Read Библи: Сыгъдӕг 1 Паддзахӕдтӕ 25 Bible Online

1 Паддзахӕдтӕ 25 - Библи: Сыгъдӕг bible

1 Паддзахӕдтӕ 25

¹Самуел амарди. Ӕрӕмбырд сты Израилы адӕм, фӕхъыг ыл кодтой ӕмӕ йӕ бавӕрдтой йӕ райгуырӕн сахары, Рамайы. Давид араст ис Параны ӕдзӕрӕг быдырмӕ.

²Калевы мыггагӕй иу лӕг, йӕ ном — Навал, Маоны сахайраг, йӕ дзугтӕ Кармелы сахары дардта. Тынг хъӕздыг уыд: ӕртӕ мины йӕм фыстӕ уыд, иу мин — сӕгътӕ. Йӕ фыстӕ ӕлвыдта ӕмӕ уымӕ гӕсгӕ Кармелы уыди. Навалы ус Авигеа — ӕмбаргӕ ӕмӕ рӕсугъд сылгоймаг, Навал йӕхӕдӕг та — фыдзонд ӕмӕ тыхдзырд.

⁴Давидмӕ ӕдзӕрӕг быдырмӕ фӕхабар чындӕуыд, Навал йӕ фыстӕ ӕлвыны, зӕгъгӕ,

⁵ӕмӕ арвыста дӕс лӕппуйы. Бафӕдзӕхста сын: «Ссӕут Кармелмӕ ӕмӕ бацагурут Навалы. Салам ын раттут мӕ номӕй

⁶ӕмӕ йын зӕгъут: „Фарн дӕм бадзурӕд! Фарн дӕ хӕдзары дӕр ӕмӕ дӕ исбоны дӕр.

⁷Фехъуыстон, дӕ фыстӕ дын кӕй ӕлвынынц, уый. Дӕ фыййӕуттӕ айразмӕ мах цур хызтой фос, ӕмӕ сӕ хъыджы ницӕмӕй бацыдыстӕм. Цалынмӕ Кармелы уыдысты, уӕдмӕ сӕ ницы фӕхъуыди.

⁸Де ’ххуырстыты бафӕрс, ӕмӕ дын ӕй зӕгъдзысты. Гъемӕ мын ды дӕр мӕ лӕппутӕм хорз цӕстӕй ракӕс, уымӕн ӕмӕ дӕм фарны бон ӕрбацыдыстӕм. Ратт, дӕ хорзӕхӕй, дӕ цагъартӕ ӕмӕ дӕ фырт Давидӕн, дӕ къух цы амоны, уый“».

⁹Давиды адӕм фӕцыдысты Навалмӕ ӕмӕ йын Давиды ныхӕстӕ рафӕзмыдтой. Дзырд куы фесты,

¹⁰уӕд сын Навал ахӕм дзуапп радта: «Чи у Давид? Чи у Йессейы фырт? Сбирӕ сты абон, сӕ хицӕуттӕй чи алыгъд, ахӕм цагъартӕ.

¹¹Ау, мӕ дзул ӕмӕ мӕ сӕн, стӕй мӕ фыстӕ ӕлвынджытӕн цы кусарт акодтон, уый ныр адонӕн раттон? Кӕцӕй сты, уый дӕр куы нӕ зонын».

¹²Давиды адӕм фӕстӕмӕ аздӕхтысты ӕмӕ Давидӕн Навалы ныхӕстӕ рафӕзмыдтой.

¹³Давид йӕ адӕмӕн загъта: «Алчидӕр уӕ йӕ кард йӕ астӕуыл бабӕттӕд». Ӕмӕ дзы алчидӕр йӕ кард йӕ астӕуыл бабаста, Давид йӕхӕдӕг дӕр. Давиды фӕдыл ацыд иу-цыппарсӕдӕ лӕджы, дыууӕсӕдӕйӕ та асадӕны баззадысты.

¹⁴Навалы ус Авигеамӕ та ӕххуырстытӕй иу фӕхабар кодта: «Давид ӕдзӕрӕг быдырӕй ӕрбарвыста минӕвӕрттӕ не ’лдарӕн салам раттынмӕ, фӕлӕ сыл уый схъӕртӕ кодта.

¹⁵Афтӕмӕй Давиды адӕм тынг баузӕлыдысты махыл, нӕ зӕрдӕ сыл ницӕмӕй фӕхудти. Сӕ цуры нӕ фос куы хызтам, уӕд нӕ никуы ницы фӕхъуыди. Ӕхсӕвӕй-бонӕй уыдыстӕм сӕ дӕлбазыр.

