Read Ot Danum MATEUS 10 Bible Online

MATEUS 10 - Ot Danum bible

MATEUS 10

¹Ang ihco ondou Yesus na'ah duo balas murid-Oh hopuhpung. Turus Io nonga ahkan'ndo kowasa ahkan muhko roh-roh ja'at tutang ngopios mahca-mahcam ponyahkit, tutang mahca-mahcam cahcat behti.

²Aran koduo balas rasul rih, iorih: Pahtukoh Simon (ijo konohawot ka'a Petrus) tutang konduangoh Andreas, turus Yakobus tutang konduangoh Yohanes, iro rih anak-anak Sebedeus.

³Pongohuli Pilipus tutang Bartolomeus, honong Tomas tutang Mateus, ponagih pajak, hawui Yakobus anak Alpeus, tutang Tadeus;

⁴turus ko'ohpahoh Simon Patriot, tutang Yudas Iskariot ijo ngarana umba Yesus.

⁵Koduo balas rasul orih pongohuli sonuhu bain Yesus tutang norima potunjuk-potunjuk tuh, “Ara tulak nokuh daerah ulun-ulun bohkon Yahudi. Ara ka'a nokuh lowun-lowun ulun Samaria.

⁶Tahpi tulak nokuh ulun-ulun Israel, khususoh ahkan iro ijo lahcat.

⁷ Nyiarkabar ahkan'ndo, ijo Pohotala ahkan jeleng moretah kolou Lahca.

⁸Ngopios ulun-ulun ijo poros, ngombolum ulun-ulun ijo mahtoi; ngopios ulun-ulun ijo boponyahkit belang 'jo ngoli, tutang muhko roh-roh ja'at. Ihkam jari norima paringoh tuh honong eam tomoli. Jadi nonga ka'a hawui eam bojual.

⁹Ara ngomin duit bulou, duit perak, ata'ai ka duit tombaga.

¹⁰ Ara ka'a ngomin kambut-derma, ata'ai duo lambar hahtin'kam ang ponomuoi'kam, ata'ai sorupah, ata'ai ka suhkah. Tului ulun ijo bogawi, puna harusoh tonyodia karon koporluanoh.

¹¹Amat ihkam johcok ang lowu, ata'ai desa, ngurah ulun ijo kani norima ihkam. Mohcon umba io nyiring ihkam tulak hino.

¹²Ohkot ihkam nyolong lohpou, kohawot auh tuh, ‘Keleh Tuhan momborehkat ihkam.’

¹³Amat ulun-ulun ang lohpou rih norima ihkam, nauhoh taben'kam orih mohcon ang iro. Tahpi amat iro eam norima ihkam, nguhutoh huli tabe'kam rih.

¹⁴ Amat anai lohpou, ata'ai lowu ijo eam kani norima ihkam, ata'ai eam kani ngonih auh ihkam, nohtah unuk orih tutang nohkah awun tana tahkan bolak-pa'an'kam.

¹⁵ Ingatrih! Ang Ondou Kiamat, ulun-ulun ang lowu Sodom tutang Gomora ahkan labih jeleng tongahpun bain Pohotala tahkan ulun-ulun ang lowu orih!”

¹⁶ “Nohtoanirih auh'ku tuh: Ahku nyuhu ihkam kolou tobiri, ijo eam aro borodaya, nokuh tohun-tohun horomaung bosiak. Ihkam harus borondong kolou lohi, tutang morong ahtoi kolou bulung dala.

¹⁷ Jaga-jaga, tului ihkam ahkan tonawan, tutang ahkan tonohimooh ang lohpou-bosara. Ihkam ahkan tonosiksa ang lohpou-lohpou sombayang.

¹⁸Ihkam ahkan tongomin nohkuh toharep pongowasa-pongowasa tutang lahca-lahca tului ihkam murid-Ku. Tutang orihrih kosapet ahkan'kam, nonga kosaksian tohou Ahku ahkan'ndo, tutang ahkan ulun-ulun ijo eam kosono Pohotala.

¹⁹Tahpi amat ihkam konomin ahkan ponosara, a'ai mihkoh tohou inon ijo ihkam harus ngohawotoh, ata'ai koloukuwoh ihkam harus bopander. Kotului inon ijo ihkam harus ngohawot orih, ahkan tonyorihta ahkan'kam ang ohkotoh.

²⁰Tului inon ijo ahkan ponander'kam ang ohkot rih, bohkon ihkam, molekan Roh Amai ijo ang soruga, nguha ihkam.

