Read Библи: Сыгъдӕг 1 Паддзахӕдтӕ 13 Bible Online

1 Паддзахӕдтӕ 13 - Библи: Сыгъдӕг bible

1 Паддзахӕдтӕ 13

¹Саулыл дӕс ӕмӕ ссӕдз азы цыд, Израилы паддзах куы сси, уӕд. Израилӕн паддзахиуӕг фӕкодта дыууӕ ӕмӕ дыууиссӕдз азы[6].

²Израилӕгтӕй Саул йӕхицӕн равзӕрста ӕртӕ мин лӕджы. Уыдонӕй дыууӕ мины Саулимӕ уыдысты Михмасы ӕмӕ Вефилы хӕхбӕсты, иу мин та — йӕ фырт Ионатанимӕ Бениамины Гевӕйы. Иннӕ адӕмы Саул ауагъта сӕ хӕдзӕрттӕм.

³Ионатан ныддӕрӕн кодта, филистимӕгтӕн Гевӕйы цы ӕфсады къорд лӕууыд, уый, ӕмӕ филистимӕгтӕн уыцы хабар сӕ хъустыл ӕрцыд. Ныр Саул та ӕгас бӕстӕйыл сыкъауадындзӕй ныууасын кодта ӕмӕ фӕсидт: «Фехъусӕнт дзуттӕгтӕ!»

⁴Ӕппӕт Израилы дӕр куы фехъуыстой, Саул ныддӕрӕн кодта филистимӕгты ӕфсады къорд, ӕмӕ Израил филистимӕгтӕн бынтондӕр фенӕуынон ис, уӕд адӕм Саулмӕ ӕрӕмбырд сты Гилгалы сахармӕ.

⁵Филистимӕгтӕ растадысты Израилы ныхмӕ схӕцынмӕ. Уыди сӕм ӕртӕ мин тохуӕрдоны, ӕхсӕз мин бӕхджын ӕфсӕддоны ӕмӕ денджызы былгӕрон змисау ӕнӕнымӕц фистӕг ӕфсад. Ӕрбацыдысты ӕмӕ Бет-Авенӕй скӕсӕнӕрдӕм, Михмасы цур, рӕсӕнуаты ӕрлӕууыдысты.

⁶Израилӕгтӕ уыдтой сӕ уӕззау уавӕр, уынгӕджы фесты ӕмӕ сӕхи ӕмбӕхстой лӕгӕтты, цъассыты, къӕдзӕхты скъуыдты, зӕппӕдзты ӕмӕ донуӕтты.

⁷Дзуттӕгтӕй иуӕй-иутӕ ахызтысты Иорданы фаллаг фарсмӕ — Гады зӕхмӕ ӕмӕ Галаадмӕ. Саул та нырма Гилгалы уыди, ӕмӕ, йемӕ цы адӕм баззад, уыдон иууылдӕр ӕмризӕджы рызтысты.

⁸Самуел цы ӕмгъуыд скодта, уымӕ гӕсгӕ йӕм Саул авд боны банхъӕлмӕ касти, фӕлӕ Самуел не ’рбацыди Гилгалмӕ, ӕмӕ адӕм фӕйнӕрдӕм лидзын райдыдтой.

⁹Уӕд Саул загъта: «Ракӕнут-ма мӕм иууылсудзинаг нывондаг ӕмӕ фидыды нывондӕгтӕ». Ӕмӕ иууылсудзинаг нывонд ӕрхаста.

¹⁰Йӕ иууылсудзинаг нывонд хаст нӕма фӕци, афтӕ ӕрбахӕццӕ Самуел, ӕмӕ Саул йӕ размӕ рауади салам ын раттынмӕ.