¹⁶

¹⁷Ныр ахъуыды кӕн, цы гӕнгӕ дын у, ууыл. Не ’лдар ӕмӕ йӕ хӕдзармӕ фыдбылыз кӕсы, фӕлӕ фыдӕбоны лӕг у, ӕмӕ йӕм дзурӕн нӕй».

¹⁸Уӕд Авигеа ӕвӕстиатӕй райста дыууӕсӕдӕ дзулы, дыууӕ лалымы сӕн, фондз кусартгонд фысы, цӕкуыты фондз мӕрты, чисмисы сӕдӕ ӕмӕ легъуийы дыууӕсӕдӕ халы ӕмӕ сӕ хӕрджытыл ӕргъомбӕстытӕй сӕвӕрын кодта.

¹⁹Йе ’ххуырстытӕн загъта: «Мӕ разӕй цӕугӕут, мӕхӕдӕг дӕр — уӕ фӕдыл». Ныр Навалӕн та ницы ской кодта.

²⁰Сылгоймаг хӕрӕгыл хохаг нарӕг къахвӕндагыл куыд ӕрцӕйцыди, афтӕ Давид ӕмӕ йӕ адӕм йӕ размӕ схӕццӕ сты. Хӕрхӕмбӕлд сыл фӕци Авигеа.

²¹Давид йӕхинымӕр дзырдта: «Ӕнхъӕлдӕн ӕмӕ дзӕгъӕлы фӕхъахъхъӕдтон ацы лӕджы исбон ӕдзӕрӕг быдыры. Сӕфын дзы ницы бауагътон, ныр мын мӕ хорз ӕвзӕрӕй фиды.

²²Афтӕтӕ ӕмӕ уфтӕтӕ, стӕй мын ноджы фыддӕртӕ бакӕнӕд Хуыцау, Навалы хӕдзаронтӕй абонӕй райсоммӕ иу нӕлгоймаг дӕр куы ныууадзон!»

²³Авигеа Давиды куыддӕр ауыдта, афтӕ ӕрфистӕг ӕмӕ йын ныллӕг акуывта,

²⁴йӕ къӕхты бынмӕ ӕрхауд ӕмӕ загъта: «Ӕппӕт азым дӕр мӕныл ӕфтыд фӕуӕд, ме ’лдар. Бар ратт, ӕмӕ дӕ цагъар зӕгъа, йӕ ныхасмӕ йын байхъус.

²⁵Ме ’лдар мурмӕ дӕр ма дарӕд уыцы фыдӕбоны лӕджы, Навалы. Йӕ ном дӕр йӕ уӕлӕ куы ис — Навал[9], йе ’дылыдзинад йемӕ ис. Ӕз та, ме ’лдар, уынгӕ дӕр нӕ фӕкодтон де ’рвыст ӕххуырстыты.

²⁶Дунедарӕг дӕ абон бахызта, ме ’лдар, туг ныккалыны тӕригъӕдӕй, дӕ маст дӕхи къухӕй райсынӕй. Ме ’лдар, сомы кӕнын Дунедарӕгӕй ӕмӕ дӕуӕй, Навалы хал ахӕрдзысты де знӕгтӕ, ме ’лдары ныхмӕ фыдвӕндтӕ аразджытӕ.

²⁷Мӕнӕ дӕ цагъар ме ’лдарӕн цы лӕвӕрттӕ рахаста, уыдон. Ме ’лдары фӕсдзӕуинтӕн лӕвӕрд ӕрцӕуӕнт.

²⁸Дӕ цагъарӕн йӕ азым ныббар. Дунедарӕг ме ’лдарӕн ӕмӕ йӕ хӕдзарӕн ӕнӕмӕнг ратдзӕни мыггагмӕйы паддзахиуӕджы бар, уымӕн ӕмӕ Дунедарӕджы хӕстыты архайы ме ’лдар, ӕмӕ дӕм дӕ цӕргӕ-цӕрӕнбонты дӕр хӕрамдзинад нӕ разындзӕн.

²⁹Исчи дӕ фӕдыл куы зила ӕмӕ дӕ марынмӕ куы хъава, уӕд дӕр Дунедарӕг, дӕ Хуыцау, зынаргъ дурау бахъахъхъӕндзӕн ме ’лдары уд, де знӕгты удтӕ та дын дурӕхсӕнӕй ӕхсӕгау фехсдзӕн.

