ӕнахъом уыди.

²⁵Гал акусарт кодтой ӕмӕ лӕппуйы Елиайы размӕ бакодтой.

²⁶Аннӕ загъта: «Ме ’лдар цӕра, ӕз, ацы ран чи лӕууыд ӕмӕ Дунедарӕгмӕ чи куывта, уыцы сылгоймаг дӕн.

²⁷Мӕнӕ Йӕм ацы сабийы тыххӕй куывтон, ӕмӕ мын ӕй Дунедарӕг радта.

²⁸Ныр та мӕ рад у, ӕмӕ Йын ӕй дӕттын: цард-цӕрӕнбонтӕм Дунедарӕджы у». Ӕмӕ лӕппу Дунедарӕджы раз ӕрзоныг кодта уым.