Read Библи: Сыгъдӕг 1 Паддзахӕдтӕ 21 Bible Online

1 Паддзахӕдтӕ 21 - Библи: Сыгъдӕг bible

1 Паддзахӕдтӕ 21

¹Давид ӕрхӕццӕ ис Новы сахармӕ, сауджын Ахимелехмӕ. Ахимелех тарстхуызӕй йӕ размӕ рауад ӕмӕ йӕ афарста: «Иунӕг цӕмӕн дӕ, демӕ куыд ничи ис?»

²Давид Ахимелехӕн дзуапп радта: «Паддзах мын иу хъуыддаг бахӕс кодта ӕмӕ мын загъта: „Цӕмӕ дӕ ’рвитын ӕмӕ дын цы фӕдзӕхсын, уый мачи базонӕд“. Мӕ адӕмы та бӕрӕг ранмӕ барвыстон.

³Ныр, дӕ къух цы амоны, уый мын ратт: иу-фондз дзулы, кӕнӕ ма дӕм цы ис, уый».

⁴Сауджын загъта Давидӕн: «Ӕнӕуи дзул мӕм нӕй, фӕлӕ мӕм ис кувӕггаг дзул. Ӕрмӕст, кӕд дӕ адӕм сӕхиуыл фӕхӕцыдысты ӕмӕ сылгоймӕгтимӕ нӕ фесты, уӕд».

⁵Давид ын дзуапп радта: «Хӕстон балцы куы рацӕуӕм, уӕд сылгоймӕгтӕ тобӕгонд вӕййынц махӕн. Нӕ балц Хуыцауы номыл куы нӕ вӕййы, уӕд дӕр мӕ адӕм куы никуы фӕчъизи кӕнынц сӕхи, уӕд абон куыннӕ хъуамӕ баззадаиккой сыгъдӕгӕй?»

⁶Ӕмӕ йын сауджын радта кувӕггаг дзултӕ. Хуымӕтӕг дзул ӕм нӕ уыди, фӕлӕ, Дунедарӕджы раз кувӕндоны кӕй ӕрӕвӕрынц, ӕрмӕстдӕр ахӕм дзултӕ. Уыдон ист ӕрцӕуынц кувӕндоны фынгӕй ӕмӕ тӕккӕ уыцы бон сӕ бӕсты ӕрӕвӕрдӕуы ногконд дзултӕ.

⁷Уыцы бон уым, Дунедарӕджы хӕдзары, уыди Саулы дӕлдӕртӕй иу, йӕ фыййӕутты хицау, едомаг, йӕ ном — Доег.

⁸Давид Ахимелехы бафарста: «Ам дӕм арц кӕнӕ кард нӕ разындзӕни? Мемӕ нӕдӕр мӕ кард райстон, нӕдӕр мӕ иннӕ хотыхтӕ, уымӕн ӕмӕ мын паддзахы фӕдзӕхст ӕвӕстиатӕй ӕххӕстгӕнгӕ уыд».

⁹Сауджын загъта: «Мӕнӕ Теревинфы дӕлвӕзы кӕй амардтай, уыцы филистимаг Голиафы кард ефоды фӕстӕ кӕттаджы тыхтӕй лӕууы. Кӕд дӕ фӕнды, уӕд ӕй райс, ӕндӕр мӕм ницы ис». Давид загъта: «Амӕн дзы ӕмбал нӕй. Ратт мын ӕй».

¹⁰Тӕккӕ уыцы бон Давид, Саулӕй лидзгӕйӕ, араст ис дарддӕр, ӕмӕ Гаты паддзах Ахишмӕ бацыд.

¹¹Ахишӕн йӕ дӕлдӕртӕ загътой: «Уый Давид куы у, амы паддзӕхтӕй иу! Ууыл зарыдысты, кафгӕйӕ: „Саул ныццагъта минтӕ, Давид та — дӕсгай минтӕ“?»

¹²Давид уыцы ныхӕстӕ йӕ зӕрдыл бадардта ӕмӕ тынг фӕтарсти Гаты паддзах Ахишӕй.

¹³Уымӕ гӕсгӕ сӕ цуры йӕхи зондцухӕй равдыста, кулдуарыл цыдӕртӕ хылы-мылы кодта ӕмӕ йӕ боцъойыл йӕ сӕт уагъта.

¹⁴Ахиш йӕ дӕлдӕртӕн загъта: «Ацы лӕг ӕрра у, уый нӕ уынут? Цы мӕм ӕй ӕрбакодтат?

¹⁵Ӕрратӕ хъуаг ма дӕн! Йе ’рра митӕ мын цӕмӕй равдиса, уый тыххӕй мӕм ӕй ӕрбакодтат? Ӕмӕ йӕ ӕз хъуамӕ мӕ хӕдзармӕ бауадзон, нӕ?!»