Read Библи: Сыгъдӕг 1 Паддзахӕдтӕ 8 Bible Online

1 Паддзахӕдтӕ 8 - Библи: Сыгъдӕг bible

1 Паддзахӕдтӕ 8

¹Самуел куы базӕронд, уӕд Израилӕн фӕтӕгтӕй сӕвӕрдта йӕ фыртты.

²Йӕ хистӕр фырты ном уыди Иоел, кӕстӕры ном — Авийа. Тӕрхон кодтой Беер-Шевӕйы.

³Фӕлӕ уыдон сӕ фыды фӕндагыл нӕ цыдысты: мулкӕй нӕ зыдтой ӕфсис, истой гӕртам, кодтой галиу тӕрхон.

⁴Уӕд Израилы хистӕртӕ иууылдӕр ӕрӕмбырд сты ӕмӕ Рамайы сахармӕ ӕрцыдысты Самуелмӕ.

⁵Загътой йын: «Ды базӕронд дӕ, дӕ фырттӕ та дӕ фӕндагыл лӕуд не сты. Гъемӕ, иннӕ адӕмтӕм куыд у, афтӕ махӕн дӕр нӕ сӕргъы паддзах сӕвӕр, ӕмӕ нын хицауиуӕг кӕна».

⁶Паддзах нын сӕвӕр ӕмӕ нын хицауиуӕг кӕна, зӕгъгӕ, кӕй загътой, уый Самуелы зӕрдӕмӕ нӕ фӕцыд, ӕмӕ Дунедарӕгмӕ скуывта.

⁷Дунедарӕг загъта Самуелӕн: «Ратт адӕмӕн, цыдӕриддӕр дӕ курынц, уый: уыдон дӕуыл нӕ, фӕлӕ Мӕныл атигъ кодтой сӕхи, цӕмӕй сын Ӕз мауал кӕнон паддзахиуӕг.

⁸Мысырӕй сӕ куы рахуыдтон, уыцы бонӕй нырмӕ Мӕнӕн алкӕддӕр куыд кодтой — ныууагътой-иу Мӕ ӕмӕ лӕггад кодтой ӕндӕр хуыцӕуттӕн, — ныр дӕуӕн дӕр афтӕ кӕнынц.

⁹Гъемӕ сӕм байхъус. Ӕрмӕст сын бӕлвырд радзур, фидӕны паддзах сын хицауиуӕг куыд кӕндзӕни, уый».

¹⁰Паддзахы сӕвӕрын дзы чи домдта, уыцы Самуел рафӕзмыдта Дунедарӕджы ӕппӕт ныхӕстӕ дӕр

¹¹ӕмӕ загъта: «Уӕ сӕргъы цы паддзах лӕууа, уый уын хицауиуӕг кӕндзӕни мӕнӕ афтӕ: уӕ фыртты уын байсдзӕн ӕмӕ дзы иуты бафтаудзӕн йӕ тохуӕрдӕттыл, иннӕты — йӕ бӕхӕфсадыл, аннӕтӕ та уыдзысты паддзахы барджытӕ ӕмӕ йӕ уӕрдоны разӕй уайдзысты.

¹²Иуты йе ’фсады минонтӕ ӕмӕ фӕндзайонты хицӕуттӕй сӕвӕрдзӕн, иннӕтӕ йын кӕндзысты хуым ӕмӕ йын ӕфснайдзысты йӕ тыллӕг, аннӕтӕ та йын араздзысты хотыхтӕ ӕмӕ ифтонг кӕндзысты тохуӕрдӕттӕ.

¹³Уӕ чызджыты дӕр уын байсдзӕн, цӕмӕй аразой хӕрздӕфгӕнӕнтӕ, кӕной хӕринаг, кӕной кӕрдзын.

¹⁴Байсдзӕн уын уӕ быдыртӕ, уӕ сӕндӕттӕ ӕмӕ уӕ оливӕйы дыргъдӕтты хуыздӕртӕ ӕмӕ сӕ йӕ фӕсдзӕуинтӕн ратдзӕн.

¹⁵Уӕ быдыртӕ ӕмӕ уын уӕ сӕндӕтты тыллӕгӕн райсдзӕн йӕ дӕсӕймаг хай ӕмӕ йӕ ратдзӕн йӕ барджынтӕ ӕмӕ йӕ фӕсдзӕуинтӕн.

¹⁶Байсдзӕн уын уӕ цагъарты — нӕлгоймагӕй, сылгоймагӕй, йӕхи бакӕндзӕн уе стуртӕ ӕмӕ уӕ хӕрджыты хуыздӕрты ӕмӕ сӕ йӕхицӕн кусын кӕндзӕн.

¹⁷Уӕ лыстӕг фосӕн дӕр райсдзӕн йӕ дӕсӕймаг хай. Уе ’ппӕт дӕр ын уыдзыстут цагъартӕ.

¹⁸Уӕд ныккӕрздзыстут ӕмӕ хъаст кӕндзыстут, уӕхицӕн цы паддзах равзӕрстат, уымӕй, фӕлӕ уӕм Дунедарӕг нал ӕрыхъусдзӕн».

¹⁹Адӕм ницӕмӕ ӕрдардтой Самуелы ныхӕстӕ. Загътой: «Нӕ, уадз ӕмӕ паддзах уа нӕ сӕргъы!

²⁰Уӕд мах дӕр уыдзыстӕм ӕппӕт адӕмты хуызӕн: нӕ паддзах кӕндзӕни хицауиуӕг дӕр ӕмӕ уыимӕ уыдзӕни нӕ хӕстон фӕтӕг дӕр».

²¹Самуел фӕхъуыста адӕмы ныхӕстӕм ӕмӕ сӕ Дунедарӕгӕн рафӕзмыдта.

²²Дунедарӕг Самуелӕн загъта: «Сразы у семӕ, сӕвӕр сын паддзах». Ӕмӕ загъта Самуел израилӕгтӕн: «Алчидӕр уӕ йӕ сахармӕ ацӕуӕд».