Read Ot Danum MATEUS 21 Bible Online

MATEUS 21 - Ot Danum bible

MATEUS 21

¹Ohkot jari doni Yerusalem, iro johcok ang Betpage ang Puruk Zaitun. Ang anan Yesus nyuhu duo behti murid-Oh nyalan labih houn.

²“Tulak nokuh lowu ijo ang boun ahi,” pohtoh Yesus umba iro. “Jeleng ihkam ahkan nohto ihcokungan keledai sonuhkau tutang anakoh. Nguwat orih koduo-duooh tutang ngomin ahkan ohtoi.

³Amat anai ulun ngisok ang ihkam, nuhtui ahkaioh, ‘Tuhan kani hapaoh,’ mahka ulun rih jeleng nyuhu tutang mohonou keledai rih tongomin.”

⁴Hal orih kodorih mangat nyolung rih inon ijo tonuhtui bain nabi kolou pongo,

⁵“Mborihtarih ahkan Sion, Lahca'kam, rahat lombut ahkan'kam. Io randah ahtoi tutang nunggang, ihcokungan keledai, ihcokungan anak keledai ijo biou.”

⁶Pongohuli koduo-duo murid-Oh rih tulak tutang nguan kolou ijo tomohtoh Yesus umba iro.

⁷Iro ngomin keledai rih hawui anakoh. Turus iro ngolahpik ngosan lihkut keledai-keledai rih umba jubah'ndo. Uliorih Yesus nunggangoh.

⁸Aro ulun ang anan mbirang jubah-jubah'ndo ang jalan, kodorih ka'a ulun bohkon nuhtuk da'an kahju tutang nahtaioh ang tohun jalan.

⁹Ulun ijo nyalan ang hila boun tutang hila lihkut Yesus uras molahap-lahap, “Bolum Anak Dawid! Tomborehkat Io ijo lombut ngosan aran Tuhan! Tara rih ahkan Pohotala Ijo Mahaisung!”

¹⁰Turus, kotihka Yesus nyolong Yerusalem, hopus kohta rih monjadi rami. “Jituh iai?” kisok ulun-ulun kohta rih.

¹¹“Io Nabi Yesus, tahkan Nasaret ang Galilea,” puhtoh ulun aro ijo nutut Yesus.

¹²Pongohino Yesus nyolong nokuh Lohpou Tuhan, tutang muhko paring ulun ijo bodagang aang anan. Io nombalikmokila meja-meja unuk ulun nokiri duit, tutang bangku-bangku podagang bulung dala.

¹³ Turus Io nuhtui umba ulun-ulun rih, “Ang luwang Surat Borasih tonyurat, ijo Pohotala nuhtui, ‘Lohpou-Ku ahkan konohawot lohpou unuk bodo'a,’ tahpi ihkam monjadioh kosalah ponyilou!”

¹⁴Ulun-ulun bobulen tutang bolomu lombut nokuh Yesus ang Lohpou Tuhan, tutang Io ngopios iro.

¹⁵Tahpi imam-imam kopala tutang guru-guru agama bosingi nohto tandahelan-tandahelan ijo konuan bain Yesus. Tutang iro bosingi ka'a ngonih anak-inyam molahap-lahap ang Lohpou Tuhan, “Bolum Anak Dawid!”

¹⁶ Iro nuhtui umba Yesus, “Ihko kanaham inon ijo hion'ndo ngohawotrih?” “Yo, kanahak-Ku,” puhtah Yesus, “jaha pu'urih ihkam mombasa ayat Surat Borasih tuh: ‘Anak-inyam tutang anak-ngoa jari Ahku ngajaroh ahkan ngohawot tara ijo soporuna?’ ”

¹⁷Pongohuli Yesus nohtah iro, turus soluka tahkan kohta rih nokuh Betania tutang bomalom ang anan.

¹⁸Homboh-ngohkos hawun ondouoh, ang ponyalaioh hoduli ahkan kohta Yesus bolo'u.

¹⁹Io nohto ihcokobahtang pu'un sikun ang saran jalan. Io tulak nokuh pu'un rih, tahpi eam aro nyombangoh ihcokoluang-buaoh ka'a, kocoali karon-daui iou. Turus Yesus nuhtui umba pu'un sikun rih, “Ihko eam ahkan mua hino!” Hunrih pu'un sikun rih molanyu.

²⁰Aang uhun murid-murid Yesus nohto angnyolung rih, iro helan samasino, “Koloukuwoh pu'un sikun rih tou turus mahtoi paringoh?” hion'ndo.

²¹ “Kotu'ui,” puhtah Yesus, “amat ihkam porocaya tutang eam bembang, ihkam duon nguan inon ijo ius Ahku nguai toharep pu'un sikun rih. Tutang eam baya orih iou, malah ihkam ahkan duon nuhtui umba puruk tuh, ‘Kuat tutang hahtun nokuh luwang tasik’; mahka hal orih ahkan nyolung.

²²Inon beweu ijo ihkam nyawot ang do'a'mu, ihkam ahkan norimaoh, asar ihkam porocaya.”

²³Pongohino Yesus hoduli nokuh Lohpou Tuhan, turus nyolong tutang majar ang anan. Ohkot Io uhun majar, imam-imam kopala tutang okon-okon Yahudi lombut nokuh Io tutang ngisok, “Ngosan galang inon Ihko duon nguan paringoh rih? Iai ijo nonga hak rih ahkan-Kam?”

²⁴Yesus mutah, “Ahku ka'a kani ngisok umba ihkam. Tutang amat ihkam mutahoh, Ahku ahkan nuhtui ahkan'kam hapan hak, iai Ahku nguan hal-hal tuh.

