Read Библи: Сыгъдӕг 1 Паддзахӕдтӕ 10 Bible Online

1 Паддзахӕдтӕ 10 - Библи: Сыгъдӕг bible

1 Паддзахӕдтӕ 10

¹Самуел райста сойы дурын, Саулы сӕрыл оливӕйы сой ӕруагъта, аба йын кодта ӕмӕ загъта: «Ацы байсӕрстӕй дӕ Дунедарӕг Йӕ адӕмӕн фӕтӕг зӕгъы.

²Ныр, ардыгӕй куы ацӕуай, уӕд Бениамины зӕххыл, Целцахы, Рахелы зӕппадзы цур, амбӕлдзынӕ дыууӕ лӕгыл. Уыдон дын зӕгъдзысты: „Цы сыл хӕрджытӕ агурӕг рацыдтӕ, уыдон разындысты, ӕмӕ дӕ фыды йӕ хӕрджыты мӕт нал ис, фӕлӕ йӕ зӕрдӕ сымахмӕ ӕхсайы, ныр кӕм агурон мӕ фырты, зӕгъгӕ.“

³Уырдыгӕй ацӕудзынӕ дарддӕр ӕмӕ бахӕццӕ уыдзынӕ Фаворы Тулдзмӕ. Уым дыл амбӕлдзысты Вефилы кувӕн къуыбырмӕ, Хуыцаумӕ цӕуӕг ӕртӕ лӕджы. Иумӕ дзы уыдзӕнис ӕртӕ сӕныччы, иннӕмӕ — ӕртӕ дзулы гуыдыны, ӕртыккагмӕ — сӕны лалым.

⁴Зӕгъдзысты дын салам, дӕтдзысты дын дыууӕ дзулы, ӕмӕ-иу сӕ райс.

⁵Уый фӕстӕ бахӕццӕ уыдзынӕ Хуыцауы кувӕн къуыбырмӕ, филистимаг ӕфсады къорд кӕм лӕууы, уырдӕм. Уым, сахармӕ бацӕуӕны цур, амбӕлдзынӕ къуыбырӕй цӕуӕг пехуымпарты къордыл. Уыдон кӕндзысты пехуымпариуӕг, сӕ разӕй цӕуджытӕ цӕгъддзысты дыууадӕстӕнонтӕй, далатӕй, уадындзтӕй ӕмӕ хъисфӕндыртӕй.

⁶Дунедарӕджы Уд дыл ӕртыхсдзӕн, ӕмӕ ды дӕр семӕ пехуымпариуӕг кӕнын райдайдзынӕ, ӕндӕр адӕймаг суыдзынӕ.

⁷Ӕппӕт уыдӕттӕ дыл куы ’рцӕуа, уӕд-иу уавӕртӕм гӕсгӕ дарддӕр архай, уымӕн ӕмӕ дыл Хуыцау ауды.

⁸Мӕ разӕй-иу цу Гилгалмӕ. Ӕз дӕм ныццӕудзынӕн иууылсудзинаг нывӕндтӕ ӕмӕ фидыды нывӕндтӕ ӕрхӕссынмӕ. Авд боны-иу банхъӕлмӕ кӕс ме ’рцыдмӕ, стӕй дын бацамондзынӕн, цы гӕнгӕ у, уый».

⁹Саул куыддӕр фӕзылди Самуелы цурӕй араст уӕвынмӕ, афтӕ йын Хуыцау йӕ зӕрдӕ фӕивта. Самуел цыдӕриддӕр загъта, уыдон ӕрцыдысты тӕккӕ уыцы бон.

¹⁰Гевӕмӕ куы бахӕццӕ сты, уӕд амбӕлдысты пехуымпарты къордыл. Дунедарӕджы Уд ӕртыхсти Саулыл, ӕмӕ уый дӕр пехуымпариуӕг кӕнын райдыдта.

¹¹Ныронг ӕй чи зыдта, уыдон ӕй пехуымпартимӕ пехуымпариуӕггӕнгӕ куы федтой, уӕд сӕ кӕрӕдзийӕн дзырдтой: «Уый цы ’рцыди Кишы фыртыл? Ау, Саул дӕр пехуымпар сси?»

¹²Уырдыгӕттӕй иу лӕг афтӕ бакодта: «Ӕмӕ иннӕтӕн та сӕ фыдӕлтӕ чи сты?» Афтӕмӕй ӕмбисондӕн баззад: «Ау, Саул дӕр пехуымпар сси?»

