Read Ot Danum MATEUS 11 Bible Online

MATEUS 11 - Ot Danum bible

MATEUS 11

¹Uliorih Yesus nonga potunjuk-potunjuk ahkan koduo balas murid-Oh, Io nohtah unuk rih. Io tulak majar tutang monyiar pohtoh tahkan Pohotala ang lowu-lowu ijo doni ang anan.

²Yohanes Popondus ijo rahat hukum ang sipir ngonih tohou gawin Kristus. Turus io nyuhu pira-pira muridoh tulak nokuh Yesus ahkan ngisok,

³“Amairih ulun ijo ahkan lombut numbun bowot Pohotala, ata'ai harusrih ihkai ngindoi ulun bohkon?”

⁴Yesus mutah, “Buliih nokuh Yohanes tutang mborihta ahkai, inon ijo ihkam ngonih tutang nohto'.

⁵ Ulun bobulen tou nohto, ulun bolomu tou nyalan, ulun bobelang ijo ngoli pios; ulun borengen dahpot ngonih; ulun ijo mahtoi hoduli bolum; tutang Kabar Hinut tahkan Pohotala tonyiar ahkan ulun-ulun ijo porosbolum.

⁶Kosanangsolamat ahkan ulun ijo eam aro sokehtaoh nulak Ahku!”

⁷Uliorih soruhan-soruhan Yohanes rih tulak buli. Yesus nopara mander ahkan ulun aro tohou Yohanes, hioi-Oh, “Ihkam tulak nokuh padang bolambah ahkan nohto inon? Bahtang poring ijo tonahpi bahiu?

⁸Ihkam tulak ahkan nohto inon? Ihcobehti ijo hopokajan pioskah? Ulun-ulun ijo hopokajan kodorih mohcon ang istana!

⁹Jadi ombai ihkam tulak nokuh padang bolambah? Ahkan nohto ihcobehti nabirih? Tu'u, malah labih hajo umba ihcobehti nabi.

¹⁰ Tului Yohanes orihrih ijo titun ang ayat Surat Borasih tuh, ‘Jituh soruhan-Ku, hion Pohotala, Ahku nyuhu io labih houn, tahkan umba Ihko, mangat io nandang jalan ahkan-Mu.’

¹¹Ingatrih! Ang kolunon tuh eam aro ulun ijo labih hajo tahkan umba Yohanes Popondus. Oluka kodorih ulun ijo pongokoikoh ang louk ukup ain Pohotala, labih hajo umba Yohanes.

¹² Tahkan Yohanes monyiar borihtaoh johcok ang uhuntuh, ukup ain Pohotala tongolawan bain ulun-ulun ijo bousaha nguwasaoh hapan kokaras.

¹³Johcok polombut Yohanes, paring hukum Museh tutang ajaran nabi-nabi, monujum tohou hal-hal ijo ahkan nyolung.

¹⁴ Tutang amat ihkam kani porocaya, Yohanes orih Elia, ijo polombutoh lomoi tonujum.

¹⁵Amat anai tolinga pios io ngonih!

¹⁶Umba inon Ahku harus nindung ulun-ulun jaman tuh? Iro kolou anak-inyam ijo tuot ang pasar. 'Cokopulou, hotota'ah umba ijo bohkon,

¹⁷‘Ihkai newah lagu kojorih ahkan'kam, tahpi ihkam eam kani nasai! Ihkai monyanyi lagu koporosahtoi, tutang ihkam eam kani nangih!’

¹⁸Yohanes lombut — io puasa tutang eam ngorih anggur; tutang ulun-ulun ngohawot io, ‘Io sonalung sehtan!’

¹⁹Huntuh Anak Ulun lombut — Io kuman tutang ngorih; turus ulun-ulun ngohawot io, ‘Nohto ulun tuh! Bokora, pombosou, hojolahan umba ponagih pajak, tutang hojolahan umba ulun bodusa.’ Oluka kodorih, kopihtar Pohotala gihtan tahkan bua gawiouoh.”

²⁰Turus Yesus nopara nosalan lowu-lowu ang umoh Io paling aro nguan tandahelan. Bain ulun-ulun ang lowu-lowu orih eam kani hubah tahkan dusa-dusan'ndo.

²¹ “Colahka ihko Korazim! Tutang colahka ka'a ihko Betsaida! Jahkaoh karon-tandahelan ijo konuan aang tohun'kam, tonguan ka'a ang Tirus tutang Sidon, musti ulun-ulun ang anan jadi tahi hubah tahkan dusa-dusan'ndo, tutang hapan pokahjan koporosahtoi hawui ngina korawu ang ngosan kuhung'ndo.

²²Ingatrih, ang Ondou Kiamat, ulun-ulun Tirus tutang Sidon ahkan labih jeleng konapun Pohotala, tahkan ihkam!

²³ Tutang ihko Kapernaum! Kuwoh ihko ahkan tongahtang johcok nokuh soruga? Eam! Malah ihko ahkan dian nokuh norahka! Tului jahkaoh karon-tandahelan ijo konuan ang tohun-tohun'kam rih, jari konuan ang Sodom, Sodom rih magun anai nyiring uhuntuh!

²⁴ Ingatrih! Ang Ondou Kiamat ulun Sodom ahkan labih jion tonapun Pohotala tahkan umba ihkam!”

²⁵Ang ohkot rih Yesus bodo'a, “Amai, Tuhan ijo ngowasa langit tutang tana! Ahku ngohawot torimakasih umba Ihko, tului paringoh orih ihko ngulimoh tahkan ulun-ulun, ijo pitar tutang bosokula, tahpi ihko ngorinahoh ahkan ulun-ulun ijo eam sokula.

²⁶Orihlah ijo ngojorih ahtoi Amai.”

²⁷ Turus Yesus nuhtui, “Ko-paring ang'co, jadi tononyorah Amai ahkak-Ku. Eam aro ihcobehti ka kosono Anak, bohkon umba Amai. Eam aro ka'a ijo ngosono Amai bohkon umba Anak, tutang ulun-ulun ahkan iai Anak rih mongosono Amai.

²⁸Lombut nokuh Ahku ihkam paring ijo bo'o, tutang nanyam bahatoh puat, Ahku ahkan nonga komangat ahkan'kam.

²⁹ Numbun poretah-Ku tutang bajar tahkan Ahku, tului Ahku tuh bolomu lembai tutang randah ahtoi, mahka ihkam ahkan nginyam komangat.

³⁰Tului poretah-poretah-Ku monyanang ahkan'kam tutang puat ijo Ahku muatoh ngosan ihkam, mohian.”