²¹ Ahkan nyolung ijo ulun ahkan nyorah konduang-kuhungoh bongoi ahkan tomunu. Tutang rih ka ijo ahkan nyolung holat amai umba anakoh. Anak-anak ahkan ngolawan inai-amaioh, tutang nyarah iro ahkan tomunu.

²² Ihkam ahkan tongohiri bain paring ulun, tului ihkam murid-Ku. Tahpi ulun ijo tehen nyiring laiuoh ahkan tonyolamat.

²³Amat ihkam tonoporos ang ihco lowu, tulak nokuh lowu ijo pongo. Ahku mborihta ahkan'kam: Sounumba ihkam ngopah masap paring lowu-lowu Israel, Anak Ulun jari lombut.

²⁴ Murid eam labih hajo tahkan guruoh, tutang pohalu eam labih hajo tahkan tepuioh.

²⁵ Jari suhkup, amat ihcobehti murid sama kolou guruoh, tutang ihcobehti pohalu sama kolou tepuioh. Amat kopala ihcojolahan jadi konohawot Baalsebul, inon hino ihco koluwang lohpouoh. Iro ahkan konohawot arai ijo labih ja'at hino!”

²⁶ “Ararih mihkoh umba kolunon. Eam aro ijo bosuhuk, ijo eam ahkan gihtan, tutang eam anai ijo tongulimoh ijo eam ahkan bokuap.

²⁷Inon ijo Ahku nuhtuioh ahkan'kam, a'ang pindong, harusrih ihkam nokodulioh ang luwang koloang tohun ondou. Tutang inon ijo tongosinokoh ang tolingan'kam, nyiarohrih nokuh umo-umoh-iou!

²⁸Ara mihkoh umba iro ijo duon munu behti, tahpi eam kowasa munu mboruan. Tahpi mihkoh umba Pohotala ijo kowasa morusak, pios behti kanika mboruan ang luwang norahka.

²⁹Duo kungan bulung opit dahpot tomoli umba ihco kobilap duit ijo paling koik. Oluka kodorih eam aro ihcokungan ijo tou nokah nokuh tana amat eam kohondak Amai'kam.

³⁰Balou-balou ang kuhung'kam, ka jadi tongiso paringoh.

³¹Tului orih ara mihkoh! Ihkam labih borega umba bulung-bulung opit rih!”

³²“Ia-iai ijo mongahku Ahku ang toharep ulun aro, ijo io murid-Ku, Ahku ka ahkan mongahku io ang toharep Amai-Ku ang soruga.

³³ Tahpi ia-iai ijo eam ngahku Ahku ang toharep ulun aro ijo io orih murid-Ku, Ahku ka'a ahkan eam ngahku io ang toharep Amai-Ku 'jo ang soruga.”

³⁴“Ara ngohu Ahku ngomin kobuah nokuh kolunon tuh. Ahku eam ngomin kobuah, tahpi kolawan.

³⁵ Ahku lombut, kotuluioh anak bahkas ngolawan amaioh, anak bawi ngolawan inaioh, tutang monatuioh ijo bawi ngolawan opuoh ijo bawi.

³⁶Io ijo ahkan monjadi musuh ijo hajo, anairih ukup jolahan ihto bongon.

³⁷Ulun ijo ngasih amaioh ata'ai inaioh, labih tahkanumba Ahku, io eam pahtut monjadi murid-Ku. Kodorih ka'a, ulun ijo ngasih anakoh ihco bahkas ata'ai ihco bawi, labih tahkanumba Ahku.

³⁸ Tutang ulun ijo eam kani ngohtun sopolahkioh tutang ngahasu Ahku, io eam pahtut monjadi murid-Ku.

³⁹ Ulun ijo podehen pombolumoh, ahkan nihou pombolumoh tahpi ulun ijo nihou pombolumoh, kotului tehen umba Ahku ahkan dahpot pombolumoh.”

⁴⁰ “Ulun ijo norima ihkam, norima Ahku ka'a. Tutang ulun ijo norima Ahku, norima Io ijo nyuhu Ahku.

⁴¹Ulun ijo norima nabi tului io nabi, ahkan norima upah ihcobehti nabi. Tutang iai ijo norima ihcobehti ijo morong, tului io morong, ahkan norima upah ihcobehti ijo morong.

⁴²Ia-iai ijo nonga korih, olu tihkas danum sorongin borangai ahkan anai ihcobehti tahkan ulun-ulun jo hinasusah, kotului io murid-Ku, porocaya ih io musti norima upahoh!”