Read Ot Danum MATEUS 20 Bible Online

MATEUS 20 - Ot Danum bible

MATEUS 20

¹“Amat Pohotala moretah, koada'aioh kolou porobasa tuh: Ihcobehti tepun pombulan anggur soluka uhun ngohkos ngurah ulun ahkan bogawi ang pombulan angguroh.

²Uli io muhtus setuju upah'ndo, ihco duit perak, ihco ondou, io nyuhu iro bogawi ang pombulan angguroh.

³Pukul sioi ngohkos, tepun pombulan rih tulak hino, nokuh pira-pira ulun ijo kuhang-kihui ang pasar.

⁴Mahka nuhtui rih io umba iro, ‘Tulak rih ihkam bogawi aang pombulan anggur aik'ku. Ahku ahkan ngupah ihkam umba upah ijo pahtut.’

⁵Iro ka tulak. Pukul duo balas tohun ondou tutang ka'a pukul tolu cohit, tepun pombulan rih soluka nguan hal ijo sama.

⁶Tutang kira-kira pukul limo cohit, io soluka hino tutang nohto magun anai ulun ijo kuhang-kihui. Turus io ngisok umba iro, ‘Ombai ihkam tombok turus nyihing ihcoondou ang ohtoi tutang eam aro bogawi ino-inon?’

⁷Ulun-ulun rih mutah, ‘Eam aro ulun ijo ngupah ihkai bogawi ino-inon.’ ‘Amat kolourih,’ hion tepun pombulan rih, ‘tulak ihkam bogawi ang kombulan anggur aik'ku.’

⁸ Cohit ondou tepun pombulan rih nuhtui umba mandoroh, ‘Na'ah rih ulun-ulun ponggawi rih tutang bayar rih upah'ndo nyinong behti, nopara tahkan ulun ijo bogawi pokopongooh, johcok umba ijo bogawi pahtukoh.’

⁹Turus lombut rih ponggawi-ponggawi rih, ijo pongo bogawi, nopara tahkan pukul limo cohit. Iro nyino-nyinongbehti norima ihco duit perak.

¹⁰Pongohuli rih, lombut hino ponggawi-ponggawi ijo konupah tahkan ngohkos. Iro niruk iro ahkan norima labih aro. Padahar iro tihkas tononga ihco duit perak ka'a.

¹¹Kotihka norima duit orih iro bokuhtuk umba tepun pombulan rih:

¹²‘Ponggawi-ponggawi ijo lombut pongorih baya bogawi ihco jam. Sadang ihkai bogawi ihcoondou ang minda totang mahtan ondou, tahpi Tuan mbayar upah iro sama umba upah ekai!’

¹³Tepun pombulan anggur rih mutah ahkan auh ihcobehti tahkan iro, ‘Sobat, ahku eam sala toharep 'ko. Eamkah ihko jari sotuju norima upah ihco duit perak ahkan upah gawin'mu ihcoondou?

¹⁴Nah, omin upah'mu tutang tulak iou. Ahku puna jolik nongaoh ahkan ulun ijo nyolong pokopongo rih, upah ijo sama umba ijo ahku nongaoh ahkan'mu.

¹⁵Inon ahku eam tou nguan numbun kokani'ku umba ijo aik'ku? Ata'ai rih ihko bohiri, tului ahku pios ahtoi?’ ”

¹⁶ Turus Yesus nuhtui hino, “Kolourih ka'a ulun-ulun ijo kolaiou, ahkan monjadi ijo pahtukoh, tutang ulun-ulun ijo pahtukoh monjadi ijo kolaiou.”

¹⁷Kotihka Yesus nihtu nokuh Yerusalem, ang beteng jalan Io na'ah duo balas murid-Oh, hopuhpung bongon'ndo. Turus Io nuhtui umba iro,

¹⁸“Ngonihoh! Ihto uhuntuh nihtu Yerusalem. Ang anan Anak Ulun ahkan tonyarah rih ahkan imam-imam kopala tutang guru-guru agama. Turus Io ahkan tomohukum mahtoi,

¹⁹pongohino rih tonyarah ahkan ulun-ulun bohkon Yahudi. Iro ahkan hololea Io, ngoporos Io, tutang nyopolahki Io. Tahpi aang ondou tolu Io ahkan monyun hoduli.”

²⁰Pongohino oruh Sebedeus lombut honong anak-anakoh nokuh Yesus. Ang toharop Yesus io nyembah tutang nyawot angihco.

²¹“Inai kani inon?” hion Yesus. Ibu rih mutah, “Ahku jolik koduo anak'ku tuh, tuot ang komuloi tutang kotoun Amai, amat Amai monjadi Lahca noin.”

²²“Ihkam eam kota'an inon ijo ihkam nyawotoh,” hion Yesus umba iro. “Sanggup ihkam ngorih tahkan sakir koporos ijo harus Ahku ngorih?” “Sanggup,” hion'ndo.

²³Yesus nuhtui, “Puna ihkam ahkan ngorih ka'a tahkan sakir-Ku. Tahpi tohou iai ijo tuot ang komuloi tutang kotouk-Ku orih eam Ahku ijo bohak nuhkasoh. Unuk-unuk rih anairih ahkan ulun-ulun, ijo jari tonuhkas bain Amai-Ku.”

²⁴Kotihka kosopulu murid ijo bohkon ngonih hal orih, iro bosingi umba koduo behti hokonduang rih.

²⁵ Tului orih Yesus na'ah iro paring turus nuhtui, “Ihkam kota'an, ijo okon-okon uhtus ijo eam kosono Pohotala mononyok rayatoh. Tutang ulun hajo nenyek iro.

²⁶ Tahpi ihkam eam tou kolouorih. Sobalikoh, ulun ijo kani monjadi hajo aang louk ihkam, harus monjadi pohalu'kam.

²⁷Tutang ulun ijo kani monjadi ijo pahtukoh ang louk ihkam harus monjadi jihpon'kam.

²⁸Sama kolou Anak Ulun rih ka'a; Io lombut eam ahkan tonohalu, tahpi ahkan mohalu, tutang nyorah hasong-Oh ahkan momordehka aro ulun.”

²⁹Kotihka nohtah Yerikho, aro ulun ngahasu Yesus.

³⁰Duo behti bobulen beteng tuot ang saran jalan. Kotihka iro ngonih ijo Yesus nyihing, iro bokociak, “Anak Dawid, ngasiohrih ihkai!”

³¹Ulun aro ijo anai ang anan bosingiumba iro, tutang nyuhu iro tonih. Tahpi iro bokociak labih muhing hino, “Tuan, Anak Dawid, ngasiohrih ihkai!”

³²Turus Yesus tondo tutang na'ah iro. “Inon ijo ihkam jolik Ahku nguai ahkan'kam?” kisok Yesus.

³³Iro mutah, “Tuan, ihkai jolik nohto!”

³⁴Yesus ngasi umba iro, turus ninjok mahtan'ndo. Uhun rih ka'a doro dahpot nopahjah. Turus iro ngohasu Yesus.