Read Библи: Сыгъдӕг 1 Паддзахӕдтӕ 24 Bible Online

1 Паддзахӕдтӕ 24 - Библи: Сыгъдӕг bible

1 Паддзахӕдтӕ 24

¹Уырдыгӕй Давид ссыди Ен-Гедимӕ ӕмӕ уым йӕхи бааууон кодта.

²Саул филистимӕгты фӕдыл стӕрӕй куы ӕрбаздӕхт, уӕд ӕм фӕхабар чындӕуыд, Давид Ен-Гедийы ӕдзӕрӕг быдыры ис, зӕгъгӕ.

³Саул ӕрӕмбырд кодта ӕртӕ мин лӕджы, Израилы ӕвзаргӕты, ӕмӕ, сычъиты хӕтӕнтӕ кӕм уыдысты, уыцы хӕхты ’рдӕм араст Давид ӕмӕ йӕ адӕмы агурӕг.

⁴Фӕндаджы был фосдарӕн уӕтӕрты рӕзты куы фӕцӕйцыдысты, уӕд уым иу лӕгӕтмӕ Саул йӕхи хъуыдыйы бауади. Ныр Давид та йӕ адӕмимӕ лӕгӕты рӕбынӕй бадти,

⁵ӕмӕ йын йӕ адӕм загътой: «Мӕнӕ дын Дунедарӕг цы боны кой кодта, уый, де знаджы дын дӕ къухмӕ ратдзынӕн, ӕмӕ дӕ цы бафӕнда, уый-иу ын бакӕн, зӕгъгӕ». Давид бахъуызыди ӕмӕ Саулы пӕлӕзы фӕччи аивӕй ралыг кодта.

⁶Фӕлӕ фыр ӕфсӕрмӕй йӕ цӕсгом ссыгъди, Саулы фӕччи кӕй ралыг кодта, уый тыххӕй.

⁷Ӕмӕ йӕ адӕмӕн загъта: «Дунедарӕг мӕ бахизӕд, мӕ паддзахмӕ, Дунедарӕджы байсӕрстмӕ, мӕ къух сисынӕй — уый Дунедарӕджы байсӕрст у».

⁸Уыцы ныхӕстӕй Давид йӕ адӕмы баурӕдта, Саулмӕ бавналын сӕ нӕ бауагъта. Саул лӕгӕтӕй рахызти ӕмӕ йӕ фӕндагыл араст.

⁹Уӕд Давид дӕр лӕгӕтӕй рацыди ӕмӕ ныхъхъӕр кодта: «Паддзах, мӕ бардарӕг!» Саул фӕстӕмӕ фӕкаст, ӕмӕ Давид йӕ разы зӕххыл ныддӕлгом ис.

¹⁰Загъта Саулӕн: «Давид дын фыд ракӕнынмӕ хъавы, зӕгъгӕ дын чи дзуры, уыдоны ныхӕстӕм цӕмӕн хъусыс?

¹¹Абон дӕхи цӕстӕй федтай, Дунедарӕг дӕ лӕгӕты мӕ къухтӕм куыд лӕвӕрдта, уый. Дзырдтой мын, амар ӕй, зӕгъгӕ, фӕлӕ дын ӕз фӕтӕригъӕд кодтон ӕмӕ загътон: „Мӕ паддзахмӕ мӕ къух нӕ сисдзынӕн, уымӕн ӕмӕ уый Дунедарӕджы байсӕрст у“.

¹²Мӕ фыды хай! Ӕрбакӕс-ма мӕнӕ мӕ къухы дӕ пӕлӕзы фӕччимӕ. Маргӕ дӕ кӕй нӕ акодтон, фӕлӕ дын ӕрмӕст дӕ фӕччи кӕй ралыг кодтон, уӕд та дӕ уымӕй бауырнӕд, мӕ зӕрдӕйы фыдӕх кӕй нӕй, уый. Дӕ цуры тӕригъӕдджын ницӕмӕй дӕн, ды та мӕн амарыны тыххӕй мӕ фӕдыл зилыс.

¹³Дунедарӕг тӕрхонгӕнӕг фӕуӕд не ’хсӕн, ӕмӕ дӕ Дунедарӕг райсӕд мӕ маст. Ӕз дӕм мӕ къух нӕ сисдзынӕн.

¹⁴Рагон ӕмбисонд афтӕ зӕгъы: „Фыдлӕгӕй фыдракӕнд рацӕуы“. Фӕлӕ дӕм ӕз мӕ къух нӕ сисдзынӕн.

¹⁵Кӕй ныхмӕ рацыд Израилы паддзах? Кӕй фӕдыл зилыс? Мард куыдзы фӕдыл, иунӕг ӕхсӕнчъы фӕдыл!

¹⁶Дунедарӕг тӕрхонгӕнӕг фӕуӕд не ’хсӕн ӕмӕ нын нӕ хъуыддаг равзарӕд. Мӕ фарс рахӕцӕд, сраст мӕ кӕнӕд ӕмӕ мӕ бахизӕд дӕ къухӕй».

¹⁷Давид йӕ ныхас куы фӕци, уӕд Саул загъта: «Давид, мӕ хъӕбул, уый дӕ хъӕлӕс хъусын?» Ӕмӕ хъӕрӕй ныккуыдта.

¹⁸Стӕй Давидӕн загъта: «Ды мӕнӕй растдӕр дӕ. Ды мын хорздзинад сарӕзтай, ӕй та дын ӕй бафыстон ӕвзӕрӕй.

¹⁹Абон равдыстай, хорз мын кӕй кӕныс, уый — Дунедарӕг мӕ дӕ къухтӕм лӕвӕрдта, фӕлӕ мӕ ды нӕ амардтай.

²⁰Кӕд фендӕуыд афтӕ, ӕмӕ, йе знагыл чи сӕмбӕлд, уый йӕ фарнимӕ ауадза йӕ фӕндагыл? Дунедарӕг дын хорзӕй бафиддзӕн, абон мын цы хорздзинад сарӕзтай, уый!

²¹Ныр ӕз зонын, ды ӕнӕмӕнг паддзахиуӕг кӕй кӕндзынӕ ӕмӕ Израилы паддзахад дӕ фӕрцы кӕй сфидар уыдзӕн, уый.

²²Гъемӕ мын Дунедарӕгӕй ард бахӕр, куынӕуал уон, уӕд мын мӕ байзӕддаджы кӕй нӕ фесафдзынӕ ӕмӕ мын мӕ ном уӕлӕуыл мӕ мыггаджы ’хсӕн кӕй ныууадздзынӕ, уый тыххӕй».

²³Давид ард бахордта Саулӕн. Саул йӕ хӕдзармӕ ацыди, Давид ӕмӕ йӕ адӕм та се ’мбӕхсӕнмӕ ссыдысты.