Read Ot Danum MATEUS 15 Bible Online

MATEUS 15 - Ot Danum bible

MATEUS 15

¹Ihcokobarih ulun Parisi tutang pira-pira guru agama tahkan Yerusalem lombut nokuh Yesus. Iro ngisok umba Io,

²“Ombai murid-murid-Mu molanggar hadat tahtu ajuh ihto? Uhun ahkan kuman, iro eam muhi longon'ndo labih houn numbun aturan!”

³Yesus mutah, “Tutang ombai ka'a ihkam molanggar poretah Pohotala tului kani nambit hukum hadat tahtu ajuh'kam?

⁴ Tului Pohotala nuhtui, ‘Horomatlah amai tutang inai'kam,’ tutang, ‘Ia-iai nulat ngonja'at amai inaioh, harus tonohukum mahtoi.’

⁵Tahpi ihkam majaroh, amat ulun nuhtui ahkan ulun oko'kam, ‘Inon ijo koharusoh ahku nonga akan amai tutang inai, ius ahku nyorahoh ahkan Pohotala,’

⁶mahka ulun rih eam hino kopahtutoh ahkan mohoromat ulun okooh. Jadi kotului hadat-dasar tahtu ajuh'kam, ihkam pohian auh Pohotala.

⁷Ihkam ulun pura-pura! Tohorong samasino inon ijo tonujum Yesaya tohou ihkam, yorih,

⁸ ‘Koloutuh hion Pohotala: Ulun-ulun orih tihkas nyembah Ahku honong tuhtui-tuhtui, tahpi ahtoi'ndo mahcu tahkan Ahku.

⁹Ngahus iro nyembah Ahku, tului hukum kolunon iro ngajar rih kolo-kolou orih poroturan-Ku.’ ”

¹⁰Ulipongo Yesus na'ah ulun-ulun tutang mander ahkan'ndo, “Ngonihrih mangat solembang!

¹¹Ijo nyolong nokuh nyaman'kam eam nguan ulun orih pali, baya ijo soluka tahkan nyaman'kam, orih ijo monjadi io pali.”

¹²Turus murid-murid Yesus lombut tutang pander umba Io, “Ta'anrih Amai ijo ulun-ulun Parisi rih tosinggung ohkot ngonih Amai nuhtui kodorih?”

¹³Yesus mutah, “Nyinong kombulan ijo eam konombulan bain Amai-Ku ang soruga ahkan tonyohpit.

¹⁴ Eam usah nohtoani ulun-ulun Parisi orih. Iro rih okon-okon bobulen; tutang amat ulun bobulen niting ulun bobulen koduo-duooh ahkan bolinang nokuh luwang parit.”

¹⁵Petrus nuhtui, “Dohop monarang porobasa rih ahkan 'kai, Amai!”

¹⁶Yesus mutah auh'ndo, “Inon ihkam ka'a jaham solembang?

¹⁷Eam kota'an rih ihkam ijo, ijo nyolong nokuh luwang nyama, mosuluh nokuh luwang butui, tutang uliorih bolua hino?

¹⁸ Tahpi ijo soluka tahkan nyama, asaroh tahkan ahtoi, tutang orih ijo nguan ulun monjadi pali.

¹⁹Kotului tahkan ahtoi lombut tiruk-tiruk ja'at, ijo kotuluioh ulun munu, hobandung, nguan kihal, nahkou, nonga saksi alik tutang mopitnah injahoh.

²⁰Hal-hal orihrih ijo kotuluioh ulun monjadi pali, tutang eam kuman umba longo ijo eam tomuhi.”

²¹Pongohuli Yesus nohtah unuk orih tutang tulak nokuh daerah doni lowu Tirus tutang Sidon.

²²Ihcobehti bawin Kanaan; tahkan daerah rih, lombut nokuh Yesus hawui io na'ah, “Anak Dawid ngasirih ahku! Anak bawi'ku sonorupang roh ja'at. Koada'aioh ngarot samasino.”

²³Yesus eam mutah auh ulunbawi rih. Turus murid-murid Yesus lombut nokuh Io tutang nyawot, “Amai, nyuhu ulunbawi orih tulak. Io baya ngomboho ihto iou ang lihkut 'to!”

²⁴Yesus mutah, “Ahku sonuhu tihkas ahkan uhtus Israel, ijo mombahtang ahkan iro ijo lacat.”

²⁵Ulunbawi orih lombut turus suhkuntu'ut ang toharep Yesus tutang nuhtui, “Dohop ahku Tuhan.”

²⁶Yesus mutah, “Eam hinut ngomin ukun anak-inyam tutang nyahkah rihoh ahkan asu.”

²⁷“Tu'u, Tuan,” hion ulunbawi orih, “tahpi asu ka kuman pahpat ijo bolinang tahkan meja tepui.”

²⁸Turus Yesus nuhtui umba io, “Inai, tu'u-tu'u hajo kaporocaya'an'mu! Nauhoh nyolung inon ijo ihko jolikoh!” A'ang kotihka rih ka'a anak bawi rih pios.

²⁹Yesus nohtahoh unuk rih, turus nyalan nyuru saran danou Galilea. Pongohino Io nuhkat nokuh ihco puruk, turus tuot ang anan.

³⁰Aro ulun lombut nokuh-Oh, ngomin ulun-ulun ijo tipang, ijo bobulen, ijo bolomu, ijo uong, tutang aro hino ulun poros ijo bohkon. Iro ngina ulun-ulun orih ang toharep Yesus, tutang Io ngopios ulun-ulun rih.

³¹Ulun aro ijo anai ang anan helan samasino, ohkot iro nohto ulun uong duon nuhtui, ulun tipang duon nyalan, tutang ulun bobulen duon nopahjah. Turus iro monara-nara Pohotalan uhtus Israel.

³²Pongohino Yesus na'ah murid-murid-Oh, turus nuhtui, “Ahku ngasi umba ulun aro tuh. Jari tolu ondou kotahin iro homboh Ahku, tutang huntuh iro eam aro ukun. Ahku eam kani mohonou iro buli, hawui butuioh bolo'u, noin iro tohaot ang jalan.”

³³Turus murid-murid Yesus ngisok umba-Oh, “Ang umoh ihto tou dahpot ukun ang daerah ijo mahcu tuh, ahkan ulun karon-tuh?”

³⁴“Anai pira luhte aang ihkam?” Yesus ngisok umba iro. “Pihtu,” hion'ndo, “tutang ohcin koik anai pira-pira kungan.”

³⁵Mahka Yesus rih, nyuhu ulun tuot ang ngosan tana.

³⁶Turus Yesus ngomin kopihtu luhte tutang ohcin rih, pongohuli ngohawot torimakasih ahkan Pohotala. Uliorih rih Io ngiwak-ngiwak luhte orih, tutang ohcin rih umba longoi-Oh, turus nonga orih ahkan murid-murid-Oh. Tutang iro magi-milahoh ahkan ulun aro rih.

³⁷Paring ulun rih kuman nyiring bosuh. Uliorih rih murid-murid Yesus nipun kolowin ukun rih. Paringoh anai pihtu tahkin tuwi.

³⁸Jamalah ulunbahkas iou anai ohpat kuhjan behti, jaha tongiso ulunbawi tutang anak-inyam.

³⁹Pongohuli Yesus nyuhu ulun aro rih buli. Io bongoi jahkat ihco alut tutang tulak nokuh tana Magadan.