Read Ot Danum MATEUS 12 Bible Online

MATEUS 12 - Ot Danum bible

MATEUS 12

¹ Ang ihco ondou Sabat, kotihka Yesus nguha umo gandum, murid-murid-Oh nopara ngohtom gandum, turus nguai, kumai, tului iro bolo'u.

²Kotihka ulun-ulun Parisi nohto orih, iro nuhtui umba Yesus, “Topahjah! Murid-murid-Mu molanggar hukum agaman ihto hawui nguan ijo ngohana ang ondou Sabat.”

³ Yesus mutah, “Jaha pu'u ihko mombasa Surat Borasih tohou inon ijo gawin Dawid uhun io tutang karo-jolahai bolo'u?

⁴ Io nyolong ahkan Lohpou Pohotala; turus kuman luhte ijo jari tonyorah ahkan Pohotala. Padahar numbun Torat agaman eto, io, oluka karo-jolahaioh eam to'u kuman luhte rih — baya imam-imam ih ijo tou.

⁵ Ata'ai jaha pu'u ihkam ngombasa ang luwang Torat Museh ijo nyinong ondou Sabat imam-imam ijo bogawi ang Lohpou Tuhan, molanggar poroturan ondou Sabat, tahpi eam tonosalan?

⁶Nohtoani inon ijo Ahku jari nuhtuioh tuh: ang ohtoi anai ijo labih hajo umba Lohpou Tuhan.

⁷ Ang luwang Surat Borasih sonurat: Pongasih ijo Ahku hondakoh; eam porahpah usin-ohcin. Amat jahkaoh ihkam tu'u-tu'u solembang auh tuh, musti ihkam eam ahkan nosalan ulun ijo eam bosala.

⁸Tului Anak Ulun kowasa umba ondou Sabat.”

⁹Yesus nohtah unuk orih, turus tulak nokuh ihco lohpou sombayang.

¹⁰Ang anan, anai ulun ijo longoioh mahtoi silai. Pira-pira ulun ijo kani ngurah kosalan Yesus, ngisok umba Io, “Kuwoh tou ngopios ulun ang ondou Sabat?”

¹¹ Yesus muhtah, “Jakaoh tohko ihcobehti tahkan louk ihkam tepun ihco kungan tobiri, tutang ang ondou Sabat tobiri orih botahak ang lowong ijo timbon; kuwoh tepun tobiri rih eam ahkan ngurah jalan polua tobiri orih, tahkan lowong rih?

¹²Nah, kolunon labih borega tahkan tobiri! Jadi amat kodorih, tou mondohop ulun ijo poros a'ang ondou Sabat.”

¹³Pongohuli Yesus nuhtui umba ulun ijo longoioh mahtoi silai orih rih, “Nyuhcuoh longon'mu.” Ulun rih nyuhcu longoioh, tutang longoi rih pios kolou longoi ijo silaioh.

¹⁴Tahpi ulun-ulun Parisi nohtah lohpou sombayang orih, turus mohaum ahkan munu Yesus.

¹⁵Yesus ngotaan ijo ulun-ulun Parisi rih, niat ja'at tohimo arop-Oh. Jadi Io tulak tahkan unuk orih tutang aro ulun ngahasu Io. Turus Io ngopios paring ulun, ijo boponyahkit rih.

¹⁶Tahpi Io baca iro mborihta tohou Io ahkan ulun bohkon.

¹⁷Honong kodorih nyolung ijo tonuhtui Pohotala nguha Nabi Yesaya,

¹⁸ “Tuhrih soruhak-Ku ijo Ahku ngopilioh, ulun ijo Ahku ngasih-Oh, tutang ijo kojorih ang ahtoi-Ku. Roh-Ku, ahkan Ahku nonga ahkai-Oh, komorong-Ku ahkan tonosiar baiu-Oh ahkan uhtus-uhtus ulun.

¹⁹Io eam ahkan hojawab ata'ai ngoriak, ata'ai monarang ang jalan-jalan hajo.

²⁰Poring ijo niwoi, eam ahkan tomolot-Oh sumbu ijo tiu-tiui, eam ahkan tongombolop-Oh. Io ahkan ngolawan, nyiring ko-morong nyolung;

²¹uhtus-uhtus ulun ahkan ngina koharapoh umba Io.”

²²Pongohuli anai omin nokuh Yesus ihcobehti ulun bobulen tutang bisu tului sonorupang bain roh ja'at. Yesus ngopios ulun orih, nyiring io dahpot hopander tutang nohto.

²³Paring ulun helan tutang nuhtui, “Puna morong tu'u Io tuh Anak Dawid ijo tonobowot orih?”

²⁴ Kotihka ulun-ulun Parisi ngonih orih, iro mutah, “Ulun tuh tihkas tou muhko roh ja'at, tului Baalsebul, okon roh-roh ja'at, jari nonga kowasa rih ahkai-Oh.”

²⁵Yesus ngotaan tiruk ulun-ulun Parisi rih. Jadi Io nuhtui umba iro, “Amat ihco nogara hopisah a'ang hobarih-hobarih ijo saling homusuh, nogara orih eam ahkan tehen. Tutang ihco lowu ata'ai jolahan-ulun, ijo hopisah-pisah tutang hokohiri sama aropoh ahkan bokahkas.

²⁶Kodorih ka'a, ang luwang kolahca'an Sehtan rih, amat ihco kopulou muhko pulou ijo bohkon, mahka kolahcan Sehtan rih ijo jari pisah pinja, tutang ahkan bokahkas.