³⁰Ӕмӕ Дунедарӕг дӕу тыххӕй хорзӕй цыдӕриддӕр загъта, ме ’лдар, уыдон куы сӕххӕст кӕна ӕмӕ дӕ Израилы фӕтӕг куы скӕна,

³¹уӕд нӕ хӕрдзынӕ дӕхи, дӕ цӕсгом не ссудздзӕн, уымӕн ӕмӕ, ме ’лдар, ӕнӕхъуаджы туг нӕ ныккалдтай, дӕ маст дӕхи къухӕй нӕ райстай. Ӕмӕ Дунедарӕг ме ’лдарӕн хӕрзтӕ куы фӕуа, уӕд-иу ӕрымыс дӕ цагъары».

³²Давид Авигеайӕн загъта: «Арфӕгонд уӕд Дунедарӕг, Израилы Хуыцау, ӕгайтма дӕ абон мӕ размӕ рарвыста.

³³Арфӕгонд уӕд дӕ зонд, арфӕгонд у дӕхӕдӕг дӕр, уымӕн ӕмӕ мӕ абон баурӕдтай туг ныккалынӕй ӕмӕ мӕ маст мӕхи къухӕй райсынӕй.

³⁴Сомы кӕнын Дунедарӕгӕй, Израилы Хуыцауӕй, дӕуӕн мӕ фыдбылыз ракӕнынӕй Чи бахызта, Уымӕй: ды ӕвӕстиатӕй мӕ размӕ куынӕ рацыдаис, уӕд райсоммӕ Навалы адӕмӕй иу лӕг дӕр удӕгасӕй нал ныууагътаин».

³⁵Давид райста Авигеайы хӕссинӕгтӕ ӕмӕ йын загъта: «Фарнимӕ цу дӕ хӕдзармӕ. Ӕз дӕм байхъуыстон, сӕххӕст дын кодтон дӕ курдиат».

³⁶Уӕд Авигеа сыздӕхти Навалмӕ. Уымӕн уыцы рӕстӕг йӕ хӕдзары уыди куывд, растдӕриддӕр паддзахы куывды хуызӕн. Навал дзӕбӕх бахъӕлдзӕг, барасыг, ӕмӕ йын Авигеа боны срухсмӕ ницы ской кодта.

³⁷Райсомӕй, Навал куы ӕрӕрвонг, уӕд ын йӕ ус хабар радзырдта, ӕмӕ лӕг мардау фӕци, цавддурау лӕууыд.

³⁸Иу дӕс боны фӕстӕ йӕ Дунедарӕг ӕрцавта, ӕмӕ амард.

³⁹Давид фехъуыста, Навал кӕй амард, уый, ӕмӕ загъта: «Арфӕгонд уӕд Дунедарӕг! Навал мӕ бафхӕрдта, фӕлӕ Дунедарӕг рахӕцыд мӕ фарс ӕмӕ йын йӕ фыдӕх йӕхи сӕрыл ӕруагъта. Йӕ цагъары та фыдми ракӕнынӕй бахызта». Уый фӕстӕ Давид хатджытӕ арвыста Авигеамӕ, цӕмӕй йын зӕгъой, кургӕ дӕ кӕны ӕмӕ йӕм ӕрцу, зӕгъгӕ.

⁴⁰Давиды дӕлдӕртӕ ссыдысты Кармелы сахармӕ, Авигеамӕ, ӕмӕ йын загътой: «Давид нӕ дӕумӕ рарвыста, кургӕ дӕ кӕны».

⁴¹Уый сыстад, зӕххыл ныддӕлгом ӕмӕ дзуапп радта: «Ӕз дӕ цагъар дӕн ӕмӕ цӕттӕ дӕн ме ’лдары фӕсдзӕуинтӕн сӕ къӕхтӕ ӕхсынмӕ».

⁴²Авигеа тагъд-тагъд арӕвдз кодта йӕхи. Йӕ фондз унӕуты йемӕ, афтӕмӕй хӕрӕгыл Давиды минӕвӕртты фӕдыл араст, ӕмӕ сси Давиды ус.

⁴³Уый размӕ ма Давид ракуырдта изреелаг Ахиноамы дӕр, ӕмӕ йын ныр уыди дыууӕ усы.

⁴⁴Уӕдмӕ Саул та йӕ чызг Мелхолӕйы, Давиды усы, радта галлимаг Палтийӕн, Лаишы фыртӕн.