¹³Саул пехуымпариуӕг куынӕуал кодта, уӕд кувӕн къуыбырмӕ ацыд.

¹⁴Саулы фыды ’фсымӕр бафарста Саул ӕмӕ йе ’ххуырсты: «Кӕм уыдыстут?» Саул загъта: «Хӕрджыты агуырдтам, ӕмӕ сӕ куы нӕ ссардтам, уӕд ацыдыстӕм Самуелмӕ».

¹⁵Саулы фыды ’фсымӕр загъта: «Самуел уын цы дзырдта, уыдӕттӕ-ма мын рафӕзм».

¹⁶Саул дзуапп радта: «Загъта нын, хӕрджытӕ разындысты, зӕгъгӕ». Самуел ын паддзахдзинады тыххӕй цы дзырдта, уый та не схъӕр кодта.

¹⁷Самуел Израилы адӕмы ӕрӕмбырд кодта Мицпамӕ, Дунедарӕджы размӕ.

¹⁸Загъта сын: «Афтӕ зӕгъы Дунедарӕг, Израилы Хуыцау: „Израилы ракодтон Мысырӕй. Фервӕзын уӕ кодтон мысырӕгты къухӕй ӕмӕ, ноджыдӕр ма уӕ чи ӕфхӕрдта, уыцы паддзахӕдты къухӕй дӕр“.

¹⁹Сымах та абон уӕхи атигъ кодтат уӕ Хуыцауыл, кӕд ӕмӕ уӕ Уый уе ’ппӕт фыдбылызтӕ ӕмӕ хъизӕмӕрттӕй ирвӕзын кӕны, уӕддӕр ӕмӕ Йын загътат: „Сӕвӕр нын паддзах нӕ сӕргъы“. Гъемӕ ныр Дунедарӕджы раз ӕрлӕуут хӕдзарвӕндаггай, мыггаггай».

²⁰Самуел фӕсидти Израилы ӕппӕт хӕдзарвӕндӕгтӕм. Сӕппӕрстой хӕлттӕ, ӕмӕ схаудта Бениамины хӕдзарвӕндаджы хал.

²¹Уӕд Бениамины хӕдзарвӕндагмӕ фӕсидти мыггаггай, ӕмӕ схаудта Матрийы мыггаджы хал. Матрийы мыггаджы лӕгты ӕрбакодтой, ӕмӕ схаудта Кишы фырт Саулы хал. Саулы агуырдтой, фӕлӕ йӕ не ссардтой.

²²Уӕд та Дунедарӕджы бафарстой: «Ӕрбацӕудзӕни ма ӕви нӕ?» Дунедарӕг загъта: «Уӕртӕ чырӕйы ’хсӕн бамбӕхсти».

²³Ауадысты ӕмӕ йӕ ракодтой уырдыгӕй. Саул адӕмы ’хсӕн ӕрлӕууыд. Ахӕм бӕрзонд уыд, ӕмӕ йын ӕппӕт Израилы адӕмӕй йӕ роцъомӕ дӕр ничи ӕххӕссыд.

²⁴Самуел адӕмӕн загъта: «Уынут, Дунедарӕг кӕй равзӕрста, уый? Ӕппӕт адӕмы ’хсӕн ын ӕмбал нӕй». Адӕм иууылдӕр цины хъӕр ныккодтой: «Ӕгас цӕуӕд паддзах!»

²⁵Самуел адӕмӕн радзырдта паддзахы барты тыххӕй, чиныджы сӕ ныффыста ӕмӕ чиныг Дунедарӕджы кувӕндоны сӕвӕрдта. Стӕй ӕппӕт адӕмы дӕр сӕ хӕдзӕрттӕм ауагъта.

²⁶Саул дӕр йӕ хӕдзармӕ, Гевӕйы сахармӕ, ацыд. Йемӕ ацыдысты, Хуыцауыл иузӕрдион чи уыдис, уыцы хъӕбатыртӕ дӕр.

²⁷Фӕлӕ ахӕм цъаммар адӕймӕгтӕ дӕр уыд, афтӕ чи дзырдта: «Ай у махӕн нӕ ирвӕзынгӕнӕг?» Ницӕмӕ йӕ ӕрдардтой ӕмӕ йын лӕвӕрттӕ дӕр нӕ ракодтой. Фӕлӕ Саул, цыма ницы бафиппайдта, афтӕ йӕхи дардта.