²⁷Ihkam nuhtui ijo Ahku muhko roh ja'at tului kowasa Baalsebul. Amat kodorih umba kowasa iai murid-murid'kam rih muhko roh ja'at. Murid-murid'kam bongoi ijo ngorinah ijo ihkam sala!

²⁸Tahpi Ahku muhko roh ja'at umba kowasa Roh Pohotala. Tutang tului orih, rimai ijo Pohotala jari nopara moretah ang louk ihkam.

²⁹Koloukuwoh ulun dahpot nyolong, nokuh lohpou ulun ijo ba'as, ahkan nyilou ponahtouoh, amat io eam houn manga ulun ba'as rih? Uliorih, punai io duon nyilou ponahtouoh.

³⁰ Ulun ijo eam barih aik-Ku, kotu'ui io ngolawan Ahku. Tutang ulun ijo eam umba Ahku kotu'ui io morusak gawik-Ku!

³¹Bain tului orih, ngota'an ih, amatanai ulun nguan dusa tutang ngohawot auh ijo mohina, io dahpot tonapun! Tahpi amat io, mohina Roh Pohotala io eam duon tonapun!

³² Amatanai ulun ngohawot aangco ngolawan Anak Ulun, io duon tonapunoh, tahpi amat io mohina Roh Pohotala, io eam duon tonapun, pios huntuh, oluka ang ahirat!”

³³ “Ahkan dahpot bua ijo pios, bahtangoh pahtut bosiwuh. Amat bahtangoh eam bosiwuh, buaoh eam pios ka'a. Bosiwuh eamoh ihco bahtang kahju, tongota'an tahkan buaoh.

³⁴ Ihkam ulun ja'at, koloukuwoh ahkantou ihkam dahpot ngohawot hal-hal ijo pios amat ihkam ja'at? Inon ijo konohawot tahkan baun'kam, 'orih ijo nyalut tahkan ahtoi!

³⁵Ulun ijo pios ngohawot hal-hal ijo hinut, tului io tuwi umba kohinut. Sobalikoh, ulun ijo ja'at ngohawot hal-hal ijo ja'at, tului io tuwi umba koja'at.

³⁶Jadi, ingatrih: ang Ondou Kiamat nyinong ulun harus nanggung-jawab, ngosan nyinong auhoh ijo konohawot, ijo eam boguna.

³⁷Tului auh-auh'kam bongom ijo ahkan tohapan unuk momuhtus, ijo ihko bosala ata'ai eam.”

³⁸ Uliorih pira-pira guru agama tutang ulun-ulun Parisi nuhtui, “Amai Guru, ihkai jorik nohto Amai nguan tandahelan.”

³⁹ “Eaminon koja'atoh tutang dorhakaoh ulun-ulun jaman tuh!” hion Yesus. “Ihkam nyawot Ahku nguan tandahelan? Ihkam eam ahkan tononga ihco tandahelan ka, kocoali tandahelan Nabi Yona.

⁴⁰ Yona mohcon tolu ondou tolu malom ang luwang buhtui ohcin hajo. Kodorih ka'a Anak Ulun ahkan mohcon tolu ondou tolu malom ang luwang buhtui tana.

⁴¹ Ang Ondou Kiamat ponduduk Niniwe ahkan bolum huli homboh ulun-ulun jaman tuh, tutang mondawa iro. Bain ulun-ulun Niniwe orih jari hubah, tahkan dusa-dusan'ndo, kotihka Yona ngonorangan ahkan'ndo. Tahpi ang ohtoi, huntuh, anai ijo labih hajo tahkan Yona!

⁴² Ang Ondou Kiamat Lahtu tahkan tana Solahtan ahkan bolum homboh ulun-ulun jaman tuh tutang mondawa iro. Tului ahkan ngonih ajar Salomo ijo pitar, lahtu rih nguan ponyalan ijo mahcu samasino tahkan topahkan kolunon. Tahpi ang ohtoi huntuh anai jo hajo tahkan Salomo!”

⁴³“Amat roh ja'at nohtah ihcobehti ulun, roh orih hokodiling nokuh karo-unuk ijo tojahkoring, ahkan ngurah unuk nondokobo'ooh, tahpi io eam nyombangoh.

⁴⁴Bain tului orih io nuhtui, ‘Ahku ahkan huli nokuh lohpou ijo ius ahku nohtahoh.’ Kotihka io johcok ang anan, lohpou orih buhang, borasih, tutang toahtur.

⁴⁵Turus io tulak ngomin pihtu roh bohkon ijo labih ja'at tahkan io. Pongohuli iro nyolong koluwang ulun orih, turus mohcon ang anan. Tutang kojoriaioh ulun rih monjadi lobien koja'atoh umba asaroh. Ijorih ka'a ijo ahkan nyolung umba ulun-ulun ja'at jaman tuh.”

⁴⁶Beteng Yesus magun bopander umba ulun aro rih, lombut inai tutang konduang-konduang Yesus. Iro tombok ang konaha sambir ngurah jalan ahkan dahpot bopander umba Io.

⁴⁷Ihcobehti tahkan ulun aro rih nuhtui umba Yesus, “Amai, inai tutang konduang-konduang Amai anai ang kanaha. Iro jolik hopander umba Amai.”

⁴⁸Turus Yesus mutah, “Iai inai-Ku? Iai konduang-konduang-Ku?”

⁴⁹Turus Io nunjuk umba murid-murid-Oh tutang nuhtui, “Tuhrih inai-Ku tutang konduang-konduang-Ku.

⁵⁰Ulun ijo nguan kohondak Amai-Ku ijo ang soruga, iorih konduang-Ku bahkas, tutang bawi, tutang inai-Ku.”