Read Ot Danum MATEUS 18 Bible Online

MATEUS 18 - Ot Danum bible

MATEUS 18

¹ Ang ohkot rih murid-murid Yesus lombut nokuh Io tutang ngisok Io, “Iai ijo tongohu pokohajoi ang louk ukup Pohotala?”

²Yesus na'ah ihcobehti anakkoik, tutang nguan io tombok ang toharep iro.

³ Turus Yesus nuhtui, “Porocayarih! Tihkas amat ihkam hubah tutang monjadi kolou anak-anak tuh, ihkam ahkan monjadi anak ukup Pohotala.

⁴Ulun ijo porandah aropoh tutang monjadi kolou anak-inyam tuh, io rih ijo hajo ang louk ukup Pohotala.

⁵Tutang ulun ijo norima anak ijo koloutuh tului Ahku, rimai io norima Ahku ka'a.”

⁶“Iai ijo kotuluioh, anai ihco tahkan ulun-ulun ijo koik tuh, eam porocaya hino umba Ahku, labih pios amat bahtu hajo mohtong ang uhcatoh, tutang io tomolohtong ang tasik ijo timbon.

⁷Eam inon colahkaoh kolunon tuh tului hal-hal ijo kotuluioh ulun bodusa. Puna hal-hal kolouorih ahkan hototurus anai, tahpi colahkaoh ulun ijo ngotuluirihoh!

⁸ Amat longon'kam ata'ai pa'an'kam nguan ihko bodusa, nohtok tutang ndianrih. Labih pios ihkam bolum hihco Pohotala eam holongo silai, ata'ai hopa'a silai, tahkanoh ihko ndian ahkan luwang baho norahka, homboh koduo longon'mu tutang pa'an'mu.

⁹ Tutang amat mahtan'mu, kotului ihko nguan dusa, ngoruit tutang dianrih. Labih pios ihko bolum umba Pohotala eam aro ihco mahtan'mu, tahkanoh tondian nokuh luwang baho norahka, homboh koduo mahtan'mu.”

¹⁰“Awas! Ara ngonja'at ihcobehti tahkan ulun-ulun ijo koik tuh. Tului ingat rih molehkat-molehkat'ndo toturus anai ang baun Amai-Ku ang soruga. [

¹¹ Tului Anak Ulun lombut ahkan monyolamat ulun ijo lacat!]

¹²Koloukuwoh tiruk'mu? Jahkaoh anai ihcobehti ijo tepun solahtus kungan tobiri, turus ihcokungan tahkan tobiri-tobiri orih nihou, inon rih ijo ahkan konuan bain tepui rih? Musti io ahkan nohtah tobiri ijo sioi pulu sioi kungan rih ang puruk tutang hihkas ngurah ijo nihou orih.

¹³Tutang amat io sombang tobiri orih — porocaya umba Ahku — io ahkan labih jorih umba tobiri ijo ihcokungan orih, tahkan umba sioi pulu sioi kungan putaioh ijo eam nihou.

¹⁴Kodorih ka'a Amai'mu ijo ang soruga eam kani anai ihcobehti tahkan ulun-ulun ijo punai porocaya umba Ahku tuh lacat.”

¹⁵ “Amat konduang'kam bodusa toharep ihkam, tulak nokuh io tutang nuhtui ahkai kosalaioh. Nguan kolouorih umba tonih-tonih, holat bongon boro iou. Amat io numbun karo-auh'mu, mahka anai hasiroh ihko nyombang konduang'mu buli.

¹⁶ Tahpi amat eam, ngomin ihco ata'ai duo behti hino. Bain luwang Surat Borasih tonyurat, ‘Sokurang-kurangoh duo ata'ai tolu saksi ahkan duon ngotaan ihcobehti ulun 'jo bosala.’

¹⁷Amat io eam norima tingak ulun-ulun rih, nyiar orih rih ahkan ukup. Tutang kojoriaioh, amat io eam kani norima tingak, ukup, mohonou io kolou ponagih pajak tutang 'cobehti ijo eam kosono Pohotala.”

¹⁸ “Ngota'an rih: Inon ijo hion ihkam ngahana ang kolunon, ahkan ngahana ang soruga. Tutang inon ijo hion'mu ngomorong ang kolunon, ka'a morong ang soruga.

¹⁹Tutang ngotaan rih ka'a: Amat ang louk ihkam ang kolunon tuh duo behti jari hopahkat tohou inon ka'a, tutang bodo'a mahka do'a iro rih ahkan norima bain Amai-Ku ang soruga.

²⁰Bain ang umoh duo ata'ai tolu behti bodo'a sama-sama, tului Ahku, Ahku anai ang tohun iro.”

²¹ Pongohuli Petrus lombut nokuh Yesus tutang ngisok, “Tuhan, amat konduang'ku bodusa umba ahku, nyiring pira tikat ahku ngapun io? Nyiring pihtu tikat?”

²²Yesus mutah, “Eam, eam nyiring pihtu tikat, tahpi pihtu pulu tikat pihtu tikat!

²³Tului amatmira Pohotala moretah koada'aioh kalou a'ang porobasa tuh: Ihcobehti lahca kani molunas utang-utang karo-jihpoioh.

²⁴Ohkot io nopara tuot moriksa, tonyarah ahkaioh ihcobehti jihpon ijo bohutang bojuha-juha,

²⁵tutang eam duoi molunasoh. Jadi, lahca orih moretah, ahkan jihpon rih ponodagang homboh umba anak, oruhoh, tutang kokaron ponahtou aiuoh, ahkan mombayar utangoh rih.

²⁶Jihpon rih suhkuntu'ut ang toharop lahca rih tutang nyawot apun, ‘Tuan sabar umba ahku. Ahku ahkan molunas paring utang'ku.’

²⁷Lahca rih masi umba io nyiring io, ngudap paring utangoh.

²⁸Kotihka jihpon rih soluka, io hosombang umba jolahaioh, 'cobehti jihpon ka'a, ijo anai utangoh umba io pira-pira kuhjan. Io nambit jolahai orih, nyeok io tutang nuhtui, ‘Bayarih paring utang'mu!’

²⁹Turus jolahaiohrih suhkuntu'ut ang toharepoh hawoi nyawot, ‘Sabar houn sobat, paring utung'ku ahkan ahku bayaroh!’

³⁰Tahpi jihpon rih nulak. Mala-malah, io posolong jihpon orih aang sipir nyiring io mombayar utangoh.

³¹Kotihka jihpon-jihpon ijo bohkon nohto, inon ijo jari nyolung, iro porosahtoi, tutang ngadu ang rih ahkan lahca.

³²Mahka lahca rih na'ah jihpon ijo ja'at orih tutang nuhtui umba io, ‘Jihpon ijo ja'at! Koparing utang'mu jari ahku ngudapoh tului ihko nyawot apun umba ahku.

³³Eamkah, ihko ka'a harus anai kasihan umba injah'mu kolou ahku jari anai kasihan umba ihko?’

³⁴Lahca rih paham sangit. Jihpon ijo ja'at orih ponosolongoh koluwang sipir nyiring io molunas paring utangoh.”

³⁵Yesus ngohpah kesah-Oh hapan tuhtui tuh, “Kodorih ka'a Amai-Ku ang soruga ahkan nguan ihkam nyinong behti, amat ihkam eam mongapun konduang'mu honong ihlas.”