¹¹Фӕлӕ йӕ Самуел афарста: «Уый цы бакодтай?» Саул ын дзуапп радта: «Ӕз уыдтон, адӕм лидзын райдыдтой, ды ӕмгъуыды бонмӕ не ’рбацыдтӕ, филистимӕгтӕ та ныридӕгӕн Михмасы ӕрӕмбырд сты,

¹²ӕмӕ ахъуыды кодтон: ныртӕккӕ мӕм филистимӕгтӕ ӕрбабырсдзысты Гилгалмӕ, ӕз та Дунедарӕгӕн нӕма балӕгъстӕ кодтон. Гӕнӕн мын куынӕуал уыд, уӕд мӕхӕдӕг ӕрхастон иууылсудзинаг нывонд».

¹³Самуел загъта Саулӕн: «Ӕнӕзонд ми бакодтай. Дунедарӕг дын, дӕ Хуыцау, цы бафӕдзӕхста, уый нӕ сӕххӕст кодтай. Ӕндӕра дын Дунедарӕг дӕ хӕдзарӕн раттаид Израилы сӕргъы мыггагмӕ паддзахиуӕг кӕныны бар.

¹⁴Фӕлӕ ныр дӕ паддзахдзинад бирӕ нӕ ахӕсдзӕн. Дунедарӕг Йӕхицӕн бацагурдзӕн зӕрдӕхцон адӕймаг ӕмӕ йӕ скӕндзӕн Йӕ адӕмы фӕтӕг, уымӕн ӕмӕ Йын ды Йӕ фӕндон нӕ сӕххӕст кодтай».

¹⁵Уыйадыл Самуел ацыди Гилгалӕй. [Адӕмӕй ма дзы чи баззади, уыдон дӕр Саулы фӕдыл Гилгалӕй знаджы ныхмӕ хӕцынмӕ Бениамины Гевӕмӕ араст сты.] Саул йӕ адӕмы банымадта, ӕмӕ уыдысты ӕхсӕзсӕдӕйы бӕрц.

¹⁶Саул ӕмӕ йӕ фырт Ионатан, семӕ цы адӕм баззад, уыдонимӕ ӕрбынат кодтой Бениамины Гевӕйы. Филистимӕгты рӕсӕнуат та Михмасы уыди.

¹⁷Филистимӕгты рӕсӕнуатӕй ӕртӕ къорды рацыд бӕстӕ гӕныстон кӕнынмӕ. Сӕ иу араст Офрамӕ фӕндагыл, Шуалы зӕхмӕ,

¹⁸иннӕ — Бет-Хоронмӕ фӕндагыл, ӕртыккаг къорд та йӕ ных сарӕзта, Цевоимы дӕлвӕз ӕмӕ ӕдзӕрӕг быдыры ацы фарс цы хӕхты рагъ ис, уырдӕм.

¹⁹Уыцы заман Израилы иунӕг куырд дӕр нӕ уыди — филистимӕгтӕ тарстысты, дзуттӕгтӕ сӕхицӕн кӕрдтӕ ӕмӕ ӕрцытӕ куы саразой, уымӕй.

²⁰Алы израилаг дӕр йӕ дзыргъа, йӕ рувӕн, йӕ фӕрӕт кӕнӕ йе ’хсырф цыргъ кӕнынмӕ филистимӕгтӕм хаста.

²¹Цыргъгӕнӕггаг та — дзыргъайӕн, рувӕнӕн, ӕртӕкъахыгӕн, фӕрӕтӕн, фостӕрӕн хъилӕн — шекелӕн йӕ дыууӕ ӕртыккаг хайы.

²²Тохы бон куы ралӕууыд, уӕд Саул ӕмӕ Ионатанимӕ цы адӕм уыд, уыдонӕй никӕмӕ разынди нӕдӕр кард, нӕдӕр арц. Ахӕм хӕцӕнгӕрзтӕ ӕрмӕст Саул ӕмӕ йӕ фырт Ионатанмӕ уыди.

²³Филистимӕгты ӕфсӕддон къорд рацыди Михмасмӕ бацӕуӕн бахъахъхъӕнынмӕ.