Read Библи: Сыгъдӕг 1 Паддзахӕдтӕ 7 Bible Online

1 Паддзахӕдтӕ 7 - Библи: Сыгъдӕг bible

1 Паддзахӕдтӕ 7

¹Кирйат-Иаримы цӕрджытӕ ӕрбацыдысты ӕмӕ Дунедарӕджы Фидыды Чырын сӕхимӕ ахастой. Уым ӕй къуылдымыл цӕрӕг Авинадавы хӕдзармӕ схастой, ӕмӕ йын Авинадавы фырт Елеазары хъахъхъӕнӕг сӕвӕрдтой.

²Фидыды Чырын Кирйат-Иаримы куы баззади, уӕдӕй рацыди ссӕдз азы. Израилы адӕм иууылдӕр, кӕугӕйӕ, Дунедарӕгмӕ се ’ргом аздӕхтой.

³Самуел сын загъта: «Кӕд зӕрдиагӕй раздӕхтыстут Дунедарӕгмӕ, уӕд ӕцӕгӕлон хуыцӕутты ӕмӕ Астартӕты уӕхицӕй аиуварс кӕнут, уӕ зӕрдӕ Дунедарӕгӕн раттут ӕмӕ иунӕг Уымӕн лӕггад кӕнут, ӕмӕ уӕ Уый филистимӕгтӕй фервӕзын кӕндзӕн».

⁴Израилӕгтӕ Баалтӕ ӕмӕ Астартӕты раппӕрстой ӕмӕ ӕрмӕстдӕр Дунедарӕгӕн лӕггад кӕнын райдыдтой.

⁵Самуел загъта: «Ӕппӕт израилӕгтӕ дӕр Мицпамӕ ӕрӕмбырд уӕнт, ӕмӕ уын ӕз Дунедарӕгмӕ скувдзынӕн».

⁶Израилӕгтӕ ӕрӕмбырд сты Мицпамӕ, ӕвгӕдтой дон ӕмӕ йӕ Дунедарӕджы раз калдтой. Уыцы бон уым ком фӕдардтой ӕмӕ фӕсмонӕй сӕхи хордтой: «Дунедарӕджы раз фӕтӕригъӕдджын стӕм». Самуел Мицпайы сси израилӕгты фӕтӕг.

⁷Мицпайы ӕрӕмбырд сты, уый филистимӕгтӕ куы базыдтой, уӕд се ’лдӕрттӕ ӕд ӕфсад абырстой израилӕгты ныхмӕ. Уый фехъусгӕйӕ, израилӕгтӕ фӕтарстысты филистимӕгтӕй

⁸ӕмӕ загътой Самуелӕн: «Дунедарӕгмӕ нын, нӕ Хуыцаумӕ, ӕнӕрӕнцойӕ кув, ӕмӕ нӕ филистимӕгтӕй фервӕзын кӕна».

⁹Самуел райста, нырма фӕдӕгӕй иртӕст чи нӕма уыд, ахӕм уӕрыкк ӕмӕ йӕ Дунедарӕгӕн иууылсудзинаг нывондӕн ӕрхаста. Израилы тыххӕй Дунедарӕгмӕ скуывта, ӕмӕ йын Дунедарӕг йӕ куывд айста.

¹⁰Самуел иууылсудзинаг нывонд куы хаста, уӕд филистимӕгтӕ ӕрбацӕйбырстой Израилмӕ. Уыцы бон Дунедарӕг филистимӕгты тыхджын ӕрвнӕрдӕй удаист фӕкодта, ӕмӕ дӕрӕнгонд ӕрцыдысты израилӕгты къухӕй.

¹¹Израилӕгтӕ рацыдысты Мицпайӕ ӕмӕ филистимӕгты суанг Бет-Кары онг сӕ разӕй цӕгъдгӕ айстой.

¹²Самуел Мицпа ӕмӕ Шены ӕхсӕн ныссагъта дур ӕмӕ йӕ схуыдта Евен-Езер[5]. Загъта: «Ацы бынаты онг нын Дунедарӕг ӕххуыс кодта».

¹³Афтӕ саст ӕрцыдысты филистимӕгтӕ ӕмӕ Израилы арӕнтӕм нал бырстой. Дунедарӕг сӕ суанг Самуелы амӕлӕты онг уӕлӕмӕ скӕсын нал суагъта.

¹⁴Филистимӕгтӕ сӕ Екронӕй Гаты ’хсӕн цыдӕриддӕр сахартӕ байстой, уыдон фӕстӕмӕ израилӕгты баисты. Израил филистимӕгтӕй ссӕрибар кодта уыцы сахартӕн сӕ алфамбылай зӕххытӕ дӕр. Уӕд Израил ӕмӕ аморӕгтӕ дӕр кӕрӕдзийы хъыгдардтой.

¹⁵Самуел йӕ цард-цӕрӕнбонты Израилӕн уыди сӕ фӕтӕг.

¹⁶Алы аз дӕр-иу ӕрзылди Вефил, Гилгал ӕмӕ Мицпайыл ӕмӕ ӕппӕт уыцы рӕтты тӕрхон кодта Израилӕн.

¹⁷Уый фӕстӕ-иу ӕрыздӕхти Рамамӕ, уымӕн ӕмӕ йӕ хӕдзар уым уыд. Уым дӕр тӕрхон кодта Израилӕн. Дунедарӕгӕн дзы сарӕзта нывондхӕссӕн.