Read Ot Danum MATEUS 17 Bible Online

MATEUS 17 - Ot Danum bible

MATEUS 17

¹ Onom ondou pongohino, Yesus ngomin Petrus tutang Yakobus tutang konduangoh Yohanes, bongon'ndo nokuh ihco pupung puruk ijo isung.

²Ang toharep'ndo, Yesus boubah tapai. Bauioh monjadi boloang kolou mahtan-ondou tutang hatiu-Oh puti mokilap.

³Pongohuli kototolu murid dih nohto Museh tutang Elia hopander umba Yesus.

⁴Turus Petrus nuhtui umba Yesus, “Tuhan, mangat tu'u ihto ang ohtoi. Amat Tuhan jolik ahku nombok tolu kemah ang ohtoi; ihco ahkan Tuhan, ihco ahkan Museh, tutang ihco ahkan Elia.”

⁵ Pondehan Petrus magun hopander baunondou ijo boloang sino ngapuh'ndo tutang tahkan baunondou rih konahan auh ijo nuhtui, “Tuhrih Anak-Ku ijo Ahku ngasih-Oh, Io nyanang ahtoi-Ku. Ngonih Io!”

⁶Ohkot murid-murid Yesus ngonih auh orih, kodorih iro mihkoh nyiring tosumbou ahkan tana.

⁷Tahpi Yesus lombut nigung'ndo, “Tombok,” hioi-Oh, “ara mihkoh!”

⁸Kotihka'ndo nopahjah, 'ndo eam nohto ia-iai ka kocoali Yesus bongoi ih.

⁹Ohkot endo nosuluh tahkan pupungpuruk rih, Yesus mopingat endo, “A'ai momborihta ahkan ia-iai ka inon ijo ihkam nohtooh nanai, sounumba Anak Ulun tongomonyun tahkan popahtoi.”

¹⁰ Murid-murid Yesus ngisok umba Io, “Ombai guru-guru agama nuhtui ijo Elia pahtut lombut labih soun?”

¹¹Yesus mutah, “Puna Elia ahkan lombut tutang io ahkan mberes kokaro aang'co.

¹² Tahpi Ahku nuhtui umba ihkam, Elia jari lombut, tahpi ulun-ulun eam kosono io; iro nguan io numbun konohuang iro ih. Tutang kodorih ka'a iro ahkan nguan Anak Ulun.”

¹³ Turus murid-murid-Oh solembang ijo Yesus nuhtui tohou Yohanes Popondus.

¹⁴Kotihka Yesus tutang kototolu murid-Oh rih buli nokuh ulun aro rih, ihcobehti ulunbahkas lombut, suhkuntu'ut ang toharep Yesus,

¹⁵tutang nuhtui, “Amai, ngasi ah anak'ku. Io poros nyo'on. Nyo'onoh nyarang io korinah kopahamoh nyiring io bojoin tu'u botahak nokuh baho, tutang bojoin ka'a tahpuk danum.

¹⁶Ahku ius ka'a ngomin io nokuh murid-murid Amai, tahpi iro eam dahpot ngopios io.”

¹⁷Yesus mutah, “Eam inon ihkam tuh! Ihkam tu'u-tu'u ulun-ulun ijo nyahpang tutang eam porocaya. Nyiring mira Ahku harus mohcon umba ihkam tutang sabar toharep ihkam? Ngomin anak orih 'kanohtoi!”

¹⁸Turus Yesus moretah roh ja'at ijo ang luwang anak rih, soluka. Tutang roh ja'at rih soluka, turus anak orih pios ang ohkot rih ka'a.

¹⁹Pongohuli murid-murid Yesus lombut nokuh-Oh cara bongoi tutang ngisok umba-Oh, “Amai, bain inon ihkai eam duon muhko roh ja'at orih?”

²⁰ Hion Yesus, “Bain ihkam kurang porocaya. Ingatrih! Amat ihkam anai kaporocaya kohajon luang sawi, ihkam duon nuhtui umba puruk tuh, ‘Hahtunrih nokuh anan!’ musti puruk tuh ahkan hahtun. Eam aro angihco ka ijo eam duon ihkam nguaioh! [

²¹Tahpi roh ja'at ijo koloutuh, tihkas duon tomuhko hapan do'a tutang puasa iou.]”

²²Kotihka murid-murid Yesus hopuhpung ang Galilea, Yesus nuhtui umba iro, “Eam tahi hino, Anak Ulun ahkan tonyorah ahkan pongowasa kolunon.

²³Io ahkan tomunu, tahpi ang ondou kotolu Io ahkan monyun.” Maka murid-murid-Oh monjadi sedih samasino.

²⁴ Ohkot Yesus tutang murid-murid-Oh johcok Kapernaum ponagih-ponagih pajak Lohpou Tuhan lombut nokuh Petrus tutang ngisok, “Guru'kam mombayar pajak Lohpou Tuhan ata'ai eam?”

²⁵Petrus mutah, “Bayar!” Kotihka Petrus buli, Yesus mander io labih soun, “Simon, koloukuwoh tiruk'mu? Iai ijo harus bayar bea ata'ai pajak ahkan lahca-lahcan kolunon tuh? Rayat ata'ai ulun bohkonuhtus?”

²⁶“Ulun bohkonuhtus,” hion Petrus. “Amat kodorih,” hion Yesus, “rayat eam porulu mbayar.

²⁷Tahpi ara rih ihto nyinggung pokomon ulun-ulun rih. Ayu, tulak nokuh danou ahkan mosi. Ngomin ohcindanum ijo pahtuk ihko nawanoh. Ang luwang baui rih ihko ahkan nyombang ihcokobilap duit ijo sukup ahkan pajak ihto duo. Omin duit rih tutang bayar ahkan'ndo pajak eto ahkan Lohpou Tuhan.”