Read Ot Danum MATEUS 19 Bible Online

MATEUS 19 - Ot Danum bible

MATEUS 19

¹Uli Yesus ngopah nuhtui paringoh rih, Io nohtah Galilea turus tulak nokuh tana Yudea ang pohoi Sungoi Yordan.

²Aro ulun ngohasu Io, tutang Io ngopios iro ang anan.

³Turus ulun-ulun Parisi lombut unuk nyokohtung Io. Iro ngisok, “Numbun hadat agaman 'to, inon tou ulun misah oruhoh tului alasan inon ka'a?”

⁴ Yesus mutah, “Inon ihkam jaham mombasa ang Surat Borasih, ijo Pona'oi tutang ijo napa ulun, ang pahtukoh napa iro bahkas tutang bawi?

⁵ Tutang uliorih Io nuhtui, ‘Orih kotuluioh ulunbahkas nohtah inai-amaioh tutang hihco umba oruhoh, mahka doro monjadi ihco.’

⁶Jadi iro eam hino duo behti tahpi ihco. Bain orih inon ijo jari tomohihco bain Pohotala eam tou nulang bain ulun.”

⁷ Turus ulun-ulun Parisi ngisok umba Io, “Amat kodorih ombai Museh nyuhu ulun nonga surat hopisah ahkan oruh ijo tomisahoh?”

⁸Yesus mutah, “Museh nonga ijin ihkam pisah umba oruh'kam tului ihkam bohali toningak. Tahpi kotu'ui eam kodorih ang ijo pahtukoh.

⁹ Jadi, ngonih tuh: Iai misah oruhoh — podahar oruhoh rih eam nyapang — Pongohuli ngoruh hino umba bawi bohkon, ulun rih hobandung.”

¹⁰Mahka murid-murid Yesus nuhtui umba Io, “Amat soal kohihco bosai tutang oruh anai kolou orih, labih pios eam usah ngoruh.”

¹¹Yesus mutah, “Eam paring ulun duon norima karo auh orih rih, tihkas ulun-ulun ijo jari tonahtap bain Pohotala.

¹²Tului anai ulun ijo eam duon ngoruh, bain iro puna konanak kodorih. Anai ka'a ijo eam duon ngoruh tului io napa kolourih bain ulun bohkon. Tutang anai hino ijo mihtih bongoi, ahkan eam ngoruh ata'ai ngomosai, ahkai tou mohalu Pohotala. Ulun ijo sanggup norima auh ajar tuh, nauh io norimaoh.”

¹³Anai ulun-ulun ngomin anak-inyam nokuh Yesus mangat Io ngina longoi-Oh ang ngosan kuhung'ndo tutang bodo'a ahkan'ndo. Tahpi murid-murid Yesus baca ulun-ulun rih.

¹⁴Mahka Yesus nuhtui umba murid-murid-Oh, “Nauh anak-anak inyam rih lombut nokuh Ahku! Ara baca iro, bain ulun-ulun ijo koloutuh ijo monjadi ulun ukup ain Pohotala.”

¹⁵Turus Yesus ngina longoi-Oh ang ngosan kuhung anak-anak rih tutang momborehkat iro. Pongohuli Io tulak tahkan anan.

¹⁶Ang ihco ondou, ihcobehti ulunbahkas biou lombut nokuh Yesus, “Amai Guru,” hioioh, “gawi pios 'jo umoh harus ahku nguai ahkan duon norima pombolum ijo sojahti tutang kototahiu?”

¹⁷Yesus mutah, “Ombai ihko ngisok umba Ahku tohou inon ijo pios? Tihkas anai Ihco, ijo pios. Amat ihko jolik bolum, ihko pahtut te'et numbun poretah-poretah Pohotala.”

¹⁸ “Poretah ijo umoh rih?” kisok ulun rih. Yesus mutah, “Ara munu, ara hobandung, ara nahkou, ara nuhtui kobalik,

¹⁹ hormat amai tutang inai'mu; tutang ngasih sosama'mu ulun, kolou ihko ngasih arop'mu bongom.”

²⁰“Paringoh rih jari ahku nguai,” hion ulun biou rih. “Inon hino ijo porulu?”

²¹Yesus nuhtui umba io, “Amat ihko kani monjadi soporuna, tulak modagang paring ain'mu. Tonga duitoh ahkan ulun porosbolum, tutang ihko ahkan norima ponahtou ang soruga. Ulirih rih, lombut rih ngahasu Ahku!”

²²Ngonih auh-auh orih, ulun biou rih tulak homboh porosahtoioh tului io tahtou samasino.

²³Turus Yesus nuhtui umba murid-murid-Oh, “Ahku nuhtui ahkan ihkam, bohali samasino ulun tahtou monjadi anak ukup ain Pohotala.

²⁴Tutang tuh hino ijo kani Ahku nuhtui ahkan'kam; murah ihcokungan unta nyolong luwang doih, tahkan umba ihcobehti uluntahtou nyolong ang Kolunon Bohua Ain Pohotala.”

²⁵Uhun murid-murid-Oh ngonih auh Yesus rih, iro helan. “Amat kolourih,” hion'ndo, “iai ijo tou solamat?”

²⁶Yesus nopahjah iro turus nuhtui, “Ahkan ulun, orih mustahel! Tahpi ahkan Pohotala, paringoh tounyolung.”

²⁷Turus Petrus nuhtui, “Nohto rih, ihkai jari nohtah kokaro-paringoh ahkan ngohasu Amai. Tutang inon ijo ihkai norima?”

²⁸ Yesus nuhtui umba iro, “Porocayarih: Ang Kolunon Ijo Bohua, Anak Ulun ahkan tuot ang ngosan pododusai-Oh ijo hajo. Ang uhun rih ihkam murid-murid-Ku ahkan tuot ang ngosan duo balas pododusan tutang mosara koduo balas suku uhtus Israel!

²⁹Tutang nyinong ulun ijo jari nohtah lohpou, ata'ai konduangoh bahkas ata'ai bawi, ata'ai inai amai, ata'ai anak-anak, ata'ai umoi tului Ahku, ulun rih ahkan norima hoduli sorahtus lihpet. Tutang io ahkan norima ka'a pombolum sojahti tutang kototahiu.

³⁰ Tahpi aro ulun ijo, huntuh tuh pahtuk ahkan monjadi ijo kolain tutang ijo uhuntuh tuh kolain, ahkan monjadi ijo pahtukoh.”