²⁵Yohanes mopondus umba hak iai? Pohotala ata'ai ulun?” Turus imam-imam kopala tutang okon-okon Yahudi rih hopahkat sama arop'ndo, “Amat ihto nuhtui, ‘Hapan hak kowasa ain Pohotala,’ Io ahkan nuhtui, ‘Amat kodorih ombai ikam eam porocaya umba io?’

²⁶Tahpi amat ihto ngohawot, ‘Hapan hak kowasa kolunon,’ ihto mihkoh umba ulun aro, tului ulun aro ngohu Yohanes rih ihcobehti nabi.”

²⁷Jadi iro mutah, “Ihkai eam kota'an.” Turus Yesus nuhtui umba iro, “Amat kolourih Ahku ka eam ahkan mander ahkan'kam hapan hak kowasa iai Ahku nguan paringoh tuh.”

²⁸“Huntuh, koloukuwohoh tiruk'mu tohou hal tuh?” hion Yesus turusoh, “Anai ihcobehti amai, ijo ngina duo anak bahkas. Ulun rih, tulak nokuh anakoh ijo oko, tutang nuhtui, ‘Nak, tulak rih bogawi ang pombulan anggur ondou tuh.’

²⁹‘Ahku eam kani,’ hion anak rih. Tahpi pongohino, io hubah tirukoh tutang tulak nokuh pombulan anggur rih.

³⁰Pongohuli rih amaioh tulak nokuh anakoh ijo koduo, tutang nuhtui umba auh ijo sama. ‘Piosrih, Amai,’ hion anak ijo koduo rih. Tahpi io eam tulak.

³¹Olai, tahkan iro duo anak rih, umoh ijo numbun konohuang amaioh?” “Ijo okoi,” puhtah imam-imam tutang okon-okon Yahudi rih. Mahka Yesus nuhtui umba iro, “Porocayarih: Ponagih-ponagih pajak tutang bawi-bawi luteu ahkan paling houn monjadi uhkup ain Pohotala hounumba'kam.

³² Tului Yohanes Popondus lombut, tutang ngorinah ahkan'kam cara bolum numbun kohondak Tuhan, tahpi ihkam eam kani porocaya aang ajaranoh; tahpi ponagih-ponagih pajak tutang bawi-bawi luteu porocaya umba io. Tahpi oluka ihkam jari nohto paring aang rih, ihkam eam ka'a ngubah tiruk'kam tutang eam porocaya umba Tuhan.”

³³ “Ngonih, porobasa ijo ihco tuh hino,” hion Yesus. “Ihco tuan tana, ngombulan ihco kolambar pombulan anggur. Io nombok pahkotoh hokodiling, io nguan unuk pokakas mohamih anggur, pongohino rih nombok gardu jaga. Uliorih rih io nyewaoh pombulan anggur rih ahkan ponggawi-ponggawi, turus tulak nokuh lowu bohkon.

³⁴Kotihka jari johcok musim nguhtoi bua anggur, tuan tana rih ngirim pohalu-pohaluoh nokuh ponggawi-ponggawi pombulan anggur rih ahkan norima bagian aiuoh.

³⁵Tahpi ponggawi-ponggawi pombulan orih nawan'ndo pohalu-pohalu tuan tana orih: Ijo 'cobehti tonahop'ndo, ijo bohkon tomunu, tutang ijo bohkon hino tomuhkah'ndo umba bahtu.

³⁶Tuan tana rih ngirim hino pohalu-pohalu bohkon, labih aro hino umba 'jo pahtuk tikatoh. Tahpi iro tononguan honong cara ijo sama.

³⁷Kojoriaioh tuan tana rih ngirim ahkan iro anak aiuoh bongoi. ‘Pasti anak'ku ahkan tomohoromat'ndo,’ tirukoh.

³⁸Tahpi kotihka ponggawi-ponggawi pomulan anggur rih, nohto anak tuan tana orih, iro nuhtui ihco sama ijo bohkon, ‘Nah, ahtuh io, ahli warisoh. Olai ihto munuoh, mangat ihto tepun warisoh!’

³⁹Mahka anakoh rih tonawan, turus tonyahkah'ndo nokuh konaha turus io tomunu.”

⁴⁰Yesus ngisok, “Nah, amat tepun pombulan anggur rih buli, io ahkan nguan inon toharep ponggawi-ponggawi pombulan orih?”

⁴¹Iro mutah, “Musti io ahkan munu ulun-ulun ja'at orih, turus moposewaoh kombulan anggur rih ahkan ulun bohkon ijo kani nonga bagi bua tana rih ahkaioh ang ohkotoh.”

⁴² Mahka Yesus nuhtui umba iro, “Jaha ihkam pu'u mombasa ijo tonyurat a'ang Surat Borasih? ‘Bahtu ijo eam hapan bain tuhkang pangun jari monjadi bahtu ijo mombahtang. Tuhrih ang konuan Tuhan; ijo dalou kohinutoh!’ ”

⁴³“Jadi ingatrih,” hion Yesus, “paring hak kolou ukup ain Pohotala ahkan konomin tahkan'kam tutang tononga ahkan ihco uhtus, ijo ahkan nguan karon-poretah Pohotala. [

⁴⁴Ulun ijo tocahap ang bahtu rih, ahkan luhtek; tutang ulun ijo nopahas bahtu rih ahkan tokole'et jadi korawu.]”

⁴⁵Ang ohkot imam-imam kopala tutang ulun-ulun Parisi ngonih karo-porobasa Yesus rih, iro kota'an ijo Yesus nyindir tohou iro.

⁴⁶Jadi iro ngurah jalan nawan Io. Tahpi iro mihkoh umba ulun-ulun aro, tului ulun aro rih ngohu Yesus ihcobehti nabi.